Mơ̆ng akŏ thun truh ră anai, tơring čar Dak Lak hơmâo čih pioh 1.518 čô mơnuih ƀă kman duăm đung drah ƀơi 14 bit anih, đĭ tui 154% pơkă hăng tal anai thun hlâo. Lăp đing nao biă mă ñu, kơnong amăng sa wơ̆t hrơi tơjuh laih rơgao đôč, hơmâo 210 čô mơnuih ƀă kman duăm đung drah, mut đih pơjrao amăng sang ia jrao. Hơdôm să, phường hơmâo lu mơnuih ƀă hloh lĕ Tuy Hòa, Ƀuôn Ma Thuôt hăng hơdôm să Phú Hòa, Đồng Xuân, Sinh Hinh, Krông Ana, Ea Sup, Ea Hleo….

Ơi ia jrao Lê Phúc, Kơ-iăng khua anom bruă sem lăng tơlơi duăm ruă tơring čar Dak Lak (CDC Dak Lak) brơi thâo, ƀơi anăp kơ tơlơi ƀă kman duăm đung drah kơtang hơdôm hrơi giăm anai, anom bruă gơñu hơmâo ngă hrŏm lu sang bruă ia jrao ƀơi să, phường pok pơhai  sa amăng plĕ pơhlom, pơgang duăm đung drah.

Amăng anun, pơtum nao kơ bruă pơtô pơblang kơtang hloh, kiăng pơđĭ tui tơlơi thâo hluh kơ mơnuih ƀôn sang thâo rơnăk anih hơdip jum dar, pơrai anih keč juăt boh, čeh ană; laih dơ̆ng ngă hrŏm hăng djop sang ia jrao să, phường pơphun brơi pruih ia jrao pơdjai kman, pơdjai ană keč, anih arong aruač dŏ, kiăng pơgăn anăm hơmâo anih keč boh hăng ba hyu kman duăm ruă, pơtô ten kơ ƀing ơi ia jrao ngă bruă pơhlom pơgang duăm đung drah.

“Ƀing gơmơi pơtrut pơđĭ tui tơlơi thâo hluh amăng bruă pơhlom, pơgang vectơ, kman ană keč, krăp lăng ting ten hăng pwosir anih keč juăt dŏ, anih arong aruač čeh čar lar lu brơi ƀing ơi ia jrao ƀơi să thâo rơnăk anih dŏ jum dar. Mơ̆ng anun, pơtô brơi hơdră mă bruă kơ ƀing nai, ơi ia jrao djop anih, kiăng ngă tui hơdră lăi lui hlâo ăt kah hăng hơdră mă bruă tŭ yua hloh amăng bruă pơhlom, pơgang duăm đung drah”.

Mơ̆ng akŏ thun truh ră anai, đơ đam tơring čar Gia Lai čih pioh hơmâo 1.813 čô mơnuih ƀă duăm đung drah, amăng anun sa čô djai. Pơkă hăng thun 2025, mrô mơnuih ƀă lu hloh 914 čô. Kiăng prăp lui hlâo, bruă pơhlom pơgang laih anun pơganw khut khăt duăm đung drah lar lu, Anom bruă sem lăng kman duăm ruă tơring čar hơmâo pơphun brơi grup khua mua hyu mă bruă, pok pơhai, ĕp lăng tơlơi pơhing duăm đung drah amăng tơring čar, laih anun ngă tui hơdră pơhlom, pơgang hăng pơsir khut khăt ƀơi hơdôm anih hơmâo kman duăm ruă, rơwang hrơi tơjuh laih rơgao hơmâo čih lu biă mă mơnuih ƀă.

Rơđah biă mă ñu, anom bruă hơmâo pok pơhai krăp lăng ƀơi să Bình An. Grup hơmâo mă bruă hăng khua mua să, sang ia jrao Bình An, sang ia jrao Tây Sơn amăng bruă mă, pơtô lăi pơhlom pơgang kman duăm ruă ƀơi plơi pla, tơlơi pơhing duăm đung drah, bruă bruih ia jrao, pơsir abih anih keč boh, ba hyu klin kman, kiăng tañ pơdjai ană keč djơ̆ lăp, đut tơhnal.

Tui hăng gơnong bruă ia jrao tơring čar Gia Lai, kiăng kơ bruă pơhlom pơgang duăm đung drah tŭ yua hloh, djop să, plơi pla, kiăng pok pơhai djơ̆ hơdră pơsir djơ̆ anih hơmâo klin; đing nao bruă pơdjai keč, anih keč boh, anăm brơi kman ană keč lar hyu lu; rơnăk anih dŏ jum dar, pưk sang đang war jum dar anih dŏ; kơtưn pơhlom pơgang mă tơlơi duăm ruă amăng sang anŏ, ƀơi sang hră hăng pôr pơthâo amăng mikrô pơhiăp, brơi mơnuih ƀôn sang hmư̆ hăng thâo anŏ pơhlom hlâo laih anun pruih ia jrao pơdjai ană keč rim rơwư̆ pơkă, sit hơmâo mơnuih duăm khom pơjrao tañ pơgăn kman hmao kru.

Truh ră anai, tơring čar Lâm Đồng čih pioh hơmâo 1.126 čô mơnuih duăm đung drah, čih pioh phrâo hloh lĕ 48 čô amăng rơwang hrơi tơjuh laih rơgao hăng 10 bit anih hơmâo kman ƀă duăm đung drah, lu biă mă ñu ƀơi hơdôm plơi pla kah hăng : Dă Huoai, Bảo lộc, Di Linh, Tánh Linh, Đức Linh hăng Bắc Bình. Tui hăng gơnong bruă ia jrao tơring čar Lâm Đồng, mah mrô mơnuih ƀă duam đung drah hlăk hrŏ trun pơkă hăng thun hlâo, samơ̆ duăm đung drah thun anai hơmâo tañ hloh hăng tơđar thun, sit mơ̆n hŭi ƀă hyu kơtang hloh pơ anăp anai, yua bơyan hơjan hlăk truh.

Kiăng prăp hlâo pơgăn kman duăm đung drah, pơhlom hlâo hơmâo mơnuih duăm kraih hăng djai lĕ, Gơnong bruă ia jrao tơring čar pơtrun hiăp kơ Anom bruă sem lăng tơlơi duăm ruă tơring čar kơtưn krăp lăng bruă pơhlom hlâo tong ten, krăp lăng klin kheng duăm ruă amăng tơring čar. Hmao kru ƀuh hăng pơgăn tañ anih ƀă klin duăm ruă, anăm brơi lar hyu lu. Prăp lui djop ia jrao pruih pơdjai kman, gơnam yua mă bruă, prăp lui pơjrao hăng pơgăn kman duăm đung drah hŭi ƀă hyu kơtang, hyu sem lăng se re ƀơi hơdôm plơi pla hơmâo lu mơnuih duăm hăng juăt ƀă klin.