Mông jơnum ngui boh sầu riêng ƀudah boh Durian tơring čar Dak Lak thun 2026, pơphun mơ̆ng kơnôl 15/8 truh kơnôl 2/9, hơmâo 1000 čô khua mua rai mơ̆ng djop tơring čar, ƀôn prong, djop ding jumm, anom bruă ƀơi gơnong dlông hăng 400 čô khua mua, tuai mơ̆ng jar kmar. Hrŏm hăng hơdôm grup khua mua, tuai rơnguai, tal Jơnum ngui anai amra pơhưč mơ̆ng 25.000 truh 30.000 čô tuai amăng dêh čar hăng tač rơngiao.

Kiăng pơhlom brơi anŏ hơdjă rơgoh mơnong ƀong huă amăng mông jơnum ngui, anom bruă ia jrao tơring čar Dak Lak hơmâo dăp lui bruă, pok pơhai brơi djop să, plơi pla  anih pơphun tơlơi ngui ngor; laih dơ̆ng hyu sem lăng tong ten abih bang, jŭ yap glăi djop anih jưh, sang tuai đih pơdơi pơdă, huă ƀong, kiăng thâo anŏ rơgoh hơdjă hiư̆m pă, bruă pơhlom hlâo apui ƀong sang hăng rơnuk rơnua hơdjă mơnong ƀong huă.

Anom bruă ia jrao ăt pơtrut kơtang bruă hyu pơtô lăi, rơkâo mơnuih ƀôn sang, mơnuih ngă hmua pla boh durian hăng djop sang sĭ mơdrô ha hnơ̆ng ƀudah hyu blơi, pơdŭ pơgiăng gơnam  hai ăt khom ngă tui djơ̆ tơlơi phiăn pơkă kơ bruă pơhlom hơdjă mơnong ƀong huă hlâo, amăng mông hăng tơdơi kơ jơnum ngui ngor. Ơi Trần Quang Hưng, Kơ-iăng khua anom bruă wai lăng anŏ hơdjă rơgoh mơnong ƀong huă, Gơnong bruă ia jrao tơring čar Dak Lak brơi thâo:

“Gơnong bruă ia jrao tơring čar Dak Lak hơmâo akŏ pơjing 2 grup hyu ĕp lăng. Sa grup nao ĕp lăng djop sang sĭ mơdrô, anih anom pơkra ming mơnong ƀong huă bơwih brơi kơ tuai blơi huă ƀong amăng mông ngui ngor; sa grup dŏ glăi, hyu sem lăng djop sang jưh tuai, anih apah dŏ glăi, pơdơi pơdă, sang sĭ mơdrô mơnong ƀong huă pơprong, pơtô brơi ngă tui djơ̆ tơlơi pơtrun pơgang hơdjă rơgoh mơnong ƀong huă, biă mă ñu anih pŭ asơi añăm, mơnong ƀong huă yua kơ Jơnum min mơnuih ƀôn sang tơring čar pơphun tŭ jum tuai, bơwih brơi kơ khul khua mua rai jơnum. Hrŏm hăng anun, lu grup khua mua mơ̆ng Gơnong bruă ia jrao ăt nao sem lăng djop khul pơplông hơtŭk riă tơnă hơbai asơi añăm, mơnong ƀong huă, djop čơgăn dưm, pơdă prưng mơnong ƀong huă pioh sĭ mơdrô kiăng pơhlom klă anŏ hơdjă rơgoh mơnong ƀong huă”.