VOV4.Jarai - Anai lĕ anih hơđuh klin kơtang hloh amăng tơring čar Daklak, hăng 51 čô mơnuih F0, ră anai ƀuôn Ea Bhok, să Ea Bhok, tơring glông Čư̆ Kuin găn rơgao 25 hrơi huăi hơmâo hlơi dong tah ƀă klin. Abih bang mơnuih F1pơgiong hrơi pơkă pơčlah pơƀut hăng hơmâo laih 44 čô mơnuih pơjrao suaih dưi glăi pơ sang. Tơlơi hơdip kơ mơnuih ƀon sang amăng ƀuôn Ea Bhok glăk jai hrơi pơwŏt glăi tui hơđăp.

Dưm hla kơtor brơi kơ rơmô ƀong giong, ơi Y Doen Mlô, dŏ ƀơi ƀuôn Ea Bhok, să Ea Bhok, să Ean Bhok, tơring glông Čư̆ Kuin, tơring čar Daklak prap nao čuă hmua pơdai. Hơdôm bruă anai pơwŏt glăi tui hơđăp mơng ơi Y Doen Mlô giăm ha wŏt hrơi tơjuh anai laih. Hlâo anun, amăng rơnuč blan 7, sang anŏ hơmâo 9 čô mơnuih lêng kơ ƀă klin Covid-19; hơmâo 2 rơkơi bơnai ơi Y Doen Mlô hrŏm hăng 3 čô ană laih dong 4 čô tơčô ñu. Truh ră anai dŏ kơnong bơnai ñu glăk dŏ pơjrao, 8 čô mơnuih dŏ glăi amăng sang anŏ pơjrao suaih laih laih dong pơgiong pơčlah pơƀut 14 hrơi pơ sang hlâo kơ glăi mơng sang ia jrao.

“Lơ̆m glăi truh pơ sang kâo hok mơ-ak biă mă, drơi jăn ăt suaih pral tui hơđăp mơn. Đang hmua, un rơmô ăt hơmâo mơnuih rông ba mơn, lơ̆m pơwŏt glăi hơdip tui hơđăp kâo ƀuh mơ-ak biă mă, hmua pơdai glăk hrôh kâo bơni kơ ană plơi djru brơi”.

Yă H’Noen Ksor hrŏm hăng ană bă amu pơdai

Ăt kar kăi hăng ơi Y Doen Mlô, yă H’Noen Ksor lĕ mơnuih ƀă klin Covid-19 amăng lơ 22/7 lơ̆m jê̆ giăm hăng neh met wa lĕ F0 amăng plơi pla. 5 čô mơnuih pơkŏn amăng sang anŏ ñu lĕ F1 hăng khŏm nao pơčlah pơƀut amăng 21 hrơi. Lơ̆m pơwŏt glăi tơlơi hơdip tui hơđăp tơdơi kơ 1 blan ha mơkrah pơjrao hăng pơčlah yua ƀă klin Covid-19, yă H’Noen Ksor thâo rơđah kơ tơlơi yôm amăng tơlơi hơdip hăng kơđiăng amăng bruă pơgang klin:

“Ơi ia jrao pơtă pơtăn lơ̆m glăi pơ sang, anăm tơbiă hyu pơkŏn kơnong dŏ amăng sanh, anăm bưp hlơi hlơi ôh, mah wŏt ană bă amăng sang anŏ, pơčlah mă pô, gơnam ƀong huă jao ană bă tơnă hơbai brơi, hơdôm hrơi tơdơi anun lơ̆m glăi pơ sang ăt hơmâo ƀing ơi ia jrao nao čuă, khăm brơi. Ră anai kâo suaih pral laih, arăng rơkâo nao pơ să ngă hră pơ-ar kiăng kơ dưi găn nao rai, nao pơ hmua. Ră anai kâo kah mơng dưi tơbiă hyu gah rơngiao kiăng kơ ngă hră pơ-ar, mơ mơng hlâo anun ră anai ƀu khin nao pơpă ôh. Ră anai kâo mưn suaih pral laih. Kâo bơni biă mă kơ ƀing ơi ia jrao hơmâo abih pran pơjrao brơi kơ kâo”.

