VOV4.Jarai-Amăng tal hơđuh glăi klin Covid 19 tal 4 anai, Dak Lak hơmâo čih pioh rơbêh 1.300 čô mơnuih ƀă Covid 19, jing tơring čar hơmâo mrô ƀă klin lu hloh amăng kual Dap Kơdư. Mrô mơnuih ƀă klin lu, hmar, ngă tơnap kơ anom bruă ia jrao jai hrơi kơtang, rĭm čô mơnuih ngă bruă gah ia jrao, ơi ia jrao, nai ia jrao khom ngă bruă hŭi rơhyưt laih anun gleh glar phara soh. Samơ̆ ngă bruă pơpă hai, gơñu ăt pơyơr abih pran jua kah hăng pơkơtưn hăng hrơi mông mơtam kiăng puh đuăi klin duăm ruă. Lu mơnuih lui hĭ bruă sang anŏ pioh ngă giong bruă jao kơ pô hăng mơnuih ƀôn sang.

Ƀơi anih dŏ pơčlah pơtô hrăm gah bruă ling tơhan Sang hră gưl prong Đại học Tây Nguyên, sa boh kơƀang ngă yang ƀudah tơrưng ngă yang arăng pơdong đĭ pioh kơ amai Trần Thị Hương thun tơkeng 1983 mơnuih mă bruă ngă nai ia jrao sang ia jrao prong pơjrao hăng jrao akha kyâo Dak Lak dŏ mă bruă pơ anun, čuh ñang h’ŭ kơ ama ñu rơngiă lơ̆m lơ 1/9. Ia mơta bơbrĭ lơ̆m ñu čuh ñang h’ŭ bơngăt atâo ama ñu mơ̆ng ataih; Rup rap arăng mơ-it pơ plơi pla ñu Nam Định pơyua atâo ama ñu djai, kơnong ĕp lăng amăng Zalo ƀuh amăng măi telephôn.

Mơ̆ng anih dŏ pơčlah pơtum, amai Trần Thị Hương tŭi ñang h’ŭ kơ ama ñu phrâo rơngiă

Amai Hương čang rơmang lăi lĕ, klin covid 19 tơdah abih tañ ñu amra glăi pơ plơi pla čuh ñang h’ŭ kơ ama ƀơi pơsat:

“Bơyan pơdơi prong phrâo anai kâo pơmin ba ană bă glăi čuă ơi yă ñu yua kơ ama tha laih, samơ̆ klin kheng anai ƀu dưi glăi ôh, ră anai ñu đuăi nao yơh hmar đơi ƀu thâo hlâo anun yơh tơlơi ƀuăn hlong ƀu dưi ngă tui mơtam. Čang rơmang abih bang mơnuih gum tơngan hrom pioh puh đuăi klin duăm ruă đah mơ̆ng dưi glăi pơ plơi pla čuh ñăng h’ŭ kơ ama”.

15 thun dŏ mă bruă pơ anom pơčrang kman–ĕp lăng rup tơlơi ruă, pơjrao rŭ glăi drơi jăn mơ̆ng sang bruă Pel ĕp duăm ruă tơring čar Dak Lak, amai Nguyễn Thị Kim Tuyền bong ƀơi anăp lu tơlơi duăm ruă ƀă kơ ană mơnuih. Samơ̆ tơl ngă ding kơna grup mrô 3 tui kru mơnuih ƀă, jing ƀing tơhan mă bruă phun kơsung nao pơ anăp pơgang klin Covid 19, ñu mơ̆ng thâo hluh abih tơlơi tơnap tap, hŭi rơhyưt hăng tơlơi pơsăn drơi jăn pô amăng bruă mă.

Nguyễn Thị Kim Tuyền hlăk mă ia khak ĕp kman mơ̆ng F1 ƀơi tơring glông Krông Ana

Amai Tuyền brơi thâo, rơbêh 3 blan rơgao, lơ̆m klin Covid 19 ƀơi Dak Lak ƀă kơtang, ƀu tơguan hrơi hăng mlam ôh, pơpă hơmâo mơnuih ƀă klin duăm ruă lĕ grup gơñu buh sum ao hrôm drơi jăn sir krep, samơ̆ pơtong laih kơ bruă mă drah pơčrang kman lĕ yôm biă mă kơ bruă pơgang klin, anun yơh khom mơneč mă rĭm mơnit, rĭm mông, ngă giong sa črăn bruă jao tañ hloh. Tơlơi hơdip sang anŏ, sa čô bơnai, sa čô amĭ amăng sang anŏ lui pơ klôn soh yơh:

