Hơdôm hrơi anai, Anih pơjrao Čơđai, Sang ia jrao prong kual Dap Kơdư (Dak Lăk) kơhniă anih đih pơjrao, hơmâo lu biă mă mơnuih duam đung drah. Glăk dŏ wai tơčô ñu 6 thun pơjrao duam đung drah pơ anai, ơi Y Noel Byă, să Ea K’tur, brơi thâo tơčô ñu duam uh, pơ-iă drơi kơtang biă rơbêh kơ ha wơ̆t hrơi tơjuh anai laih. Năng blung, gơñu blơi mă ia jrao duam đôč, samơ̆ mơñum ƀu plai ôh. Truh kơ duam kơtang hơdôm hrơi, lăng jai kơtang tui kah sang anŏ mơ̆ng ba ană tơčô gơñu nao pơ sang ia jrao: “Tơčô kâo ñu duam, pơ-iă drơi, pơkă lăng truh kơ 40 đô̆ C. Truh năng ai 2 mông yang hrơi dah, pơkă lăng ăt dŏ 40 đô̆ C mơn, pơ-iă drơi čuk čak, anun jing gơmơi ba nao pơjrao giong anun arăng brơi đih sang ia jrao hlao mơtăm”.

Tui hăng anun mơn, amon Phùng Lê Gia Phú đih pơ sang ia jrao tơdơi kơ ha wơ̆t hrơi tơjuh duam kơtang. Ñu brơi thâo, ñu juăt pit ƀu akă musker ôh, anih hrăm thim hai hơmâo lu kač mơn: “Kâo pit juăt laih ƀu akă miker, giong anun anih kâo hrăm apah hai hơmâo lu keč mơn. Hrơi 3 tom adih anai, tơdơi kơ glăi mơ̆ng hrăm, kač kĕ kâo briu brao, giong anun duam hlao, drơi pơ-iă truh kơ 40 đô̆”.

Ơi ia jrao Trần Thị Thúy Minh, Khua anih pơjrao čơđai, Sang ia jrao prong Dap Kơdư brơi thâo, rim hrơi gơñu čơkă rơbêh 40 čô čơđai duam đung drah, đĭ năng ai 15% pơhmu hăng bơyan anai thun hlâo. Lu mơnuih ruă hnưr thun mơ̆ng 1 truh kơ yŭ 15 thun, amăng anun, ƀu ƀiă ôh mơnuih yua nao pơ sang ia jrao kaih, duam kơtang, bơkơhñăk drơi jăn ƀudah hơmâo anŏ hŭi rơhyưt kơtang laih. Tui hăng ơi ia jrao Minh,  kiăng pơgang hlâo ruă duam đung drah, mơnuih ƀôn sang kiăng pruih, pơdjai kač, tlâ̆o vắc xin pơgang kơ ƀing čơđai, wơ̆t hăng ƀing tha ta hai kar kăi mơn: “Bruă kiăng pơgang hlâo lĕ ta tlâ̆o vắc xin. Ră anai, ƀing ta hơmâo laih vắc xin pơgang duam đung drah klă hăng tŭ yua biă mă kơ ƀing čơđai wơ̆t hăng ƀing tha. Tơdah aka ƀu tlâ̆o vắc xin hai ăt kiăng pơtô brơi čơđai anăm ngui, dŏ hrăm ƀơi anih hơmâo lu kač ôh. Laih dong tơdah čơđai ruă lĕ kiăng nao hlao pơ sang ia jrao mơtăm yơh đah mơ̆ng hơmâo khăm, pơkă lăng, laih anun pơjrao brơi hmao kru”.

Mơ̆ng akŏ thun truh kơ ră anai, tơring čar Dak Lăk hơmâo giăm 2.500 čô mơnuih duam đung drah, ƀơi 102 boh să, phường, đĭ năng ai 10% pơhmu hăng thun hlâo. Hơdôm anih hơmâo klin prong pơƀut ƀơi să Ea Na, Ea Drăng, Ea Súp, Phú Hoà 1 hăng phường Buôn Ma Thuột. Ơi ia jrao Hoàng Hải Phúc, Khua anom bruă pơgang klin duam ruă tơring čar Dak Lăk, brơi thâo mơnuih ruă lu tui yua mơ̆ng lu phun tơhnal mơn, amăng anun bơngơ̆t biă ñu lĕ yua ană plơi ƀu kơđiăng, pơ-ai mă pô. Lu sang anŏ aka ƀu rơmet rơmot anih dŏ, hơmâo kơthung pơđŭ ia, get pơčah ƀu yua, ƀudah aka ƀu ngă hrŏm hăng sang ia jrao ôh lơ̆m nao pruih jrao pơ anih hơmâo klin. Rơngiao kơ anun, bruă pơgang, pơdjai klin kman pơ plơi pla ăt tơnap mơn. Adai djơ̆ hrơi pơ-iă, ƀơi ñu hơjan, anun yơh pruih jrao ƀu rơ-ua đơi ôh; lu sang ia jrao să kơƀah măi pruih, tơguan mơ̆ng sang ia jrao prong soh; prăk blơi ia jrao hăng măi či pruih ăt kơƀah mơn.

Tui hăng ơi ia jrao Phúc, anom bruă ia jrao kiăng hơdôm boh sang ia jrao să, phường prăp lui djŏp mơnuih, gơnam yua tui tơlơi pơtrun ngă bruă “4 ƀơi anih”; laih dong pơtrut pôr pơthâo, pơtô pơblang, iâu pơthưr mơnuih ƀôn sang rơmet rơmot anih dŏ, pơdjai ană kač, hơdrip, laih anun lăi pơthâo hăng gong gai brơi nao prăk đah mơ̆ng pơgang klin: “Ƀing gơmơi git gai laih kơ Sang ia jrao hơdôm boh să, phường khŏm ngă bruă 4 ƀơi anih. Lơ̆m ƀu dưi ngă dong tah jing lăi pơthâo kơ Gơnong bruă ia jrao tơring čar, hơdôm boh sang ia jrao prong amăng să đah mơ̆ng djru ba hlao. Hyu pôr pơthâo, iâu pơthưr mơnuih ƀôn sang kih rơmet agaih sang anŏ, lan sang’.

Duam đung drah jing tơlơi ruă ƀă hyu samơ̆ dưi pơgang mơn, samơ̆ dưi pơgang lơ̆m rim čô mơnuih thâo pơmin đôč. Amăng hrơi blan lu mơnuih ruă ƀă kman duam đung drah ƀơi Dak Lăk, bruă pơdjai ană kač, ană hơdrip, pơgang hŭi kač kĕ, tlâ̆o vắc xin tui hăng tơlơi pơtô ba laih anun nao hlao pơ sang ia jrao mơtăm lơ̆m đing ruă, ƀu kơnong pơgang drơi pô đôč ôh, ăt djru pơgang klin hŭi kơ lar hyu pơkŏn dong./.