VOV4.Jarai - Lơ 21/7, ƀơi Ƀirô Ping gah, yă Trương Thị Mai, ding kơna Ding jum kơđi čar, Khua apăn bruă Ping gah, Khua khul pơphun bruă gơnong glông, Khua grup khua mua ngă giang mah Việt Nam - Japan hơmâo mông tŭ jum Khua khul git gai Sang bruă prăk ngă hrŏm jar kmar Japan (JBIC) Tadashi Maeda. Amăng mông bưp, yă Trương Thị Mai lăi pơtong, Việt Nam glăk pok pơhai ngă tui tơlơi pơtrun mơng Jơnum Ping gah tal XIII, gir run kiăng pơgiong tui hơnong pơkă pơjing lŏn ia pơđĭ kyar amăng rơnuk thun tal XXI, pơsit tong ngă tui hơdôm hơdră pơtom hiăp rơngai, ngă pô, rơnuk rơnua, giang mah, ngă hrŏm hăng pơđĭ kyar, djop mơta amăng tơlơi rô nao rai, amăng anun lăng yôm tơlơi rô nao rai ngă hrŏm hăng Japan. Yă Trương Thị Mai rơkâo JBIC tŏ ngă tui hơdôm hơdră pơtom hiăp kơplah wah JBIC hăng hơdôm anom bruă ƀơi Việt Nam, kơtưn rô nao rai ngă hrŏm hăng hơdôm anom bruă Kơnuk kơna Việt Nam, laih dong sem lăng brơi čan lu dong kơ hơdôm anom bơwih ƀong sĭ mơdrô Việt Nam ƀudah hơdôm anom bruă bơwih ƀong hrŏm Japan - Việt Nam gum hrŏm tuh pơ alin ƀơi Việt Nam.

Siu Đoan: Pơblang