Ƀơi anih pơkă tơlơi ruă mrô 02, ơi ia jrao Võ Hồng Khắc, Anih pơjrao Vật lý trị liệu Phục hồi chức năng (hơdui ƀư̆ arăt, pơtŏp añrăng drơi jăn), Sang ia jrao pơjrao mơnuih hưt huing yang ngă tơring čar Dak Lăk (phường Thành Nhất, tơring čar Dak Lăk), nao pơkă tơlơi ruă, pơtô brơi laih anun čih hră ia jrao kơ mơnuih ruă. Ơi ia jrao Khắc brơi thâo, pơjrao mơnuih hưt ƀu kơnong kiăo tui hơdră pơjrao ôh, ta khŏm kiăo tui tơlơi thâo, krăp lăng sui, tơlơi hŭi rơhyưt glăk ƀuh: “Bruă pơjrao khŏm kiăng ƀing gơmơi kiăo tui mơnuih ruă, mut nao tơl sưng đih či pơkă, pel ĕp lăng. 8 mông mơguah rim hrơi, gơmơi khŏm nao pơ rim sưng đih mơnuih ruă či pơkă lăng, tơña lăng ƀing ñu ƀong mơguah laih aka, mơñum ia jrao laih aka, akŏ dlô dŏ pơmin suir suar dong mơn, hă ƀudah plai laih mơn. Amăng mông nao pơkă tơlơi ruă, lu mơnuih ƀu hơđong ôh, amuñ taih amang ƀing gơmơi mơn”.

Anih pơjrao hơdui ƀư̆ arăt, pơtŏp anrăng drơi jăn năng ai 50 met, glông sang anun kjăp, jum dar hơmâo pơging hăng pơsơi soh jing Anih pơjrao ƀing đah rơkơi mơ̆ng Sang ia jrao pơjrao mơnuih hưt huing yang ngă tơring čar Dak Lăk. Amăng lăm war sang, điều dưỡng Phan Đình Tài glăk pơkă arăt drah rô, pơkă ayuh, laih anun djru brơi sa čô mơnuih mơñum ia jrao. Ƀơi bra ñu ăt dŏ mơn nam rơka yua mơnuih ruă kĕ amăng thun hlâo: “Lơ 4/8/2025, lơ̆m kâo rai pơ anai pơkă ayuh kơ sa čô đah rơkơi, ñu pơpư̆ kơtang, rial biă anun jing kơplong kĕ bra kâo, hek tơ̆i abih sum ao dong. Kâo hŭi hĭ mơn. Tơdơi kơ anun, abih bang djru bong hĭ ñu, giong anun kâo nao pleh hĭ sum ao, rao hĭ nam rơka, đih pơdơi ƀiă, giong anun nao mă bruă dong yơh”.

Rơbêh dua thun pơjrao pơ Anih pơjrao hơdui ƀư̆ arăt, pơtŏp añrăng drơi jăn, Sang ia jrao pơjrao mơnuih hưt huing yang ngă tơring čar Dak Lăk, ayong Nguyễn Văn Tôn (să Dray Bhăng, tơring čar Dak Lăk), hơmâo ơi ia jrao Khắc hăng điều dưỡng Tài gir pơjrao, krăp lăng rim hrơi. Ñu gơñ tơpai, mơñum hlao hlah đơi, anun ngă akŏ dlô ñu suir suar, ƀu hơdor dong tah, ƀơi anŏ ñu ƀu thâo kơdư̆ ôh, taih amang arăng. Ñu ƀu hơdor dong tah hơdôm wơ̆t ƀing ơi ia jrao, mơnuih djru tlâ̆o ia jrao gir bong ñu. Ayong Tôn lăi, tơdah ƀu hơmâo ƀing ơi ia jrao thâo pap, mông anai ñu ƀu thâo ñu hơdip hiưm pă dong tah. Amăng tơlơi hok mơak yua tơlơi ruă plai laih, prăp či glăi mơ̆ng sang ia jrao, ayong Tôn ol kơdol: “Kâo lăng ƀing ơi ia jrao pơ anai ñu mă bruă klă biă, thâo pap kơ mơnuih ruă; amăng anun hơmâo ơi ia jrao Khắc hăng điều dưỡng Tài lăng ba, djru pơkă tơlơi ruă, wai lăng, pơjrao brơi kâo, laih anun pơtrut pơsur kâo kiăng gir. Kâo čang rơmang kâo dưi lui mơñum tơpai hlao, akŏ dlô hơdor glăi, đah mơ̆ng tañ glăi pơ sang”.

