VOV4.Jarai - Văn Lem, Đăk Tô lĕ să amăng hơdôm kual tơnap tap hloh amăng tơring čar Kontum, đơ đam să hơmâo giăm 2.900 čô mơnuih, mơnuih djuai anai ƀiă giăm 98%. Ngă tui bruă ngă giang mah tui tơlơi pơsit mrô 04 amăng Ping gah tơring čar Kontum, 5 thun laih rơgao, hrŏm hăng bruă gum djru să ngă giang mah amăng bruă wai pơgang glai rưng, Keh prăk wai pơgang hăng pơđĭ kyar glai rưng tơring čar Kontum ăt gum hrŏm kjăp hăng Ping gah, gong gai hăng djop khul grup amăng să ngă gêh gal amăng pơplih phrâo kiăng pơđĭ kyar amăng bơwih ƀong huă- mơnuih mơnam, pơhlôm rơnuk rơnua hăng pơplih tơlơi hơdip kơ mơnuih ƀon sang.

Dua rơkơi bơnai sang anŏ ayong A Vinh hăng amai Y Vân dŏ ƀơi plơi Đăk Xanh, să Văn Lem, tơring glông Đak Tô hơmâo truh 8 čô ană. Yua kơ ană bă lu đơi laih dong prăk pơhrui kơnong gơnang nao hmua pla plum, ngă pơdai yua anun sang anŏ rin rơpa na nao. Thun  2018 lĕ sa amăng 5 boh sang anŏ hơmâo keh prăk wai pơgang hăng pơđĭ kyar glai rưng tơring čar Kontum ruah kiăng pơjing hơbô̆ bruă “Gum djru, pơtô brơi hơdôm sang anŏ rông un klĭ breng brong pioh tuh hrôh” pơđĭ kyar bơwih ƀong huă. Hơmâo keh prăk djru brơi 2 drơi un ania, 1 drơi un rơnô laih dong pơtô brơi boh thâo rông hlô, djru blơi čuah pơtâo man pơkra drông war, blơi gơnam ƀong, truh ră anai un sang anŏ ayong A Vinh amăng drông lêng kơ hơmâo hơdôm pluh drơi un. Ră anai un lĕ gơnam sĭ pơhrui phun amăng sang anŏ. Glăk brơi un ƀong, ayong A Vinh hok mơ-ak brơi thâo, bruă rông un mơng sang anŏ ñu.

“Hlâo anun aka ƀu hơmâo kuăt pơsơi păng jum dar khŏm nao koh krăm, ale ba glăi ngă drông war. Blung hlâo brơi un ƀong hơbơi plum hăng tuk brơi bua laih dong brơi ƀong kam, asơi. Sui sui sĭ ăt djop prăk blơi ngok hra mơn”.

Mơng hrơi hơmâo hơbô̆ bruă mơng Keh prăk wai pơgang hăng pơđĭ kyar glai rưng tơring čar Kontum ƀơi să ngă giang mah Văn Lem, anun lĕ “ Hrăm hăng ngă tui gru, tơlơi hơdip hiam mơng Hồ Chí Minh”, “Gum djru, črâo brơi hơdôm sang anŏ thâo rông un klĭ breng brong pioh tuh hrôh”, “Pơtô brơi, djru boh thâo pla pơjing phun kơphê”..v.v…hơmâo djru brơi mơnuih ƀon sang amăng să pơphun tơlơi pơmĭn, bruă mă hrưn đĭ pơklaih mơng ƀun rin. Truh ră anai hơdôm hơbô̆ bruă yua keh prăk pơjing hơmâo lar hyu djop plơi pla, hơmâo lu sang anŏ hrăm, ngă tui. Hơmâo lu sang anŏ hlâo adih arăng čih anăn lĕ “sang anŏ ƀun rin hloh”, ră anai hơmâo lu yơh prăk pơhrui kiăng pơklaih mơng ƀun rin. Ơi A Hùng, Khua Jơnum min mơnuih ƀon sang să Văn Lem brơi thâo:

