Amai Võ Thị Tuyết Nhung, mă bruă ƀơi Khoa Tiêu hoá – Eh mơañă, jing sa čô mơnuih rơgơi mơbruă hmư̆ ư biă mă. 9 thun mă bruă, ƀu kơnong djru wai lăng, pơjrao brơi ƀing čơđai muai đôč ôh, ñu lu wơ̆t pơpha brơi drah lơ̆m kiăng ječ. Truh ră anai, ñu hơmâo laih 22 wơ̆t pơpha brơi drah, djru bơhơdip lu čơđai ruă kraih, hăng ñu, rim wơ̆t brơi drah jing ha wơ̆t dong dưi hơdip glăi: “Lơ̆m kiăng ječ ameč tui anun, jing kâo pơmin či brơi nao drah kơ ƀing čơđai đôč, kiăng gơñu dưi hơdip. Mông anun kâo mưn mơak biă mă amăng pran jua, yua dah kâo dưi ngă sa bruă klă djru kơ arăng. Ƀu kơnong hơjăn kâo đôč ôh ngă bruă anai, hơmâo tom rơkơi kâo, amĭ kâo, ayong amai adơi kâo dong, laih anun rim wơ̆t iâu pơyơr drah lĕ abih bang sang anŏ gơmơi leng kơ nao pơyơr drah soh. Lơ̆m kiăng djru mơnuih ruă ječ, kiăng djuai drah hơget hơget dong, gơmơi pơpha brơi mơtăm yơh kơ ƀing ruă”.

Hrŏm hăng amai Nhung, pơyơr drah djru mơnuih jing bruă juăt laih hăng ƀing ơi ia jrao, mơnuih mă bruă amăng Sang ia jrao pơjrao Čơđai Gia Lai. Khua amăng anih pơjrao kah hăng Đỗ Thị Thu Hà brơi thâo: “Kâo pơmin drah ta drơi nao djru bơhơdip sa čô mơnuih, kâo pơmin jing bruă yom biă mă. Lơm brơi drah lĕ kâo ƀu pơmin nao bruă prong hơget lơi. Lơ̆m ƀuh pô ruă kiăng drah, ruă kraih, jing kâo pơmin tơdah kâo dưi brơi lĕ kâo brơi nao mơtăm yơh”.

Ƀudah pơ anih djru mơnuih ruă kraih kah hăng ơi ia jrao Rmah Din hơmâo lu wơ̆t laih pơyơr drah, ñu lăi: “Abih bang mơnuih mă bruă ia jrao pơ Sang ia jrao pơjrao ƀing čơđai anai leng kơ hơmâo tơlơi pơmin pơyơr drah khăp pap djru mơnuih ruă. Pran jua yua kơ mơnuih ruă yơh phun, anun jing ƀing ơi ia jrao ƀudah ƀing điều dưỡng lăng ba mơnuih ruă, ƀudah ƀing mă bruă pơkŏn mơ̆ng sang ia jrao tŭ ư̆, mơak ngă bruă pơpha brơi drah djru mơnuih ruă”.

Ƀuh bruă pơjrao mơnuih ruă drah ƀu thâo kŏng mơ̆ng nge (Thalassemia) mơ̆ng ană ñu pơ Sang ia jrao pơjrao Čơđai Gia Lai, amai Nông Thị Tươi, dŏ pơ să Ia Piơr ol kơdol biă mă hăng tơlơi djru ba mơ̆ng ƀing ơi ia jrao pơ anai. Amăng mông kiăng pơjrao ječ ƀudah lơ̆m drah amăng sang ia jrao dŏ aset, sit ƀing ơi ia jrao yơh ƀu hŭi ruă ôh, pơpha brơi drah djru brơi ƀing čơđai duam ruă: “Ană kâo ñu hơmâo tơlơi ruă drah ƀu thâo koưng, laih anun rim blan mut pơ anai pơmut drah, khŏm pơmut drah na nao kah dưi. Laih anun pơ anai hơmâo prăp lui drah pơmut brơi čơđai kiăng gơñu suaih pral”.

Hơdôm tơdjoh drah khăp pap anai ƀu kơnong djru bơhơdip lu mơnuih ruă đôč ôh, ăt bang hyu dlăm, prong hloh tơlơi pôr hơdor tơngia amăng plơi pla. Anun ăt jing tơlơi pơsit brơi tơlơi pơtô “Ơi ia jrao kar hăng amĭ rơmuih” lơ̆m ƀing nai ia jrao ƀu kơnong pơjrao mơnuih ruă đôč ôh, ăt brơi nao tơlơi đăo kơnang dưi hơdip kơ mơnuih pơkŏn, hăng sit hơdôm bruă ngă ƀu prong ôh samơ̆ yom biă mă./.