VOV4.Jarai -  Phrâo anai, Jơnum min apăn bruă Khua pơ ala mơnuih ƀôn sang dêh čar ta hmâo mă yua Tơlơi pơtrun pơsit 268 kơ bruă brơi Kơnuk kơna mă yua Tơlơi pơtrun pơsit hmâo sa dua bôh yôm pha ra hăng tơlơi pơkă mơng tơlơi phiăn kiăng djơ̆ hăng tơlơi kiăng pơgang, pơgăn klin Covid-19. Kiăo tui anun, Kơnuk kơna dưi ngă tui 4 bôh yôm pơkon pơkă mơng tơlơi phiăn mă yua ră anai. Anai lĕ Tơlơi pơtrun pơsit kiăng biă hăng ječ dong amăng mông klin Covid-19 ngă jai hrơi jai tơnap, ƀu thâo him lăng ƀơi lu tơring čar, ƀôn prong gah Dơnung dêh čar.

Kiăo tui anun, Jơnum min apăn bruă Khua pơ ala mơnuih ƀôn sang dêh čar ta tŭ ư hăng Tơlơi pơtrun pơsit mơng Kơnuk kơna kiăng ngă tui hơdôm jơlan gah kiăng ječ pơgang, pơgăn klin Covid-19. Rơđah biă ñu, Kơnuk kơna brơi pơsit pơdŏng anih anom tŭ mă, pơjrao mơnuih ƀă kơman Covid-19 hrom hăng anun lĕ hră pơ-ar mă bruă. Jao Ding jum ia jrao pơkă hơdôm hră pơ-ar amăng hră lăi pơhing tui hơdră ngă rơguăt kiăng djơ̆ hăng tơlơi kiăng ječ mơng bruă pơgang, pơgăn klin. Khul pơ ala mơnuih ƀôn sang dưi jao pơsit hơdôm tơlơi gah pô dưi mơng Khul pơ ala mơnuih ƀôn sang hăng lăi pơthâo glăi Khul pơ ala mơnuih ƀôn sang amăng tal jơnum jê̆ hăng anai hloh. Hăng rơkâo pơkă bruă pơsir prăk pel ĕp, pơjrao tơlơi ruă kơ mơnuih ruă Covid-19 ƀơi hơdôm anih anom tŭ mă, pơjrao mơnuih djơ̆ Covid-19 yua kơ ngăn drăp kơnuk kơna pơhlôm tui prăk hmâo sit, Kơnuk kơna črâo ba ngă tui jơlan gah ngăn drăp kơnuk kơna hmâo bruă gơgrong pơsir abih bang prăk pel ĕp, pơjrao brơi kơ mơnuih ruă klin bơdjơ̆ nao ƀơi anăp nao pơjrao ruă klin Covid-19. Ơi Đỗ Đức Duy, Grŭp Khua pơ ala mơnuih ƀôn sang tơring čar Yên Bái lăi lĕ, bruă mă yua Tơlơi pơtrun pơsit 268 hmao tlôn pơplih phrâo hơdôm bruă dưi jao amăng tơlơi pơtrun pơsit mơng Khua pơ ala mơnuih ƀôn sang kơ pơgang, pơgăn klin, ba tơlơi pơsit amăng tơlơi hơdip mơda:

“Tơlơi anai hmâo pơdah tơlơi gum hrom mơng Khua pơ ala mơnuih ƀôn sang hăng Kơnuk kơna ăt kah hăng tơlơi thâo hluh hăng lăi pơthâo mơng Khua pơ ala mơnuih ƀôn sang hrom hăng Kơnuk kơna, hăng mơnuih ƀôn sang đơ đam dêh čar. Ƀing gơmơi pơsit yôm tơlơi git gai gơgrong hlâo, hơdeč hmar mơng Khua git gai wai lăng pơ ala mơnuih ƀôn sang hăng Khua git gai bruă Khua pơ ala mơnuih ƀôn sang, djơ̆ hăng bôh nik mơng klin ruă Covid-19”.

Khua git gai wai lăng pơ ala mơnuih ƀôn sang dêh čar ơi Vương Đình Huệ

Klin Covid-19 hăng hơdôm tơlơi pơplih tơnap him lăng, hmâo ba tơbiă hơdôm tơlơi pơmin phrâo amăng pơsir mơnuih mă bruă, bruă mă, hơđong tơlơi hơdip mơda mơnuih mơnam. Kiăng yak rơgao hơdôm tơlơi tơnap mơng klin ruă, kiăng hmâo hơdôm hơdră bruă hmao tlôn, djơ̆ jơlan gah, phun than samơ̆ ăt kiăng hmâo tơlơi gir run, gơgrong hlâo, pơplih tañ, gơgrong mơng abih bang glông bruă kơđi čar kiăng hơdôm hơdră bruă djru gum mơng kơnuk kơna tañ truh hăng mơnuih ƀôn sang. Mơnuih ƀôn sang hăng mơnuih ƀôn lan đơ đam dêh čar tŭ ư hrom hăng pơsit yôm Jơnum min apăn bruă Khua pơ ala mơnuih ƀôn sang dêh čar ta hmao tlôn pel ĕp tơlơi pơtrun pơsit 268. Yă Nguyễn Thị Hoài Linh – mơnuih ƀôn sang ƀơi Hà Nội pơdah pran jua:

