Amai Phan Thị Bích Thảo, ƀơi tơring kual Ia Kha, tơring glông Ia Grai, tơring čar Gia Lai hmâo ană anet 3 thun, pơ-iă drơi jăn hlăk hluai, anun sang anô̆ ba nao pơ̆ sang ia jrao pơjrao tơlơi ruă čơđai muai Gia Lai pioh pơjrao. Khă hnun hai, tơdơi kơ anun ñu pơplih tañ biă anun khom ba nao pơjrao ječ ƀơi Sang ia jrao prong kual Dăp Kơdư, tơring čar Dak Lak. Tơdơi kơ 8 hrơi pơjrao klă, truh ră anai tơlơi ruă ană ñu plai ƀiă laih, tơlơi suaih pral glăk ƀơƀrư̆ hơkrŭ glăi laih. Hơdor glăi tơlơi blung a lom ba ană nao pơjrao ječ, amai Thảo akă ƀu abih mơn bral hơngal:

 “Lơ̆m ba rai pơ̆ anai tơkai tơngan hăng mơbah ñu ruă kraih truh rơnoh 3, ñu tơdu hơtai bôh laih, lăi hrŏm drơi jăn brŏp abih laih, găng grao laih. Rai pơ̆ anai hmâo ơi ia jrao abih pran jua djru pơjrao brơi hmao tlôn. Lăi hrŏm ană kâo ră anai plai ƀiă laih. Kâo ƀuh huĭ rơhyưt biă, ană kâo ñu pơplih drơi jăn ñu tañ biă hăng ƀu ƀuh ƀlĕ pơđeh ƀơi tơkai tơngan hơgĕt ôh, ñu kơnong kơ pơ-iă drơi jăn đôč hăng kơčung mơbah”.

Ăt hmâo ană ruă kơčung tơkai tơngan hăng mơbah kraih glăk pơjrao ƀơi Anom hơkrŭ glăi tơdơi kơ pơjrao ječ čơđai muai – ană nge Sang ia jrao prong kual Dap Kơdư, amai Hồ Thị Phượng ƀơi phường Thống Nhất, plơi prong Buôn Hồ, tơring čar Dak Lak ăt akă abih bơngot mơn lơ̆m ană ñu hơdai nao ruă kraih. Amai Phượng brơi thâo, hlâo adih ană prong ñu tôm ruă kơčung tơkai tơngan hăng mơbah mơn samơ̆ ƀu kơtang ôh, kơnong kơ bum đĭ ia ƀơi tơkai, tơngan, pơ̆ sang pik ia jrao lĕ suaih mơn anun lơ̆m ană ñu tal 2 hmâo tơlơi ruă anai, sang anô̆ ăt ƀu bơngot đơi mơn.

 “Ană phun kâo ăt ba nao pơ̆ ơi ia jrao gah anom ia jrao mơnuih ƀôn sang mơn mơñum ia jrai hmâo 2 hrơi lĕ suaih, hlâo adih rơnang đôč, ră anai kraih hloh kơ hlâo. Ƀuh huĭ rơhyưt tui anun, huĭ bơdjơ̆ nao glô, tơdah ƀu nao nao pơ̆ sang ia jrao hmao tlôn sit ñu djai mơtăm yơh”.

Glăk bơwih brơi kơ ană 16 blan ƀơi Anom pơjrao čơđai muai Sang ia jrao prong kual Dap Kơdư, amai Huỳnh Thị An ƀơi să Čư̆ Mlan, tơring glông Ea Sup, tơring čar Dak Lak brơi thâo, rơgao hăng anai 1 rơwang hrơi tơjuh, ñu ƀuh ană ñu pơtuk lu đơi, ƀu ai, pơ-iă kơtang đơi hăng amăng plă tơngan, tơkai hmâo bum ia anun ba nao pel ĕp lăng. Ơi ia jrao klah čun lĕ ană ñu ruă kơčung tơkai, tơngan hăng mơbah. Tơdơi kơ 3 hrơi pơjrao ƀơi sang ƀu suaih, sang anô̆ hmâo ba nao laih pơ̆ Sang ia jrao prong Kual Dap Kơdư:

 “Lơ̆m rai pơ̆ anai ia bum anun ñu brô̆ đĭ lu lar nao truh 2 ƀĕ tơkai laih anun lar nao truh pơ̆ tơngan dong. Kâo ăt ƀu thâo lu mơn kơ tơlơi ruă kơčung tơkai tơngan hăng mơbah anun lĕ pơ̆ sang gơnam ngui čơđai muai kâo brơi ñu ngui tui anun đôč ƀu hmâo pơmin bơyan anai hơđuh đĭ tơlơi ruă anai ôh”.

