VOV4.Jarai - Mơguah lơ 1/12, ƀơi plơi prong Kontum, Jơnum min mơnuih ƀôn sang tơring čar Kontum pơphun ngă Lơphet tŭ mă gơnam tam mă yua gah ia jrao pioh kơ bruă pơgang, pơgăn klin Covid-19 yua kơ tơring čar Bình Dương ƀơk brơi. Tŭ mă bruă jao mơng Ping gah tơring čar, Jơnum min mơnuih ƀôn sang tơring čar Bình Dương, khua pơ ala kơ Jơnum min djop djuai ania mơnuih mơnam dêh čar Việt Nam tơring čar Bình Dương hăng Gơnong bruă ia jrao tơring čar Bình Dương hmâo ƀơk brơi laih tơring čar Kontum sa dua mơta gơnam tam gah ia jrao djru tơring čar yua kơ bruă pơgang, pơgăn klin Covid-19, amăng anun hmâo: 200 bôh sưng pơsơi, 100 bôh măi pơjing oxy, 200 bôh măi pơkă SPO2 hăng 520 ƀĕ gai pơkă pơ-iă drơi jăn.

Khua pơ ala tơring čar Bình Dương ƀơk brơi gơnam yua pơgang, pơgăn klin Covid-19 kơ tơring čar Kontum

Truh ră anai tơring čar Kontum hmâo rơbêh kơ 600 čô mơnuih ƀă kơman Covid-19, amăng anun hmâo 44 čô mơnuih ƀă amăng plơi pla hăng akă hmâo mơnuih hơpă ruă kraih gah tal mơnuih 2, 3. Phrâo tom adih anai tơring čar Kontum hmâo pơkiăo nao 30 čô mơnuih mă bruă ia jrao djru mơnuih mă bruă kơ tơring čar Bình Dương pơgăn klin. Bôh nik gum hrom wai lăng, pơjrao hơdôm mơnuih F0 lĕ hơdôm tơlơi găn rơgao yôm phăn glăk dưi hmâo gơnong bruă ia jrao mơng tơring čar pok pơhai mă yua ƀơi hơdôm anih anom pơjrao./.

Siu H’ Prăk: Pô pơblang