“Tơlơi anai brơi ƀuh Khua pơ ala mơnuih ƀôn sang lăng tơlơi hơdip, tơlơi suaih pral mơng mơnuih ƀôn sang đing nao hlâo, pơhlôm hơđong tơlơi hơdip mơda mơnuih mơnam, bơwih brơi tơlơi suaih pral hăng tơlơi hơdip mơnuih ƀôn sang. Ƀing gơmơi ƀuh hơđong pran jua hăng đăo gơnang kơ hơdră pơtrun, jơlan gah mơng Khua pơ ala mơnuih ƀôn sang hăng Kơnuk kơna amăng bruă git gai pơgang pơgăn klin Covid-19 ră anai”.

Tui hăng ơi Trịnh Xuân An, Khua pơ ala mơnuih ƀôn sang tơring čar Đồng Nai, bruă Jơnum min apăn bruă Khua pơ ala mơnuih ƀôn sang dêh čar ta hmao tlôn mă yua tơlơi pơtrun pơsit 268 pơkă rơđah sa dua bôh yôm pơkon hăng tơlơi pơkă mơng tơlơi phiăn mă yua ră anai hmao pơtlaih tơlơi gun kơ hơdră pơkă tơlơi phiăn kiăng bŏng glăi tŭ yua hăng tơlơi klin ruă.

“Pơgang, pơgăn klin ruă kiăng hmâo hơdôm tơlơi pơsit pơplih tañ, hmao tlôn, ngă tui khop hăng pơdah bruă gơgrong ƀơi anăp mơnuih ƀôn sang. Anai lĕ hơdră pơsit djơ̆ wot bruă kơđi čar hăng tơlơi phiăn, dưi hmâo mơnuih ƀôn sang hăng ƀing khua pơ ala mơnuih ƀôn sang pơsit yôm; pơdah tơlơi pơplih tañ, gơgrong, gum hrom mơng Khua pơ ala mơnuih ƀôn sang hăng Kơnuk kơna amăng bruă pơgang, pơgăn klin ruă. Tơhnal pơkă anun lĕ abih bang yua kơ bôh tŭ yua mơng mơnuih ƀôn sang, abih bang yua kơ tơlơi pơhlôm hăng pơđĭ kyar lŏn ia”.

Bơ̆ yă Nguyễn Thanh Hải – Khua pơ ala mơnuih ƀôn sang tơring čar Thái Nguyên lĕ lăi tui anai, bruă tơlơi pơtrun pơsit mơng Jơnum min apăn bruă Khua pơ ala mơnuih ƀôn sang dêh čar ta pơkă Khul pơ ala mơnuih ƀôn sang dưi jao pơsit hơdôm tơlơi gah pô dưi mơng Khul pơ ala mơnuih ƀôn sang hăng lăi pơthâo glăi Khul pơ ala mơnuih ƀôn sang amăng tal jơnum jê̆ hăng anai pơhlôm djơ̆ hăng tơlơi hmâo lu anih anom glăk ngă tui hơdôm bruă pơgang pơgăn khut khăt kah hăng hơdư̆ tum pơƀut lu mơnuih, ngă tui dô̆ čơlah mơnuih mơnam.

“Ƀing gơmơi ăt amra hluai tui anun mơn kiăng pơdŏng hơdôm jơlan hơdră rơđah hloh kơ plơi pla ƀing gơmơi, kiăng pơjing rai hơdôm hơdră pơkă hruaih hloh dưi ngă amăng hơdôm tơlơi pơkă amăng tơlơi phiăn kah hăng Tơlơi phiăn pơgang, pơgăn klin ruă ră anai akă pơkă brơi hơdôm gơnam mă yua gah ia jrao amăng pơgang, pơgăn klin ruă hiưm ñu, kiăng ngă hiưm hơpă pơgang pơgăn klin klă hloh, ba glăi bôh tơhnal hloh hăng hrŏ trun ƀiă hloh hơdôm hră pơ-ar samơ̆ ăt huăi ngă soh hơdôm tơlơi pơkă mơn hơdôm tơlơi pơkă mơng tơlơi phiăn”.

Yă Nguyễn Thanh Hải, khua pơ ala mơnuih ƀôh sang tơring čar Thái Nguyên    

Sa amăng hơdôm tơlơi lăp đing nao lĕ Khua pơ ala mơnuih ƀôn sang jao hơdră pơkă kơ Kơnuk kơna, Khua dêh čar pơsit hăng pơphun ngă tui hơdôm bruă akă dưi hmâo tơlơi phiăn pơkă ƀudah pha ra hăng tơlơi pơkă amăng hơdôm tơlơi phiăn, phiăn pơtrun mă yua ră anai kiăng djơ̆ hăng tơlơi ječ mơng bruă pơgang, pơgăn klin Covid-19./.

Siu H’ Prăk: Pô pơblang