Jơnum min mơnuih ƀôn sang tơring čar Gia Lai phrâo ngă hră dăp hlâo, brơi pơblih ƀing ơi ia jrao glăi mă bruă pơ sang ia jrao să, phường pơkă thun blan, kiăng pơđĭ kơtang bruă pơjrao hăng pơgang tơlơi suaih pral kơ mơnuih ƀôn sang laih anun pơgang klă boh tŭ yua tơlơi găng añrăng kơ ană plơi pla. Tui hăng akŏ bruă, thun 2026, tơring čar him lăng brơi nao 38 čô ơi ia jrao mơ̆ng djop sang ia jrao prong, nao pơkă lăng hăng pơjrao duăm ruă ƀơi sang ia jrao kơnuk kơna amăng 30 boh să, phường, či hơƀơi kiăng hlâo.

Ră anai, đơ đam tơring čar hơmâo 135 boh sang ia jrao hăng 375 bit anih čơkă pơjrao duăm ruă, samơ̆ dŏ 4 boh anih aka ƀu hơmâo ơi ia jrao ôh hăng 76 boh anih aka ƀu pơsit brơi ơi ia jrao dŏ mă bruă hơđong. Bruă mơ-it nao djru pơblih nao rai ƀing ơi ia jrao trun nao mă bruă pơ să, phường, kiăng plai ƀiă kơniă anih pơjrao pơ sang ia jrao prong hăng tơlơi duăm ruă djong juăt hơmâo. Ƀing ơi ia jrao nao djru pơ plơi pla lĕ, hơmâo pơhrăm brơi tơlơi thâo hơdră pơkă lăng pơjrao ƀơi kual plơi pla. Akŏ bruă đing nao hlâo lĕ kual ataih, kual asuek, giăm guai dêh čar hăng kual mơnuih djuai ƀiă.

Gơnong bruă ia jrao tơring čar Dak Lak glăk pok pơhai blan khăm tui tơđar brơi mơnuih ƀôn sang tui tơlơi pơtrun mrô 72 mơng Khul apăn bruă Ping gah. Jơlan hơdră pơphun hăng bruă khăm brơi mơnuih ƀôn sang tha rơma hơmâo pơphun ha amăng plĕ ƀơi phường Tân An, phương Tuy Hòa, să Krông Bông hăng să Đồng Xuân kiăng lăng glăi hlâo kơ pok pơhai amăng đơ đam tơring čar dong mơng lơ 1/7.

Hơdôm anih anom ia jrao prap lui djop mơnuih mă bruă, gơnam măi mok djru brơi bruă khăm pơjrao. Ƀing mơnuih arăng djru brơi hơmâo mơnuih tha rơma, mơnuih djru hơkrŭ, mơnuih drơi jăn ƀu klă, sang anŏ ƀun rin, giăm ƀun rin, mơnuih ruă sui thun, mơnuih djuai ania ƀiă hăng mơnuih kual tơnap tap. Gơnong bruă ia jrao hơmâo akŏ pơjing akŏ bruă tong ten, kah jao bruă brơi hơdôm anih anom, pơhlôm jơlan hơdră dưi ngă tŭ yua ƀơi 102 boh să, phương amăng tơring čar.