Anăp nao tal hơdor glăi 76 thun hrơi tơhan rơka-tơhan djai pơsăn drơi, kông ti TNHH sa ding kơna 715 (Binh đoàn 15) pơphun khăm tui tơđar hăng ƀơk jrao soh sel brơi ƀing kông nhơn, mơnuih mă bruă amăng kông ti hăng ƀing mơnuih tui hơdră djru ƀơi hơdôm boh să giăm guai tơring čar Gia Lai. Pơphun dong mơng lơ 20 trun lơ 27/7, Sang ia jrao Quân dân y - Kông ti TNHH sa ding kơna 715 hơmâo khăm brơi 1.200 čô kông nhơn, ƀing apăn bruă Ping gah, tha plơi, khua plơi, mơnuih arăng đăo gơnang, tơhan rơka, hơdôm sang anŏ tui hơdră djru ƀơi să Ia O, Ia Khai, Ia Chía (tơring glông Ia Grai, Gia Lai) kiăng tañ ĕp ƀuh tơlơi ruă kă ƀudah hơdôm nam ruă kraih kiăng tañ pơjrao brơi.

Tơdơi kơ mông khăm hăng črâo ba, kông ti hơmâo ƀơk jrao soh sel brơi hơdôm boh sang anŏ. Bruă khăm, ƀơk jrao soh sel hơmâo kông ti 715 pơphun rĭm thun hăng hơnong pơkă ngă tui klă kah pha, sem lăng tơlơi suaih pral ƀing kông nhơn, mơnuih mă bruă tui tơlơi pơkă. Laih dong črâo brơi, khăm pơjrao brơi ƀing tơhan rơka, tơhan duam ruă, ƀing tui hơdră djru, mơnuih arăng đăo gơnang, khua plơi, tha plơi kiăng pơhlôm brơi tơlơi suaih pral, hrưn đĭ amăng tơlơi hơdip mơda. Ƀrô tal anai, kông ti 715 ăt jao 300 gơnam brơi ƀing mơnuih tui hơdră djru amăng tơring glông Ia Grai.