VOV4.Jarai -  Khua mir sir dêh čar ta ơi Nguyễn Xuân Phúc hmâo laih tơlơi pơhiăp amăng mông Bơkơtuai hrom Gưl dlông Tal jơnum 76 Khul apăn bruă Sang gum hơbit djop dêh čar hăng anăn ñu: “Gum hrom đăo gơnang hăng gơgrong pô – Anăp nao hơkrŭ glăi tơdơi kơ Covid-19, pơdŏng glăi kơjăp, pơgang bôh lŏn, pơtrut tơlơi dưi ană mơnuih hăng pơplih bruă Sang gum hơbit djop dêh čar”. Amăng tơlơi pơhiăp mơng pô Khua mir sir dêh čar ta Hmâo lăi hơdôm tơlơi rơngiă ƀu hmâo rơnoh pơkă amăng klin Covid-19 ngă, pơsit klin ruă lĕ bôh than kiăng pơtă kơ tơlơi răm rai kơtang tit mơng hơdôm tơlơi lông rơnuk rơnua akă ƀu hmâo mơng hlâo kah hăng klin ruă ƀudah tơlơi pơplih ayuh hyiăng tơdah ƀu dưi đing nao, pơsir mơng tañ, mơng ataih. Hăng bruă mă mơng Sang gum hơbit djop dêh čar, Khua mir sir dêh čar ta čang rơmang Khul anai pơsit dong bruă mă phun amăng glông lu bơnah, glăk git gai ba glăi bôh tơhnal hơdôm tơlơi gir run hrom bŏng glăi hăng hơdôm tơlơi lông đơ đam rŏng lŏn tơnah jai hrơi jai kiăng ječ mơ̆ ƀu djơ̆ ha jăn lŏn ia hơpă dưi pơsir mă pô ôh. Bruă mă kiăng ječ ba jơlan hlâo ră anai lĕ wai lăng klin ruă Covid-19 amăng đơ đam rŏng lŏn tơnah, biă ñu đing nao pơsir vaccine kơ mơnuih ƀôn sang hơdôm bôh dêh čar hmâo mrô tlâ̆o pơgang dô̆ ƀiă, ngă gal brơi kiăng hơdôm bôh dêh čar glăk pơđĭ kyar gum hrom pơkra hăng gum hrom hơdôm bruă pơlir hrom vaccine./.

Siu H’ Prăk: Pô pơblang