VOV4.Jarai -  Čư̆ Elang lĕ să kual asuek mơng tơring glông Ea Kar, tơring čar Daklak, giăm hăng să Vụ Bổn (tơring glông Krông Pač), să Čư̆ Pui (tơring glông Krông Bông) hăng să Čư̆ Bông (tơring glông Ea Kar). Wot 3 bôh să ha mơguai leng kơ hmâo hơdôm anih klin Covid-19 ngă amăng plơi pla. Kơnong kơ Čư̆ Elang dŏng amăng krah 3 bôh să hmâo klin, samơ̆ gơnang kơ ha pran jua mơng mơnuih ƀôn sang hăng hơdôm bruă pơgăn klin khut khăt mơng gong gai, să ƀu hmâo čih pioh hlơi ƀă kơman klin, djă kơjăp tơlơi hơđong pơđĭ kyar bơwih ƀong mơnuih mơnam.

Anih anom dô̆ čơlah hơbit ƀơi Sang mă yua bơnư̆ drai ia Ea Rớt ataih mơng kual mơnuih ƀôn sang dô̆ samơ̆ tâ̆o klă biă. Anai lĕ anih dô̆ čơlah hăng hơdôm mơnuih mơng Čư̆ Elang glăi mơng hơdôm bôh tơring čar kual Dơnung dêh čar kiăng pơgang pơgăn klin Covid-19. Ngă tui bruă mă ƀơi anai, Kơ-iăng Khua Sang ia jrao să Čư̆ Elang amai Nguyễn Thị Yến brơi thâo, anih anom anai phrâo dưi mă yua ngă kual dô̆ čơlah mơng rơnuč blan 8. Hlâo kơ anun, să hmâo 2 kual dô̆ čơlah hơbit ƀơi Sang hră gưl 2 Phạm Hồng Thái hăng Sang hră gưl sa Nguyễn Thái Học. Hơdôm hrơi rơnuč blan 7/2021, wot dua anih anom anai ngă tui bruă dô̆ čơlah 208 čô mơnuih glăi mơng kual hmâo klin ngă. Dưi hmâo mơnuih ƀôn sang ƀơi anai hăng sa dua čô mơnuih thâo tơngia djru gơnam ƀong huă, djop mơnuih hơđong pran jua ngă tui klă bruă dô̆ čơlah hơbit 14 hrơi, tơdơi kơ anun glăi dô̆ čơlah ƀơi sang hmâo 14 hrơi dong. Rơnuč blan 8, kơnong kơ dô̆ rơbêh kơ 10 čô mơnuih khom dô̆ čơlah hơbit, dưi ba nao pơ̆ Sang mă yua bơnư̆ drai ia Ea Rớt, brơi glăi hơdôm bôh sang hră pioh agaih rơmet pơdjai kơman prăp lui kơ thun hrăm phrâo. Amai Nguyễn Thị Yến lăi pơthâo, gơnang kơ mơnuih ƀôn sang gum hrom khul apăn bruă ƀơi Čư̆ Elang hmâo pơgăn truh kih ƀu pioh klin Covid-19 mut amăng să:

“Să pok pơhai abih bang hơdôm grŭp pơgang klin Covid amăng plơi pla, bruă ia jrao ƀơi plơi pla, grŭp wai lăng mă pô… lom mơ̆ thâo mơnuih glăi mơng anih klin ngă, bơhmutu ñu kah hăng Vụ Bổn, Čư̆ Bông lĕ khom lăi pơthâo mơtăm, lăi hrom klă biă. Kah hăng tơlơi phrâo tôm adih anai, hmâo 2 čô mơnuih mơng Čư̆ Bông rai ƀong mơñum pơ̆ anai hă gơñu thâo mơtăm hăng hmâo ba nao pơ̆ kual dô̆ čơlah hơbit. Gơnong bruă ia jrao hmâo lăi pơhing na nao, bơ̆ mơnuih ƀôn sang ƀơi anai arăng thâo biă, biă ñu neh wa gơñu ngă tui klă biă, gơñu ƀu bĕ dŏp ôh”.