“Hrơi mông mă bruă hăt biă mă ƀơi anŏ mơguah, ƀơi anŏ krah mlam, mơnŭ tơdjô̆. Sit ngă giong abih bruă kah dưi ƀong huă, ƀơi anŏ truh 1-2 mông mlăm mơguah sing bring kah hăng hơmâo ƀong hơmâo huă, ƀong huă mă jăng jai mơ̆n. Truh mơguah tơdơi ƀu hơmâo mông tơnă hơbai mơnong ƀong huă dơ̆ng tah khom djă sa ƀĕ ƀañ tơpung ƀudah sa gêt ia ƀong rah, mơñum ia rah. Ră anai, hơmâo Zalo, ta iâu nao rai, ta dưi ƀuh ƀô̆ mơta lăng ană bă dŏ pơ sang mơ̆ng ataih đôč. Kiăng pơgang ba kơ ană bă, ană rơkơi ta khom ngă tui anun yơh, hiư̆m mơ̆ng ngă yua kơ bruă jao laih”.

Dơ̆ng mơ̆ng lơ 15/8, lơ̆m anom bruă pơjrao mơnuih duăm ruă ƀă kman mơ̆ng sang ia jrao prong kual Dap Kơdư bơblih jing anih pơjrao kơ ƀing duăm ruă ƀă kman Covid 19 kraih amăng kual Dap Kơdư, 21 čô mơnuih mă bruă hơmâo ƀing ơi ia jrao, nai ia jrao, ƀing djru bruă pơjrao hăng ƀing thâo yua măi mok pơjrao khom mă bruă lu hloh hrơi mông tơđar, kiăng djru kơ ƀing mơnuih duăm ruă dưi sua glăi tơlơi hơdip.

Ƀing ơi ia jrao, nai ia jrao ƀơi anih pơjrao kơ mơnuih ruă Covid 19 kraih hlăk gir sua glăi tơlơi hơdip kơ ƀing duăm ruă

Ơi ia jrao kơhnâo kơhnăk chuyên khoa II, Trịnh Hồng Nhựt, Khua anom pơjrao mơnuih kraih suaih tui pơgang măt jrao, pô wai lăng anih pơjrao mơnuih ruă Covid 19 kơtang sang ia jrao prong kual Dap Kơdư brơi thâo hơdôm mơnuih ruă ba nao pơ anun lêng kơ ƀing hơmâo tơlơi hơđăp soh anun yơh amuñ biă djai. Guai tơlơi hơdip hăng djai rơpih biă mă, ƀing nai ia jrao, ơi ia jrao amăng anih pơjrao Covid 19 kơtang ăt gir run rĭm mơnit, rĭm mông kiăng gir run pơkơdong glăi hăng tơlơi ruă, kiăng dưi hĭ blah ngă hăng kman duăm ruă anai:

“Ƀing gơmơi hơduah ĕp jơlan hơdră wơ̆t tơlơi hơdip gơmơi pô, tơlơi thâo thăi, pran jua mơ̆ng ơi ia jrao pioh sua mă rĭm mơnit rĭm mông hăng rĭm tơnit dơ̆ng sua mă tơlơi hơdip mơnuih ruă ƀơi anăp kơ jơlah đao yang djai iâu ba”.

Tơlơi blah ngă pơkơdong glăi hăng klin Covid 19 dŏ sui đôč hăng lu tơlơi lông lăng  tơpoh  thô, črong hơda pơ anăp, ƀing tơhan djop anom bruă dŏ mă bruă pơ anăp pơgang klin ƀơi Dak Lak ăt pơđĭ tui tơlơi pơmin, pran jua khin hơtai, hrơi mlam tui kru, ĕp mơnuih ƀă, pơgang ba, pơjrao djă pioh tơlơi hơdip kơ mơnuih duăm ruă ƀă klin laih anun pơgang tơlơi suaih pral kơ ană plơi pla. Gơñu jing mơnuih khin hơtai kret kruai mă bruă amăng anih kah hăng tơdron blah ƀu hơmâo dơnai phao kơtuang ôh.

            Nam Trang pô čih: Nay Jek: Pơblang