Sem lăng anŏ ƀă hyu klin duăm đung drah thun anai, kơ-iăng nai tha prin, nai prin tha, Trần Đắc Phu, khua hơđăp anom bruă ia jrao pơgang lăi lĕ, tơlơi duăm anai ñu ƀu hrup tơđar thun ôh, tui hăng bơyan juăt hơmâo. Tơdah hlâo adih bơyan hơjan hlim kah hơmâo duăm đung drah, ră anai, amăng rim blan, bơyan amăng thun hơmâo na nao mơnuih ƀă, wơ̆t hăng bơyan phang adai không hai hơmâo mơ̆n, ñu  ƀă hyu amăng plơi pla, mơnuih ƀôn sang:

“Tơlơi či hơmâo kman duăm ƀă hyu ră anai hlăk lu tui pơkă hăng tal anai thun hlâo, tơlơi pia ƀă hyu kơtang ƀu thâo hlâo ôh yua kơ ta kiăng pơgang pơhlom hlâo, hlâo adih thâo ta ngă. Thun anai ñu phara laih, ayuh hyiăng adai pơblih ƀu gêh găl ôh, mơnuih ƀôn sang hyu plơi anai, plơi adih djop anih lu tui. Laih anun adai ayuh hyiăng pơ-iă kơtang, hơjan ƀu lê̆ anŏ, tơdah ayuh hyiăng rơbêh 25 đô̆ amuñ yơh keč brung dlông tơkai boh hăng čeh čar lar djuai, ba kman duăm đung drah ƀă hyu”.

Ƀơi ƀôn prong Hồ Chí Minh hơmâo mrô mơnuih ƀă duăm đung drah lu hloh amăng dêh čar, yap truh blan 6/2026, hơmâo čih pioh truh 18 rơbâo čô mơnuih duăm hăng 4 čô mơnuih djai. Mơnuih ƀă kman duăm đung drah ƀuh ƀơi djop anih amăng ƀôn prong. Tui hăng anom bruă ia jrao ƀôn prong Hồ Chí Minh, klin duăm đung drah thun anai đi lu biă mă, tañ hloh hăng tơđar. Sa tơlơi lăp đing nao lĕ mơnuih ƀă duăm đung drah ăt pơblih mơ̆n. Ră anai, rơbêh ha mơkrah mrô mơnuih prong, amăng anun hơmâo khul mơnuih mơ̆ng 11 truh thun 30 thun lu hloh. Tơlơi anai brơi ƀuh duăm đung drah lu mơnuih prong ƀă, ƀu djơ̆ ƀing čơđai muai kah hăng ta juăt ƀuh mơ̆ng anai pơ klôn. Nai prin tha, ơi ia jrao Trương Hữu Khanh, Kơ-iăng khua khul ơi ia jrao pơjrao tơlơi ruă ƀă kman duăm ruă ƀơi ƀôn prong Hồ Chí Minh, pơtă pơtăn:

“Boh nik ñu duăm đung drah anai, mah abih duăm hai, ăt dŏ pơhŭi đôč. Yua kơ anun, pô duăm khă hlao laih, abih duăm samơ̆ khom mơak amăng pran jua, khom bơtơpư̆ drơi jăn, tơl ta mưn huăi gleh đơi ôh hnun kah ta mơ̆ng hơđong pran jua biă mă. Tơdah hlao duăm laih dŏ đih tă ƀơi abăn kiao, hŭi hwing akŏ, ruă amăng kian ăt dŏ bơrơbah ƀu kiăng ƀong huă khom kơđiăng hŭi ñu pơglăi dơ̆ng. Yua kơ anun, ta ăt khom krăp lăng na nao arăt drah rô, pơkă lăng drah nur. Laih anun nao pơkă lăng đôč mah abih laih duăm”.

Lu mơnuih rơgơi kơhnâo lăi pơtong, ƀu ƀiă ôh mơnuih dŏ ngă amưng hăng tơlơi duăm đung drah anai. Lu mơnuih pơjrao mă pơ sang anŏ ƀudah nao pơ sang ia jrao kaih đơi, tơl kraih laih kah nao, yua pơmin tơlơi duăm anun huăi kơtang ôh. Lơ̆m anun, duăm đung drah ñu kraih hmar biă mă, ngă rơbah mơtam, pơai buai, đung drah ƀơi klĭ, pơ-ai lu mơta pran amăng drơi jăn, amuñ biă ba truh tơlơi djai brŭ tơdah ƀu hmao ƀuh hăng pơjrao tañ, Ơi Võ Hoài Sơn, Kơ-iăng khua anom bruă pơhlom pơgang duăm ruă, Ding jum ia jrao brơi thâo, mơnuih ƀôn sang ăt kiăng lui hĭ yơh tơlơi pơmin hrup anun, juăt lăi keč boh čeh čar lar lu ƀơi anih hơmâo ia phông, ia hơƀak jrak đôč, mơnuih dŏ amăng sang dlông tal, lu mơnuih, huăi hơmâo keč ôh lăi. Sit biă mă ñu, keč brung, dlông tơkai ñu dŏ amăng anih hơmâo ia čă, ia plăng đôm ƀơi akiăng, pơnăng sang ƀudah amăng kơthung ƀêh dưm ia sang anŏ, blŏ bơnga, anih pla bơnga amăng blŏ amăng ƀưh, tơhnal đŭ ia rô mơ̆ng măi pơrơ-ot hăng gơnam yua pơkŏn hơmâo ia đôm glăi, keč dưi dŏ soh.

“Tơlơi pơhing lăi nao amăng thun anai lĕ huăi hơmâo ană keč lĕ huăi duăm ruă ôh. Laih anun ƀing gơmơi ăt čang rơmang rim boh sang anŏ, rim wơ̆t hrơi tơjuh khom pioh 10 mơnit hyu sem lăng, duñ abih djah djâo, anih ia dong hŭi hơmâo ană keč, arong  aruač jĕ giăm sang anŏ anih ta dŏ”.

Tơlơi duăm đung drah lĕ sa tơlơi duăm ruă hŭi rơhyưt biă mă, samơ̆ dưi mơ̆n pơhlom hlâo tơdah rim mơnuih ƀôn sang thâo răng kơđiăng pơgang mă drơi jăn pran jua, tơlơi suaih pral ta pô laih anun ană plơi pla; khom pơblih na nao ia amăng ƀưh, anih rông akan ngui; blŏ pla bơnga; duñ djah djâo, gơnam yua ia dong sit ƀu yua pioh rơmet lui abih. Laih dơ̆ng, sit pit đih amăng mơmŏt mlam, khom akă mung, khom thâo yua ia jrao puh pơđuăi keč, anăm brơi keč kĕ hăng ngă hrŏm anom bruă ia jrao amăng plơi pla rơnăk jum dar sang dŏ gŏ awă, anih hơdip jum dar, pơdjai ană keč, arng aruač mač kman jum dar sang dŏ, amăng jơlan glông lơ̆m plơi pla.