VOV4.Jarai-Ăt amăng hơdră mă bruă ƀơi mông jơnum lok 2, khua mua pơ ala mơnuih ƀôn sang dêh čar tal XV, mơguah hrơi anai, lơ 29/10, ƀing khua mua pơ ala bơkơtuai nao rai mơ̆ng ataih lăng nao rai amăng tivi kơ Kơčăo bruă tơlơi phiăn sĭ mơdrô hră pơhlôm nua čih pơkra glăi. Lu khua mua lăi lĕ, tơlơi phiăn anai pơblih čih pơkra glăi kiăng pơkă anŏ bơkơnar boh tŭ yua kơplah wah hơdôm bơnah sĭ hăng mă yua rơnoh prăk pơhlôm nua; pơhlôm nua bơkơnar, tơpă.

Tui hăng lu khua mua, boh tơhnal kiăng kơ bruă blơi hră pơhlôm nua lĕ pơsir brơi anŏ rơngiă rơngiom, pơsir tơlơi răm ƀăm yua kơ hơmâo tơlơi truh ƀu thâo hlâo. Yua kơ anun, hrom hăng bruă pơhlôm nua kiăng hơmâo hơdră pơgang ba boh tŭ yua kơ anom bruă sĭ mơdrô ăt pơgang ba anŏ tŭ yua kơ mơnuih blơi hră pơhlôm nua, Kơčăo bruă tơlơi phiăn sĭ mơdrô hră pơhlôm nua kiăng đing nao djơ̆ anŏ tŭ yua mơ̆ng mơnuih blơi hră pơhlôm nua, mơnuih tŭ mă tơlơi djru mơ̆ng hră pơhlôm nua…

Ƀing khua mua pơ ala mơnuih ƀôn sang dêh čar ăt rơkâo Kơnuk kơna sem glăi, jŭ yap, ngă djơ̆ anŏ kiăng mơ̆ng anih blơi hră pơhlôm nua, wơ̆t hăng pơhlôm nua tơl tha rơma, pơhlôm nua hăng pơhlôm nua glăi dơ̆ng. Ăt amăng hrơi anai, mơ̆n ƀing khua mua pơ ala mơnuih ƀôn sang bơkơtuai amăng grup kơ : Kơčăo bruă akŏ bruă man pơphô dăo glăi tơlơi bơwih ƀong huă mơ̆ng thun 2021-2025; Kơčăo bruă pơkă hnong mă yua lŏn tơnah dêh čar mơ̆ng thun 2021-2030, lăng nao truh pơ thun 2050 laih anun akŏ bruă mă yua lŏn tơnah 5 thun 2021-2025.       

Nay Jek: Pơblang