Tui hăng ơi ia jrao Huỳnh Thị Bích Như, ƀơi Anom pơjrao tơlơi ruă cơđai muai, Sang ia jrao prong Kual Dap Kơdư, mơ̆ng akô̆ thun truh ră anai, anom hmâo tŭ mă, pơjrao brơi rơbêh kơ 85 čô čơđai ruă kơčung tơkai tơngan hăng mơbah. Lăp đing nao amăng 1 blan jê̆ hăng anai mrô čơđai ruă ba nao pơ̆ sang ia jrao đĭ lu. Ră anai Anom glăk pơjrao brơi 15 čô mơnuih ruă kơčung tơkai tơngan hăng mơbah, amăng anun, hmâo 2 čô mơnuih ruă kraih. Ơi ia jrao Huỳnh Thị Bích Như lăi pơthâo:

 “Kâo pơgang hlôm hlâo hăng hơdră pơđĭ tui pran gơgrong kơ cơđai, ƀong huă djop gơnam ngă bơbuă, mơñum djop ia laih anun pơhrua nao hơdôm vitamin kiăng hmâo pran kơtang kơ ană pô hăng ta khom ba nao tlâ̆o brơi vaccine pơgang hlôm hlâo tơlơi ruă drap hăng pơtô brơi kơ ană pô agaih rơnak tơngan yua kơ tơkai tơngan ta agaih rơnăk klă ñu ăt plai ƀiă mơn lar hyu”.

Kơnong yap ƀơi Anom hơkrŭ glăi drơi jăn tơdơi kơ pơjrao jec čơđai muai hăng ană nge, Sang ia jrao prong Kual Dap Kơdư, mơng akô̆ thun truh ră anai, Anom hmâo tŭ mă hăng pơjrao brơi kơ 4 čô čơđai hmâo tơlơi ruă kơčung tơkai, tơngan hăng mơbah kraih hăng kraih kơtang, đĭ 100% bơhmu hăng thun hlâo. Ơi ia jrao chuyên khoa II Hoàng Ngọc Anh Tuấn, Khua Anom hơkrŭ drơi jăn tơdơi kơ pơjrao ječ tơlơi ruă čơđai muai, ană nge brơi thâo, hơdôm thun hlâo adih tơlơi ruă kơčung tơkai tơngan hăng mơbah ƀiă hmâo mơnuih ruă kraih, samơ̆ thun anai mrô mơnuih ruă kraih đĭ lu, mơnuih ruă kraih kơtang tañ, pơplih tơnap thâo biă, anun ƀing ơi ia jrao ƀơi Anom khom lăng tui kơjăp tơlơi suaih pral mơng rim čơđai pioh pơsir hmao tlôn:

 “Hăng tơlơi ruă kơčung ƀơi tơkai tơngan hăng mơbah lĕ khom lăi truh ră anai ăt ƀu dưi lui raih mơn. Kâo pơtă lĕ rơngiao kơ pơgang pơgăn hlôm hlâo kah hăng hơdôm tơlơi ƀong mơñum, hơdôm tơlơi pơhlôm hơdjă, pơhlôm anih anom dô̆ lĕ ƀing amĭ ama čơđai khom đing nao lơ̆m čơđai kơčung mơbah, alah ƀong huă, ƀu mơhao ƀong huă ƀudah čơđai pơ-iă drơi ƀudah ƀơi drơi jăn čơđai bum ia thơ, tâ̆o hloh ba nao pơ̆ sang ia jrao giăm hloh pioh hmâo mơnuih mă bruă ia jrao lăi pơthâo brơi kiăng hmâo jơlan gah pơjrao, bơwih brơi”.

Tui tơlơi lăi pơthâo glăi mơng Anom wai lăng tơlơi duam ruă tơring čar Dak Lak, mơng akô̆ thun truh ră anai, đơ đam tơring čar čih pioh hmâo 158 čô mơnuih ruă kơčung tơkai tơngan hăng mơbah, amăng anun hmâo sa čô mơnuih djai. Lăp đing nao mrô čơđai ruă kơčung tơkai tơngan hăng mơbah pơplih jing kơtang hmâo gru nam đĭ lu bơhmu hăng hơdôm thun hlâo adih./.