Tui anun, tơring čar Gia Lai kiăng tuh pơ alin man pơdong, pơkra hiam hăng blơi gơnam yua kơ 24 boh sang ia jrao să pơ guai dêh čar, anih tơnap hloh. Hơdôm bruă tuh pơ alin kiăng pok prong anih mă bruă, man phrâo anih sem lăng pơčrang rup, mă drah, siêu âm, djru pơjrao ječ năng blung, măi pơkra ia hơƀak gah ia jrao hăng hơdôm ring bruă pơkŏn dong. Prăk pioh či ngă bruă năng ai 288 klai prăk.

Hrŏm hăng tuh pơ alin blơi gơnam yua, pơkra anih anom, tơring čar Gia Lai ăt kiăng ngă bruă pơkă brơi tơlơi suaih pral tui tơđar kơ mơnuih ƀôn sang ƀơi 12 boh să gah guai, bul pơtâo plao ia rơsĭ, biă ñu pơ anih tơnap hloh. Mơnuih hơmâo djru brơi đôč lĕ mơnuih djuai ania ƀiă, ƀing tha rơma, mơnuih djru hơkrŭ lŏn ia, mơnuih hơmâo kơnuk kơna djru pơgang ba, sang anŏ rin, rin plai ƀiă, ƀing đah kơmơi măng hnưr thun ƀă ană bă, hăng čơđai yŭ 6 thun. Bruă nao pơkă lăng tơlơi suaih pral amra pơmut amăng hră čih pioh điện tử, pơtô brơi, tañ ƀuh nam rưa hăng ba pơjrao pơ sang ia jrao prong lơ̆m kiăng.

Laih dong, Khul khua pơ ala mơnuih ƀôn sang tơring čar Gia Lai ăt glăk čih tơlơi pơtrun phrâo kơ bruă ngă pơhưč hăng djru ba ƀing ơi ia jrao, mơnuih thâo djuai ia jrao. Hơdră djru anai anăp nao ƀing ơi ia jrao nao mă bruă ia jrao ƀơi hơdôm boh sang ia jrao anet prong kual mơnuih ƀôn sang djuai ania, čư̆ siăng, să gah guai, să bul pơtâo plao ia rơsĭ hăng djŏp sang ia jrao kơnuk kơna pơdong pơkŏn mơ̆ng tơring čar.

Hlâo kơ hơmâo hơdră djru phrâo, tơring čar prăp rơmet iâu lu ơi ia jrao glăi pơ să mă bruă. Yă Nguyễn Thị Thanh Lịch, Kơ-iăng khua jơnum min mơnuih ƀôn sang tơring čar Gia Lai brơi thâo: “Tơring čar hơmâo lu biă tơlơi djru ngă pơhưč, samơ̆ aset biă ƀing ơi ia jrao glăi mă bruă. Ră anai, rơnoh prăk pơhưč mơnuih mă bruă lu hloh mơ̆ng ƀing gơmơi lĕ 600 klăk păk kơ sa čô ơi ia jrao laih anun djru prăk apah sang dŏ. Ƀing gơmơi ngă laih hră iâu pơthưr, pơkiăo nao, pơplih nao rai ơi ia jrao glăi mă bruă pơ să”.

Ră anai tơring čar Gia Lai hơmâo 135 boh sang ia jrao prong hăng 369 sang ia jrao să, bơwih brơi rơbêh 26.800 čô mơnuih/sa boh sang ia jrao. Khă hnun, ơi ia jrao aka ƀu hơmâo pơpha hyu kơnar ôh. Tơring čar dŏ 76 sang ia jrao să aka ƀu hơmâo ơi ia jrao. Tui hăng akŏ bruă, amăng thun anai, tơring čar Gia Lai brơi pơplih nao rai 38 čô ơi ia jrao mơ̆ng hơdôm boh sang ia jrao, anih khăm pơjrao kơnuk kơna ngă pô glăi djru kơ 30 boh să, phường kiăng mơnuih mă bruă hloh.

Bruă kiăng hơmâo lu ơi ia jrao glăi mă bruă pơ să mơ̆ng tơring čar Gia Lai hơmâo ngă mơ̆ng thun 2026 truh thun 2030. Hrơi blan rim čô ơi ia jrao glăi ngă bruă pơ să aset biă ñu 6 blan hăng sui biă ñu 12 blan, dưi ngă bruă tui rim tal, samơ̆ khŏm pơhlom djơ̆ hrơi mông pơkă. Hăng bruă pok pơhai anun, laih anun kiăo tui bruă ruah mơnuih mă bruă ia jrao, Gơnong bruă ia jrao amra lăi pơthâo kơ Jơnum min mơnuih ƀôn sang tơring čar Gia Lai pơsit brơi mrô ơi ia jrao hăng anih kiăng djru amăng hơdôm thun pơ anăp dong./.