Sit biă ñu, kơnong amăng rơwang hrơi tơjuh rơgao, mrô mơnuih ƀă kman đĭ kơtang biă mă hăng rơbêh 210 čô mơnuih ba nao đih pơ sang ia jrao pioh pơjrao brơi. Kman hơđuh đĭ kơtang hloh ƀơi phương Tuy Hòa hăng hơdôm boh să Phú Hòa, Đồng Xuân, Sông Hinh, Krông Ana, Ea Sup, Ea Hleo amăng tơring čar Dak Lak. Bruă pơgang kman, wai pơgang brơi tơlơi suaih pral mơnuih ƀôn sang glăk jing bruă ječ ameč, anăm brơi pơtah hơtai ôh.

Ba truh kơ bruă kman hơđuh đĭ kơtang ƀơi hơdôm boh să, phương lĕ yua ayuh hyiăng pơplih ƀu hơmâo thâo, ngă gêh gal brơi keč čeh čar. Tơlơi bơngơ̆t dong, ƀơi hơdôm boh plơi pla kual ataih, bruă pơkŏng lui ia amăng ƀung bai, ƀu hơmâo gơnam klup sir, laih dong ƀu rơmet pơagaih asuk ruk, djah djâo jum dar sang mơng sa, dua boh sang anŏ jing ngă anih keč čeh čar.

Ƀơi anăp kơ tơlơi tơnap tap anai, Anom bruă wai pơgang tơlơi duam ruă tơring čar Dak Lak glăk gum hrŏm kjăp hăng anom bruă ia jrao pok pơhai ha amăng plĕ hơdôm hơdră pơgang. Hrŏm hăng bruă pruih ia jrao, bruă pơtop hrăm hăng hrưn đĭ klă bruă pơhŭi hlâo brơi hơdôm sang ia jrao să, phương glăk jing bruă kiăng đing nao. Lăi nao hơdră bruă phun anai, ơi ia jrao Lê Phúc, kơ-iăng Khua anom bruă pơgang tơlơi duam ruă tơring čar Dak Lak brơi thâo: “Ƀing gơmơi pơhlôm ngă klă hăng ngă tañ bruă pơgang vec-tơ, anai lĕ bruă krăo lăng, pruih ia jrao pơdjai keč, arŏng aroač brơi hơdôm boh sang ia jrao ƀơi ƀon lan anun lĕ sang ia jrao să, phương. Mơng anun, pơhlôm klă bruă mă mơng ƀing gơñu kiăng lăp djơ̆ hăng bruă pơhŭi hlâo amăng djop ƀon lan, kiăng ngă gêh gal kơ bruă pơhŭi hlâo kah hăng ba glăi tŭ yua amăng bruă pơgang duam đung drah”.

Tơlơi gir run mơng gơnong bruă ia jrao prong biă, samơ̆ bruă pơgang duam đung drah amra truh kih lơm hơmâo tơlơi gơgrong mơng mơnuih ƀôn sang. Plih hĭ tơlơi pơmĭn truh hrơi hơmâo kman kah pơgang, rĭm boh sang anŏ kiăng pioh 10 mơnit rĭm wŏt hrơi tơjuh kiăng klŭp hĭ abih gơnam pơkŏng ia, rơmet pơgaih hăng ngă tui tơlơi juăt akă mông sơker lơm pit đih. Kiăng răng kơđiăng mơng bruă anet kiăng pơgang brơi tơlơi suaih pral amăng sang anŏ hăng pơgang tơlơi hơdip hơđong amăng plơi pla bơyan hơjan hlim anai.