Ơi Đào Huy Cường, khua ƀuôn Ea Bhok brơi thâo, lơ 19/7, lơ̆m ƀuôn ƀuh hơmâo mơnuih ƀă klin blung a lĕ mơnuih ƀon sang amăng ƀuôn glăi mơng tơring čar Bình Dương, tơdơi kơ 3 hrơi, mrô mơnuih ƀă klin đĭ 36 čô; hăng tơdơi kơ 10 hrơi, đơ đam ƀuôn hơmâo 51 čô. 70 boh sang anŏ bơbeč nao yua kơ hơmâo mơnuih lĕ F0 hăng F1. Kiăng kơ gơgrong pơgang hĭ klin Covid-19, hơmâo lu hơdră pơgang khut khăt hơmâo gong gai ƀon lan pok pơhai anun lĕ: Guang dar đơ đam ƀuôn Ea Bhok, ngă tui tơlơi črâo trun mrô 16 amăng đơ đam să. Hrŏm hăng anun, bruă djru brơi mơnuih ƀon sang hơmâo pơphun hmao tlôn, pơhlôm ƀu hơmâo sang anŏ pơpă ôh rơmon rơpa amăng hơdôm hrơi guang dar pioh pơgang klin.

Ơi Y Doen Mlô pơwŏt glăi hơdip tui hơđăp tơdơi kơ pơjrao suaih yua ƀă klin Covid-19

Tui hăng ơi Đào Huy Cường, Khua ƀuôn Ea Bhok, yua kơ hơmâo tơlơi mut hrŏm mơng mơnuih ƀon sang, tơlơi črâo ba khut khăt mơng gong gai ƀon lan, truh ră anai, ƀuôn Ea Bhok hơmâo găn rơgao 25 hrơi ƀu hơmâo hlơi dong tah ƀă klin, 44 čô mơnuih ƀă klin Covid-19 pơjrao suaih dưi glăi pơ sang hăng pơgiong hrơi pơčlah tơdơi kơ pơjrao giong. Hơdôm anih wai pơgang ăt ruh hĭ, tơlơi hơdip kơ mơnuih ƀon sang glăk pơwŏt glăi tui hơđăp.

“Ră anai tơlơi hơdip pơwŏt glăi tui hơđăp phrâo anai hơmâo tơlơi lăi pơthâo mơng Anom bruă pơsur ngă hmua să kơ bruă djru brơi neh met wa sa, dua boh thâo amăng pơgang phun pla tơdơi kơ hơdôm hrơi ƀu hơmâo nao ngă hmua. Hơmâo hră pơ-ar črâo ba tong ten brơi rĭm ia jrao pruih brơi hmua pơdai, kơphê tiu kiăng kơ neh met wa gir run pơwŏt glăi ngă hmua brơi kơ phun pla hiam mơboh huăi hlăt mŏt pơčrăm”.

Tơlơi hơdip pơwŏt glăi tui hơđăp ƀơi ƀuôn Ea Bhok

Ơi Nguyễn Văn Dũng, Khua Jơnum min mơnuih ƀon sang să Ea Bhok, tơring glông Čư̆ Kuin, tơring čar Daklak brơi thâo: hrŏm hăng bruă djru neh met wa amăng pơgang hlăt mŏt, hơkrŭ glăi ngă hmua tơdơi kơ hơdôm hrơi guang dar, gong gai să ăt iâu pơthưr ƀing mơnuih čơmah djru brơi gơnam ƀong, añăm tam kơ sang anŏ ƀun rin, sang anŏ bơbeč nao kơtang mơng klin Covid-19 kiăng ƀing gơñu hơđong tơlơi hơdip. Hơdôm hơdră djru ăt hơmâo ƀon lan pok pơhai hmao tlôn.

“Să ăt hơmâo pơphô bruă brơi Ping gah tơring glông, Jơnum min djru brơi rĭm čô mơnuih F0 lĕ 10 kĭ braih, F1 lĕ 5 kĭ braih. Ƀing hyu mă bruă pơ ataih lơ̆m glăi pơ plơi pla să glăi ngă tui Tơlơi pơsit mrô 68 kiăng kơ djru brơi neh met wa hmao tlôn hơmâo prăk tuh pơ alin bơwih ƀong huă amăng plơi pla hăng tŏ tui pơtô pơblang brơi kơ neh met wa anăm pơtah tai hăng ngă tui klă tơlơi pơtrun 5k mơng Ding jum ia jrao”.

Mơng sa anih hơmâo klin Covid-19 hơđuh đĭ blung a amăng tơring čar Daklak, gong gai hăng anom bruă bơdjơ̆ nao hơmâo pok pơhai hơdôm hơdră pơgang klin khut khăt, hmao tlôn, truh ră anai tơlơi hơdip kơ mơnuih ƀon sang amăng ƀuôn Ea Bhok, să Ea Bhok, tơring glông Čư̆ Kuin glăk ƀơƀrư̆ pơwŏt glăi tui hơđăp. Samơ̆, ƀơi anăp kơ tơlơi tơnap tap mơng klin Covid-19, neh met wa anăm pơtah tah ôh; mơ̆ kiăng ngă tui hơdôm tơlơi pơkă amăng pơgang klin.

Siu Đoan: Pơblang