Mông anun ăt ƀlĕ ia mơta mơn, lơm ơi ia jrao Khải lăi lĕ no tơbiă rai yơh, ană ih tơbiă rai laih, kâo brĭ ƀlĕ ia mơta, hok mơ-ak biă mă. Amăng pran jua yâo mơ-ak biă mă, lăng kar hăng dŏ hlăk ai mơn.

Anai lĕ tơlơi bơră ruai glăi mơng amai Nguyễn Thị Thu Dền, dŏ ƀơi Buôn Trấp, tơring glông Krông Ana, tơring čar Dak Lak lơm tal blung a bưp ană nge amăng anih breh. Amai Dền brơi thâo, dua rơkơi bơnai ñu kaih ƀă ană rơbêh 5 thun laih, ăt juăt nao khăm pơ hơdôm boh sang ia jrao ƀơi ƀôn prong Hồ Chí Minh samơ̆ lêng ƀu ba glăi boh tŭ yua. Găn rơgao 5 thun ĕp ană, dua rơkơi bơnah ñu bưp lu tơlơi glêh tơnap amăng pran jua hăng prăk kak. Thun 2023, lơm thâo jơlan hơdră “Ba glăi tơlơi yâo mơ-ak” mơng sang ia jrao sang hră gưl prong Y Dược Buôn Ma Thuột, dua rơkơi bơnai amai Thu tui nao ĕp lăng. Hăng bưng băi dua rơkơi bơnai ñu ăt tơphă lơm hră pơ-ar hơmâo tŭ yap. Găn rơgao 2 wŏt pơkra lăng ñu dưi pi kian ană tơcoa.

Ăt kar hăng amai Dền, dua rơkơi bơnai amai Nông Thị Thu, dŏ amăng ƀut plơi 6a, să Ea Wy, tơring glông Ea H’leo, tơring čar Dak Lak ăt nao ĕp lăng tui jơlan hơdră anai. Amai Thu brơi thâo, găn rơgao 11 thun dua rơkơi bơnai ñu đuăi hyu djop anih kiăng kơ hơmâo ană. Thun blan anai, ñu hơmâo 1 wŏt arăng hrĭp mă, 3 wŏt plĕ ană, 1 wŏt breh poluyp amăng hlung pruăi. Ñu pơmĭn amra lui hĭ yơh yua ƀu hơmâo prăk kak hăng glêh glar đơi yơh, samơ̆ tơlơi yâo mơ-ak tô̆ tơnô̆ lơm ñu pi kian mơng jơlan hơdră “Ba glăi tơlơi yâo mơ-ak” mơng sang ia jrao Sang hră gưl prong Y Dược Buôn Ma Thuột thun 2023. Găn rơgao 9 blan pi kian, amai Thu ăt bưp lu tơlơi ngă bơngŏt yua amăng kian pruăi kơƀah ia rông ană nge, ană amăng kian pruăi anet, mơañă ƀlĕ ia sik lơm pi kian, hăng tơlơi hŭi rơhyưt bơdjơ̆ nao amĭ hăng ană dong. Amai Thu ol kơdol brơi thâo:

“Kâo pơmĭn amra ƀu dưi ôh, yua hơdôm wŏt ba nao lu anih samơ̆ lêng kơ plĕ ană soh, bưng băi tal anai dưi laih. Lơm tơkeng ană giong kar hăng glăk poi mơn, ăt ƀu pơmĭn amra pi ană nge ƀơi tơngan.”

Jing mơnuih djru brơi ƀing rơkơi bơnai kaih ƀă ană amăng jơlan hơdră “Ba glăi tơlơi yâo mơ-ak”, Ơi ia jrao Lê Huy Khải, Khua anom bruă djru tơkeng ană IVFMD Buôn Ma Thuột, Sang ia jrao sang hră gưl prong Y Dược Buôn Ma Thuột brơi thâo, ƀing mơnuih kaih ƀă ană tui rai, lu hloh lĕ ƀu thâo ngă hơget dong tah yua nao pơjrao lu anih laih mơ̆ ƀu ba glăi tŭ yua. Yua anun, rơngiao kơ bruă pơjrao brơi, ƀing ơi ia jrao ăt juh alum pran jua kiăng ƀing gơñu hơđong amăng pran jua, đăo gơnang, kiăng ba glăi tŭ yua hloh.

“Ăt pơ-ư ang hăng jing bưng băi lơm ƀing gơmơi ƀuh boh tŭ yua mơ̆ ƀing gơmơi hăng ƀing kaih ƀă ană gum hrŏm kiăng kơ dưi. Kâo čang rơmang amra tŏ tui ngă hiưm pă kiăng gum hrŏm hăng ƀing kaih ƀă ană pơkŏn kiăng ƀing gơñu hơmâo tơlơi dưi kar hăng anai mơn.”

“Ba glăi tơlơi yâo mơ-ak” lĕ jơlan hơdră pơdjuai amăng đing soh sel mơng IVFMD brơi ƀing rơkơi bơnai kaih ƀă ană, lơm ƀing gơñu rơkâo pơdjuai amăng đing samơ̆ yua sang anŏ tơnap tap mơ̆ aka ƀu dưi ngă. Jơlan hơdră hơmâo pơphun mơng thun 2014 hăng hơmâo gum hrŏm hăng giăm 600 čô rơkơi bơnai kaih ƀă ană mơ̆ sang anŏ tơnap tap. Sit nik mut hrŏm amăng jơlan hơdră anai dong mơng thun 2023, sang ia jrao sang hră gưl prong Y Dược Buôn Ma Thuột hơmâo djru brơi 6 čô rơkơi bơnai, amăng anun hơmâo 3 čô rơkơi bơnai dưi tơkeng ană suaih pral. Abih tih prăk djru amăng jơlan hơdră lĕ rơbêh 1,1 klai prăk. Ơi ia jrao Võ Minh Thành, Khua sang ia jrao sang hră gưl prong Y Dược Buôn Ma Thuột brơi thâo, sang ia jrao sang hră gưl prong Y Dược Buôn Thuột ăt glăk tŭ mă hră pơ-ar brơi Jơlan hơdră “Ba glăi tơlơi yâo mơ-ak” thun 2024. Thun anai, sang ia jrao amra djru brơi 10 čô rơkơi bơnai kaih ƀă ană sang anŏ tơnap tap ƀơi kual Dap kơdư:

“Jơlan hơdră anai ba glăi tơlơi yôm kơ ană mơnuih hăng lăp djơ̆ hăng jơlan gah bruă mă mơng Sang ia jrao yua anun ƀing gơmơi amra tŏ tui gum hrŏm hăng gir run ngă hiưm pă brơi kơ klă hloh kiăng mơnuih ƀôn sang dưi tŭ mă tơlơi dưi mơng boh thâo phrâo kah hăng djru pơjrao brơi soh sel.”

Hơdôm rơnoh djru sit nik mơng Jơlan hơdră “Ba glăi tơlơi yâo mơ-ak” mơng sang ia jrao sang hră gưl prong Y Dược Buôn Ma Thuột djơ̆ hăng tơlơi čang rơmang kơ sang boh sang anŏ yâo mơ-ak mơng hơdôm boh sang anŏ kaih ƀă ană mơ̆ sang anŏ tơnap tap ƀơi kual Dap kơdư. Pơgôp pơtrut pran đăo gơnang, pơtrut ƀing rơkơi bơnai kaih ƀă ană dưi hơmâo ană tui tơlơi čang rơmang mơng ƀing gơñu./.