Amăng thun blan laih rơgao Keh prăk pơgang hăng pơđĭ kyar glai rưng hơmâo gum hrŏm kjăp hăng gong gai ƀon lan amăng bruă wai pơgang glai rưng kah hăng hơmâo tơlơi đing nao, gum djru neh met wa amăng să Vă Lem kiăng pơđĭ kyar bơwih ƀong huă mơnuih mơnam. Keh prăk pơgang hăng pơđĭ kyar glai rưng djru brơi neh met wa pơklaih mơng ƀun run kah hăng hơđong tơlơi hơdip mơda. Keh prăk pơgang hăng pơđĭ kyar glai rưng Kontum djru brơi plơi pla amăng pơhrŏ trun ƀun rin kah hăng djru tơlơi hơdip ană plơi pla.

Tui hăng jŭ yap mơng Keh prăk pơgang hăng pơđĭ kyar glai rưng tơring čar Kontum brơi ƀuh amăng 5 thun ngă tui bruă pơlir hơbit, pơjing tơlơi hơdip amăng să tơnap tap Văn Lem, Keh prăk hơmâo ngă klă amăng bruă djru ană plơi pla hăng mrô prăk djru hơdôm rơtuh klăk prăk. Lu hloh lĕ hơdôm bruă mă yua Anom bruă ding kơna mơng Keh prăk pơphun, anun lĕ hơdor tơngia, bơwih brơi tơlơi hơdip kơ mơnuih ƀun rin, čơđai anet, čơđai sang hră tơnap tap; hơdôm thun djru brơi să pơphun hrơi tuh ƀañ tek … Lăi nao kơ bruă ngă giang mah, pơjing să Văn Lem mơng Keh prăk pơgang hăng pơđĭ kyar glai rưng tơring čar Kontum, ơi Lê Trọng Thọ, Khua apăn bruă Ping gah să, brơi thâo:

“Keh prăk pơgang hăng pơđĭ kyar glai rưng hơmâo đing nao gum djru na nao brơi Ping gah să Văn Lem pơphun, pok pơhai hơdôm bruă jao amăng pơđĭ kyar bơwih ƀong huă, mơnuih mơnam, pơhlôm wai pơgang rơnuk rơnua kah hăng pơjing anih anom kơđi čar amăng să. Keh prăk juăt đing nao mơtăm mơng akŏ thun gum hrŏm hăng să pơjing akŏ bruă brơi lăp djơ̆ hăng tơlơi sit nik amăng rĭm plơi pla. Tui tơđar rĭm blan, rĭm rơwang pơpha mơnuih mă bruă nao gum hrŏm kiăng kơ lăng glăi boh than dưi ngă lơ̆m pok pơhai ngă tui hơdôm bruă jao. Amăng thun blan pok pơhai hơmâo hơdôm tơlơi ngă tơnap tap, gun găn, hơmâo anom bruă djru pơsir hĭ ƀudah lăi pơthâo brơi djop gưl, anom bruă bơdjơ̆ nao”.

Tơdơi kơ 5 thun ngă giang mah, čung tơngan hrŏm hăng Ping gah, gong gai, djop khul grup hăng mơnuih ƀon sang să Văn Lem, Keh prăk pơgang hăng pơđĭ kyar glai rưng tơring čar Kontum hơmâo hơdôm tơlơi gum pơgôp yôm phăn amăng bruă pơđĭ kyar hrŏm amăng să. Mơng sa boh să tơnap tap hloh, mrô mơnuih djuai ania ƀiă giăm 98%, truh ră anai să Văn Lem hơmâo pơhrŏ trun mrô sang anŏ ƀun rin dŏ 19,57%. Să ăt dưi ngă 14/19 hơnong pơkă amăng man pơdong plơi pla phrâo.

Siu Đoan: Pơblang