VOV4.Jarai-Yap mơ̆ng 12 mông lơ 22/9, tơring glông Dak Rlâp, Dak Nông abih yơh guang dar dŏ pơčlah mơnuih mơnam tui hră pơčrâo 16. Đơ đam tơring glông pơblih ngă tui hră pơčrâo 15. Samơ̆, klin kheng ăt dŏ hŭi đôč, Jơnum min mơnuih ƀôn sang tơring čar Dak Nông pơtrun hiăp kơ Jơnum min mơnuih ƀôn sang tơring glông Dak Rlâp ngă tui hơdôm hơdră pơhlôm, pơgang klin Covid 19 tui hră pơčrâo 15 pơgôp ƀơi să Dak Ru hăng să Quảng Tín jing dua boh să hơmâo lu mơnuih ƀă klin.

Hăng anih anom sĭ mơdrô bơwih bơwăng mơnong ƀong huă ter jơlan prong dêh čar, kơnong sĭ blơi ba glăi đôč. Ƀơi anih dŏ pơčlah, ƀing F1 ăt khom dŏ pơčlah dơ̆ng 7 hrơi. Tơring glông pơtă pơtăn mơnuih ƀôn sang anăm tơbiă hyu đơi pơ rơngiao ôh, ngă djơ̆ hơdră pơhlôm, pơgang klin Covid 19, kiăng khut khăt pơgăn klin anăm  brơi hơđuh rai dơ̆ng. Yap truh lơ 22/9, tơring čar Dak Nông čih pioh hơmâo 664 čô mơnuih ƀă kman sars-cov-2. Amăng anun, tơring glông Dak Rlâp 314 čô. Đơ đam tơring glông ră anai hơmâo 242 čô mơnuih hlao laih glăi pơ sang anŏ, 1 čô mơnuih djai yua klin anai.

Nay Jek : Pơblang