Ƀơi Sang ia jrao tơhan hăng mơnuih ƀôn sang Phú Qúy, rim hrơi hơmâo hơdôm rơtuh wơ̆t mơnuih ƀôn sang nao pơkă hăng tơlơi ruă hăng pơjrao. Hơdôm thun giăm anai, sang ia jrao ƀơi bul pơtâo ia rơsĭ pơplih klă tui laih, hơmâo măi mok, kĭ thuâ̆t hăng pơđĭ tui anŏ klă khăm pơjrao tơlơi ruă ƀơi anih. Lu mơnuih ruă hlâo adih ba nao pơ sang ia jrao gah kơdư, ră anai dưi pơkă lăng, pơjrao brơi hlao ƀơi bul pơtâo ia rơsĭ laih, djru mơnuih ƀôn sang plai ƀiă hrŏ prăk, huăi rơngiă đơi mông nao rai. Ơi Nguyễn Văn Hải, ƀơi thôn Qúy Hải brơi thâo, pơhmu hăng hlâo adih, bruă khăm pơjrao gêh găl hloh laih, ƀing ơi ia jrao hai thâo lăng, pơjrao brơi klă, anun jing mơnuih ƀôn sang đăo kơnang mơn: “Ră anai ta nao pơkă lăng tơlơi ruă lĕ ƀing ơi ia jrao ñu lăng ba klă biă, mơak mơai, khăm brơi kơ ta giong anun brơi ia jrao. Pơhmu hăng hlâo adih, ia jrao pơ anai pơplih klă tui laih. Kơnong ƀing ruă kơtang đôč mơ̆ng nao pơ pơkŏn, yua dah pơ anai dŏ tơnap lu mơn”.

Bruă khăm pơjrao tơlơi ruă tơdu, juăt hơmâo ƀơi Phú Qúy ră anai huăi tơnap hơget lơi, djơ̆ hăng mơnuih ƀôn sang kiăng mơn. Khă hnun, hăng mơnuih ruă kraih kah hăng nur drah dlô, pơčrah arăt drah hơtai boh, ƀudah hơmâo lu tơlơi ruă, rơka kơtang, bruă pơjrao ječ hăng pơjrao hlao pơ anih ƀu dưi ôh. Lơ̆m anun, bruă ba nao mơnuih ruă hăng kơdư adih kơnang kơ ayuh hyiăng, adai, hrơi ƀat tô nao rai, tap năng ƀơi anŏ ñu khŏm iâu rơdêh bek djru pơgiăng nao pơ kơdư adih.

Tui hăng ơi ia jrao Bùi Thị Hảo, Kơ-iăng khua Anom bruă ia jrao tơhan hăng mơnuih ƀôn sang kual Phú Qúy, tơlơi kiăng ječ hloh ră anai lĕ pơđĭ tui tơlơi rơgơi djru pơjrao mơnuih ruă kraih ƀơi anih hlao, mơneč mă “mông mah” arăng pia či djru bơhơdip mơnuih. Ră anai anom bruă ăt kơƀah mơn anih pơjrao rơgơi, biă ñu lĕ pơjrao ječ ruă kraih, pơjrao arăt hơtai boh, hăng akŏ dlô. Kiăng pơsir brơi anŏ tơnap anai, Anom bruă hơmâo ngă hrŏm hăng Sang ia jrao Bạch Mai iâu mơnuih rơgơi kơhnâo nao truh pơ bul ia rơsĭ hlao, pơtô brơi bruă pơjrao mơnuih drah ƀu thâo rô, laih dong djru pơtô rơguăt dlăm kơ pơjrao tơlơi ruă pơčah, nur drah dlô kơ ƀing mă bruă pơ anai: “Ră anai sang ia jrao hơmâo laih Sang ia jrao Bạch Mai djru pơtô pơjuăt brơi đôč đač kơ sa ekip apăn bruă pơjrao ječ mơnuih rơbuh yua kơđông, pơčah drah dlô, amăng anun hơmâo sa čô ơi ia jrao hăng sa čô điều dưỡng djru pơjrao. Phrâo anai, hơmâo Gơnong bruă ia jrao lăng ba, blơi brơi sa boh măi CT djru pơjrao ječ mơnuih ruă kraih rơbuh yua kơđông, pơčah arăt drah dlô. Sang ia jrao Bạch Mai ăt djru ba anom bruă pơkă lăng tơlơi ruă mơ̆ng ataih, pơđok glăi tơlơi ruă mơ̆ng ataih, pơkă lăng lăp djơ̆ djru pơjrao tañ mơnuih ruă kraih”.

Yă Huỳnh Thị Phương Duyên, Khua gơnong bruă ia jrao Lâm Đồng brơi thâo, pơ Phú Qúy glăk hơmâo 121 čô khua, mơnuih mă bruă ia jrao, amăng anun hơmâo 29 čô ơi ia jrao, jing tơring hơmâo mrô ơi ia jrao pơkă amăng ha pluh rơbâo čô mơnuih lu hloh amăng tơring čar. Hăng mrô ơi ia jrao anai, anom bruă ia jrao dưi pơkă, pơjrao brơi mơnuih ƀôn sang ƀơi bul pơtâo plao ia rơsĭ, tơhan blah ngă hăng mơnuih hyu mă akan ƀơi ia rơsĭ.

Khă hnun, ƀơi anăp tơlơi kiăng pơplih kơtang tui, mă bruă rơgơi tui, biă ñu amăng hrơi mông Phú Quý pơtrut ngă pơhưč tuai hyu ngui, anom bruă ia jrao Lâm Đồng kiăng pơđĭ tui tơlơi rơgơi khăm pơjrao mơnuih ruă, biă ñu pơjrao mơnuih ruă kraih. Tui hăng yă Huỳnh Thị Phương Duyên, Gơnong bruă ia jrao kiăng pơkra ming klă tui anih anom, pơhrua tui gơnam yua măi mok đah mơ̆ng dưi pơkă lăng, pơjrao brơi mơnuih ruă klă hloh tui hăng tơlơi phara hơjăn mơ̆ng kual bul pơtâo plao ia rơsĭ: “Tơlơi mơak biă ñu lĕ 100% čô mơnuih mă bruă ia jrao mơ̆ng Phú Qúy hơmâo Anom bruă djru pơjrao ječ Rơbuh yua kơđông, pơčah drah dlô Sang ia jrao Bạch Mai nao tơl anih pơtô djru mơnuih ruă kraih drah ƀu rô, ƀu thâo suă pran, laih anun hơmâo kơđŏm hră hrăm giong. Laih dong, Sang ia jrao Bạch Mai ăt ƀuăn djru brơi đôč abih tih prăk pơtô pơjuăt kơ Phú Quý truh thun 2028”.

Bruă pơhrua tui mơnuih mă bruă, pơtô pơjuăt rơgơi tui hăng blơi măi mok gơnam yua amăng sang ia jrao ƀu kơnong pơđĭ tui anŏ klă khăm pơjrao tơlơi ruă kơ mơnuih ƀôn sang ƀơi kual Phú Qúy đôč ôh, ăt djru pơhlom rơnuk rơnua kơ mơnuih mă akan, tuai rơnguai ƀơi bul ia rơsĭ ataih hloh mơ̆ng kơdư. Anai ăt jing bruă prăp rơmet yom biă mă kiăng ia jrao Phú Qúy dưi pơjrao brơi klă hloh mơnuih ruă kraih ƀơi anăp tơlơi tơnap, anŏ ataih mơ̆ng bul pơtâo plao ia rơsĭ.