Ơi Lê Phúc, kơ-iăng khua anom bruă wai pơgang tơlơi duam ră tơring čar Dak Lak brơi thâo, hơdôm blan akŏ thun 2023, ngă tui jơlan hơdră tlâ̆o pok prong ƀơi tơring čar bưp tơnap yua kơƀah vaccine kiăng kơ tlâ̆o brơi ƀing čơđai, sit biă ñu hơmâo sa, dua djuai vaccine kơƀah sui hrơi ngă hơdôm rơbâo čô čơđai aka dưi tlâ̆o pơgang. Amăng mrô 12 djuai/grup vaccine amăng jơlan hơdră tlâ̆o pok prong brơi ƀing čơđai amăng thun 2023, Dak Lak phrâo pơhlôm brơi 2 djuai vaccine djô drơi jăn hăng ruă kơañă, 2 djuai vaccine lĕ “5 amăng 1” hăng DPT (ruă rơkông đok-pơtuk drap-kơañăk) abih laih, mrô dŏ glăi kơnong djop tlâ̆o brơi ƀing čơđai truh abih blan 8.

Tui ơi Lê Phúc, Kơ-iăng khua anom bruă wai pơgang tơlơi duam ruă tơring čar Dak Lak, bruă kơƀah vaccine sui hrơi ngă glêh tơnap amăng pơgang tơlơi duam ruă brơi mơnuih mơnam. Kiăng pơsir hĭ bruă kơƀah vaccine, anom bruă wai pơgang tơlơi duam ruă tơring čar hơmâo jŭ yap glăi ƀing kiăng tlâ̆o hăng hơmâo akŏ bruă pơhlôm brơi vaccine rơwang thun 2023-2024 kiăng pơhlôm bruă brơi gơnong bruă ia jrao mơ-it Jơnum min mơnuih ƀon sang tơring čar mrô prăk kak kiăng kơ blơi.