VOV4.Jarai - Pơtrut hơdôm rơwang bruă, akô̆ bruă pơhrŏ trun ƀun rin, pơđĭ kyar bơwih ƀong – mơnuih mơnam kual neh wa djuai ania ƀiă ƀơi Lâm Đồng lu thun rơgao hmâo tơlơi gum hơgô̆p yôm phăn mơng hơdôm mơnuih đăo gơnang, ƀing tha plơi, khua ƀôn amăng lăi pơhing, pơsur, đơ đam tơring čar ră anai hmâo 479 čô mơnuih hmâo arăng đăo gơnang glăk dô̆ hơdip mơda, bơwih ƀong ƀơi hơdôm bôh plơi pla kual neh wa djuai ania ƀiă.

Lu mơnuih arăng đăo gơnang ƀơi Lâm Đồng leng kơ dưi pơhrăm, pơhrăm hrơi bôh thâo tơlơi phiăn, bôh thâo lăi pơhing kiăng mă yua amăng tơlơi hơdip mơda rim hrơi ƀơi kual mơnuih ƀôn sang dô̆. Rim thun, Jơnum min djop djuai ania mơnuih mơnam tơring čar leng kơ pơphun bơni, apah pri, djru gum, ƀơk gơnam tam hăng mơnuih hmâo arăng đăo gơnang mơbruă, hmâo lu tơlơi gum hơgŏp klă. Lâm Đồng hmâo pioh laih 3 klai 700 klăk prăk rim thun pioh djru, ngă tui hơdră bruă pioh kơ mơnuih hmâo arăng đăo gơnang amăng tơring čar./.

Siu H’ Prăk: Pô pơblang