Hrơi blan giăm anai, Anih pơjrao ƀing čơđai Sang ia jrao prong kual Dap Kơdư hơmâo čơkă lu laih čơđai ruă kơčung amăng bah tơkai tơngan. Yă Hoàng Thị Chuyên ƀơi să Đăk Liêng, tơring čar Dak Lăk hơmâo tơčô đah rơkơi 4 thun glăk pơjrao pơ anai brơi thâo, hlâo kơ anun, sang anŏ ñu ƀuh nô anun duam uh, tơkai tơngan pơđeh, kơbum ia rơnah, mơñum laih ia jrao ngă rơ-ơ̆ samơ̆ ƀu plai mơn. Bơngơ̆t đơi, anun jing sang anŏ ba nao pơ sang ia jrao: “Ñu duam uh, pơ-iă čơčuk mơtăm, drơi jăn bơkơñăk. Ñu lui asơi ia mơtăm, ruă hia na nao, tơkai tơngan pơđeh kơbum ia rơnah bơbleo, mơñum ia jrao lĕ pơtah, giong anun pit dong. Kâo bơngơ̆t biă mă”.

Amai H’Duyên Byă, să Čư̆ Pui, tơring čar Dak Lăk ăt hơmâo ană đah rơkơi ruă kơčung amăng bah tơkai tơngan mơn, glăk pợrjao pơ Anih pơjrao čơđai Sang ia jrao prong Dap Kơdư rơbêh 1 wơ̆t hrơi tơjuh laih, ñu bơngơ̆t biă: “Nao pơ sang ia jrao kraih 8 hrơi laih, hơne ñu plai mơn. Hrơi phrâo rai pơ anai ñu duam uh mơtăm, ƀu mơhao asơi ia dong tah, yua amăng bah ñu rơka, tơlôk abih”.

Ơi ia jrao Lê Thị Bích Phượng, Anih pơjrao čơđai, Sang ia jrao prong Dap Kơdư pôr pơthâo, mơ̆ng akŏ blan 3, mrô čơđai ruă kơčung amăng bah, tơkai tơngan đih pơ sang ia jrao lu biă, djơ̆ hrơi ñu hơdôm pluh čô mơtăm. Pơčrang drah brơi ƀuh hơmâo kman Enterovirus 71 - djuai kman kơtang biă, amuñ ngă ruă kơtang, biă ñu ƀơi čơđai yŭ 5 thun: “Thun anai tui hăng tơlơi pơčrang lăng mơ̆ng Sang ia jrao gơmơi ƀuh tuyp EV71 ñu hơmâo lu hloh. Kman EV71 ngă kơ čơđai duam uh, pơ-iă drơi, amuñ ba truh tơlơi ruă hŭi rơhyưt kah hăng: ruă arăt dlô, arăt drah. Čơđai ñu duam uh na nao, kơtuă biă. Hơmâo čơđai ruă kơtang hloh lĕ bơkơhnăk, suă pran hơhut glêh”.

Ƀu kơnong kơčung amăng bah tơkai tơngan lu tui, mrô mơnuih duam đung drah hăng djơ̆ drăng ƀudah djơ̆ krĕt ƀơi Dak Lăk jai lu tui mơn. Ƀơi să Ea Riêng hơmâo ƀuh anih djơ̆ drăng amăng sang hră hăng 26 čô mơnuih ƀă kman. Ƀơi anăp tơlơi anai, anom bruă ia jrao ječ ameč nao pơgăn hĭ anih hơmâo klin, pruih ia jrao anih hơmâo klin, laih dong pok pơhai djŏp hơdră pơgang hĭ hŭi klin hơđuh kơtang hloh. Yă Trương Thị Ngân, khua Sang ia jrao să Ea Riêng, tơring čar Dak Lăk brơi thâo: “Sang ia jrao pơkiăo nao ƀing apăn bruă nao pơ anih hơmâo klin či pruih ia jrao, pơagaih anih anom; laih dong pơtô brơi ƀing ruă dŏ pơčlah pơ sang, dŏ krăp lăng, pơjrao tơlơi ruă”.

Mơ̆ng akŏ thun truh ră anai, Dak Lăk hơmâo 5 anih hơđuh klin kơčung amăng bah, tơkai tơngan hăng năng ai 700 čô ruă ƀơi lu plơi pla; 26 čô djơ̆ drăng hăng giăm 600 čô duam đung drah, lu hloh bơyan anai thun hlâo. Kiăng dưi pơgang, ơi ia jrao Hoàng Hải Phúc, Khua anom bruă pơgang duam ruă tơring čar Dak Lăk brơi thâo: “Gơmơi prăp rơmet hră pơ-ar pơƀuh kơ Gơnong bruă ia jrao Dak Lăk đah mơ̆ng pok pơhai ngă bruă abih bang ha amăng plĕ mơtăm, či pơgang klin hŭi kơ lar hyu prong tui. Biă ñu, gơmơi akŏ pơdong grup hyu pel ĕp, krăp lăng laih anun pơtô ba mơnuih ƀôn sang thâo hluh pơgang klin kheng. Laih dong, brơi ia jrao pruih kman, pơgang klin mơ̆ng blung, tañ, mơ̆ng ataih”.

Ƀơi anăp klin kheng hơđuh đĭ ƀơi ƀing čơđai, bruă pơgang hlâo, tañ ƀuh hăng pơjrao hmao kru jing tơlơi akŏ phun đah mơ̆ng plai ƀiă hơmâo tơlơi ruă hŭi rơhyưt, laih anun pơgang hŭi lar hyu prong tui. Rơngiao kơ tơlơi gir mơ̆ng ƀing ngă bruă ia jrao, rim boh sang anŏ kiăng thâo hluh rơmet agaih, rơnăk drơi jăn ƀing čơđai, krăp lăng tơlơi suaih pral, mơ̆ng anun gum pơgang tŭ yua klin kheng, pơgang ba rơnuk rơnua kơ mơnuih tơpuôl./.