Sang ia jrao pơjrao mơnuih hưt huing yang ngă tơring čar Dak Lăk hơmâo akŏ pơdong thun 2008, hơmâo 100 boh sưng đih, pơjrao brơi 100 čô mơnuih ruă. Thun 2025, rơngiao kơ rơbêh 20.000 wơ̆t čô mơnuih nao pơkă tơlơi ruă, sang ia jrao dŏ wai lăng, pơjrao ba 17.000 čô mơnuih hưt, ƀuh hyu ča čot, ƀu hiăp hơbit, bơkơhñăk, tui hăng Jơlan hơdră dêh čar pơtrun gah ia jrao. Lu mơnuih suaih, glăi pơ sang anŏ yua tơlơi gir djru ba mơ̆ng ƀing ơi ia jrao wơ̆t hăng mơnuih mă bruă. Khă hnun, yua anŏ phara, sang ia jrao ăt tơnap mơn kơ mơnuih mă bruă, prăk apah, tơlơi pơmin mơ̆ng mơnuih mơnam hai aka ƀu thâo hluh đơi. Ơi ia jrao Nguyễn Thị Luyến, Kơ-iăng khua sang ia jrao rơkâo đĭ hơdôm hơdră pơđĭ tui anŏ klă bruă pơkă, pơjrao tơlơi ruă pơ anăp: “Ră anai, Jơnum min mơnuih ƀôn sang tơring čar Dak Lăk hơmâo tơlơi djru ngă pơhưč mơnuih mă bruă, pioh hơjăn kơ ƀing ơi ia jrao đôč, rơnoh djru lĕ 5% prăk blan rim thun; lơ̆m anun ƀing điều dưỡng, ƀing apăn bruă măi mok boh thâo aka ƀu hơmâo ôh. Amăng anih mă bruă kah hăng sang ia jrao pơjrao mơnuih huing yang ngă, tui hăng kâo, anih mă bruă tơnap biă, glêh kơnar soh yơh, yua hnun rơkâo đĭ Jơnum min mơnuih ƀôn sang tơring čar pơplih glăi hơdră djru kơ ƀing điều dưỡng, ƀing apăn bruă măi mok boh thâo laih anun mơnuih mă bruă leng kơ dưi ƀong prăk apah soh. Mơ̆ng anun, pơtrut pơsur kiăng gơñu gir ngă bruă, dŏ glăi hăng ia jrao, wai lăng hăng pơjrao ba klă hloh kơ mơnuih ruă”.

Rim hrơi, ƀing ơi ia jrao hăng mơnuih mă bruă ƀơi Sang ia jrao pơjrao mơnuih hưt huing tơring čar Dak Lăk ăt găn rơgao lu wơ̆t wai lăng, pơjrao mơnuih ruă glêh tơnap, amuñ bưp tơlơi truh yua ƀing ruă ñu hưt, taih amang. Khă hnun, hăng tơlơi gơgrong bruă hăng tơlơi gir mơ̆ng mơnuih ngă bruă ia jrao, ƀing gơñu ăt gir ngă bruă, wai lăng, pơjrao ba mơnuih ruă, kiăng hơmâo lu mơnuih suaih pral, akŏ dlô hơdor glăi, laih anun glăi pơ sang anŏ, glăi pơ plơi pla./.