Čơđai anun hmâo ba nao pơjrao ječ ƀơi Sang ia jrao lơm 10 mông mlăm lơ 18/12 amăng tơlơi tơngan săn amuk, rơka ƀơi mơta gah hnuă yua kơ mlăi pơtuh. Ơi ia jrao Trần Minh Trực – Khua Anom pơkă, pơjrao rơka ruă Sang ia jrao prong kual Dap Kơdư, brơi thâo, yua kơ nam rơka kơtang đơi, ƀing ơi ia jrao hmâo trơ̆i lui 3 ƀĕ čơđeng tơngan gah iao, hrŏm hăng anun pơsir nam rơka ƀơi kual mơta.

Tơlơi suaih pral nô anet ră anai hơđong laih, samơ̆ tơlơi ruă bơbrah amra kơtang. Hlâo kơ anun, Sang ia jrao ăt tŭ mă mơ̆ng 4 čô čơđai rơka rua yua kơ mlăi pơtuh pơkra mă. Ƀing ơi ia jrao lăi pơtă, Tết giăm truh, čơđai muai amuñ bơdjơ̆ nao bruă pơkra mă mlăi tui jơlan face book, ba truh lu tơlơi huĭ rơhyưt. Ƀing amĭ ama čơđai hăng sang hră kiăng kơtưn lăi pơhing hyu pioh pơgang pơhlôm kơ čơđai./.