VOV4.Jarai-Ƀơi anăp tơlơi pơhing klin Covid 19 tơnap tap, lu čơđai muai khom dŏ pơčlah, krăo lăng, pơjrao ruă ƀă klin Covid 19 ƀudah hơmâo jĕ giăm hăng ƀing ƀă Covid 19. Tui hăng anun, Ding jum ia jrao brơi mơnuih wai lăng, djru ba nao hrom čơđai truh pơ anih pơjrao Covid 19, anih tŭ jum pơtum pơjrao mơnuih djơ̆ kman Covid 19/ anih dŏ pơčlah lu mơnuih ƀudah dưi dŏ hrom čơđai muai pơčlah pơ sang anŏ samơ̆ khom ƀuăn rong dŏ pơčlah hơjăn hăng čơđai muai, kiăng ngă djơ̆ tum teč tơlơi pơtrun pơhlôm, pơgang klin Covid 19.

Hăng hơdôm ƀing wai lăng čơđai ƀu dưi nao hrom, dŏ hrom čem rông čơđai lĕ khua mua gong gai kơnuk kơna plơi pla brơi mơnuih thâo kơ bruă wai lăng, čem rông ba čơđai muai pơ anih dŏ pơčlah, ƀing nai ia jrao hơmâo tơlơi thâo djop amăng bruă wai lăng čem rông ba čơđai. Čơđai gah yŭ 16 thun lĕ mơnuih Việt Nam, hơmâo jĕ giăm hăng mơnuih ƀă kman Covid 19, brơi dŏ pơčlah pơ sang anŏ 14 hrơi yap mơ̆ng hrơi bưp djơ̆ mơnuih ƀă klin ƀudah mơnuih arăng đing đăo ƀă klin tal rơnuč giong anun dŏ pơčlah dơ̆ng 14 hrơi pioh krăo lăng tơlơi suaih pral drơi jăn ñu.

Nay Jek: Pơblang