VOV4.Jarai - Tui tơlơi pơtrun pơsit 07/2021 mơng Kơnuk kơna pơkă djơ̆ rơnoh ƀun rin lăng mơng lu bơnah mơng thun 2021-2025, mơng thun 2022, pơhrui glăi hơnong ñu yŭ kơ 1 klăk 500 rơbâo prăk sa čô mơnuih sa blan kual plơi pla hăng yŭ kơ 2 klăk prăk sa čô mơnuih sa blan plơi prong amra dưi dăp gah sang anô̆ ƀun rin, ƀun rin ƀơ ƀiă. Amăng rơwang mơng thun 2022-2025, Việt Nam amra mă yua djơ̆ rơnoh ƀun rin lăng mơng lu bơnah phrâo hăng bruă pơđĭ rơnoh djơ̆ rơnoh ƀun rin gah prăk pơhrui glăi hăng pơsit dong rơnoh djơ̆ ƀun rin phrâo kơ bruă mă. Kiăo tui anun, rơnoh sang anô̆ ƀun rin, ƀun rin ƀơ ƀiă gah prăk pơhrui glăi amra mă tơhnal pơkă hrom 1.500.000 prăk sa čô mơnuih sa blan kual plơi pla phrâo hăng 2.000.000 prăk sa čô mơnuih sa blan kual plơi prong. Bruă pơplih pơkra anai amra pơtrut pơsur plơi pla đing nao tuh pơplai hrŏ trun ƀun rin kơ hơdôm bôh sang anô̆ mơnuih ƀôn sang ƀơi hơdôm bruă bơwih brơi dô̆ kơƀah hrom hăng prăk pơhrui glăi. Bruă đĭ tui tơhnal pơkă kơ rơnoh pơhrui glăi pơsit djơ̆ rơnoh ƀun rin phrâo hăng hơdôm bơnah bơwih brơi mơnuih mơnam amra ngă đĭ mrô sang anô̆ ƀun rin, ƀun rin ƀơ ƀiă. Khă hnun hai, hơdră bruă djru gum amra gôm abih hăng djru sit nik hloh truh sang anô̆ ƀun rin, ƀun rin ƀơ ƀiă amăng rơwang mơng thun 2022-2025./.

Siu H’ Prăk: Pơblang