Mơnuih mơng hơdôm anih pơkon nao pơ̆ Čư̆ Elang leng kơ lăi pơthâo gah ia jrao

Djơ̆ kah hăng tơlơi Kơ-iăng Khua Sang ia jrao să Čư̆ Elang, tơlơi pơmin mơng mơnuih ƀôn sang hmâo djru laih să pơgăn klin ba glăi bôh tơhnal. Lom akă hmâo kual dô̆ čơlah hơbit. Lom hơdôm anih anom hơdư̆ nao rai, neh wa amăng să hiăp telephone pơsur ană bă pô anăm glăi ôh, ngă tui tơpă bruă dô̆ čơlah mơnuih mơnam kiăng huăi hmâo klin ruă. Ayong Vàng Seo Pao, ƀơi Kual dô̆ čơlah mrô 1 – hnoh ia Krông Pač gah hlâo ia, să Čư̆ Elang, brơi thâo:

“Tơdah glăi pơ̆ sang ăt khom dô̆ čơlah mơ̆, pơ̆ anun ăt glăi dô̆ čơlah mơn thơ, tui hăng dua rơkơi bơnai pơmin lĕ pơsur ană pô dô̆ pơ̆ anun hlao, tơdơi anai abih klin lĕ nao mă glăi bruă. Pơsur ană bă khom dô̆ pơ̆ anun ngă tui klă, ƀu dưi nao pơ̆ hơpă ôh”.

Tơlơi hơđong ƀơi kual dô̆ hơđong mrô 1 ƀơi Čư̆ Elang

 Tui hăng ơi Trần Văn Thanh, Khua Jơnum min mơnuih ƀôn sang să Čư̆ Elang, amăng mrô 11 bôh plơi mơng să, Kual dô̆ čơlah mrô 1 dô̆ tơnap tap hloh, yua kơ sa dua čô neh wa ăt glăk mơng kual hlung dơnao ia ƀơi să Čư̆ San (tơring glông Mdrak) glăi. Pơgang klin Covid-19, să hmâo iâu pơhrui hơdôm khul mơnuih ƀơi anai, pơdŏng 10 grŭp mơnuih pơplih nao rai djru mơnuih ƀôn sang pơdŏng sang, tui pran jua “Mơnuih nao hlâo djru mơnuih nao tơdơi”. Amăng đơ đam să, ngă tui bruă mơng mơnuih ƀôn sang gum hrom hăng hơdôm khul ơi nai ia jrao, tơhan plơi, kông ang să, wai lăng kơjăp mơnuih mut tơbiă, ngă tui tơpă bruă lăi pơthâo gah ia jrao. Tơlơi tŭ ư hrom mơng mơnuih ƀôn sang hmâo djru laih Čư̆ Elang pơgăn truh kih ƀu pioh klin Covid-19 lar tưp mut, khă amăng krak 3 bôh să hmâo klin lĕ să Vụ Bổn (tơring glông Krông Pač), să Čư̆ Pui (tơring glông Krông Bông) hăng să Čư̆ Bông (tơring glông Ea Kar). Ơi Trần Văn Thanh lăi rơđah hloh:

 “Kơnong ha mơguai hăng să Vụ Bổn lĕ ră anai ƀing gơmơi ăt glăk djă pioh mơn 4 anih dô̆ gak wai lăng, hmâo hơdôm khul grŭp wai lăng mă pô plơi, tơhan plơi hăng kông ang să, rơkâo kom khut khăt hơdôm bôh sang anô̆ amăng kual glăk ngă tui tơlơi črâo ba 16 lĕ ƀu dưi găn nao rai. Hăng kual giăm guai să Čư̆ Bông lĕ ƀing gơmơi hmâo hơdôm grŭp rô hyu. Đơ đam să hmâo 50 grŭp pơgang Covid plơi pla, rim grŭp gơgrong lăng tui mơng 30-50 bôh sang anô̆ mơnuih ƀôn sang tui hluai mrô mơnuih ƀôn sang rim plơi pla. Rơgao kơ thâo tơlơi mơng grŭp lăi pơthâo na nao amăng grŭp Zalo, bơhmutu ñu kah hăng hmâo hlơi khom dô̆ čơlah lĕ hơdôm grŭp leng kơ thâo sôh, grŭp wai lăng mă pô plơi pla thâo, tơdah thâo gơñu ƀu ngă tui ƀudah pơdah hơget thơ ƀing gơmơi brơi mơnuih nao pơsit mơtăm khă tơhrơi ƀudah amăng mlăm mơmot”.

Djơ̆ mơng lăi hă, hăng hơdôm bruă ngă tui khop mơng gong gai plơi pla, tơlơi tŭ ư hrom mơng neh wa djop djuai ania, să Čư̆ Elang, tơring glông Ea Kar, tơring čar Daklak glăk djă kơjăp hơđong pơgang “kual huăi hmâo klin” amăng krah jum dar kual klin Covid-19 ngă, djru mơnuih ƀôn sang hơđong pran jua, hơđong tơlơi hơdip mơda./.

Minh Huệ: Pô čih – Siu H’ Prăk: Pô pơblang