VOV4.Jarai -  Kiăng djru hmao tlôn kơ mơnuih ƀôn sang amăng kual dô̆ čơlah, biă ñu hơdôm bôh sang anô̆ ƀun rin, sang anô̆ neh wa djuai ania ƀiă, sang anô̆ hmâo tơlơi hơdip tơnap tơring glông Dak R’lấp, tơring čar Daknông hmâo pơsur neh wa gum hơgôp hmâo rơbêh kơ ha rơtuh tơn braih piang, gơnam ƀong huă hăng añăm pơtăm hơbơi pơtơi. Kiăo tui anun, mơng lơ 7/9 truh ră anai, tơring glông Dak R’lấp hmâo pơsur rơbêh kơ 55 tơn braih, 66 tơn añăm pơtăm, bôh troh, hơbơi pơtơi, giăm truh 1.300 anung gơnam hăng rơbêh kơ 300 klăk prăk djru mơnuih ƀôn sang pơgang, pơgăn Covid-19. Hrom hăng anun djru mơnuih ƀôn sang kual dô̆ čơlah, guang dar, tơring glông hmâo pơpha braih, añăm pơtăm, hơbơi pơtơi, bôh troh truh pơ̆ hơdôm kual dô̆ čơlah hơbit ƀơi tơring glông. Jing anih anom blung a ƀơi Daknông ngă tui dô̆ čơlah – guang dar kiăng pơgăn Covid-19, ơi Phạm Văn Hải, Khua Jơnum min mơnuih ƀôn sang să Quảng Tín, tơring glông Dak R’lấp brơi thâo, hăng tơlơi dŏng yua, gum tơngan hrom mơng hơdôm bôh ƀirô, anom bruă hăng mơnuih ƀôn sang, hơdôm bôh sang anô̆ hăng mơnuih ƀơi kual dô̆ čơlah, guang dar, hmâo djop braih huă, gơnam ƀong. 2 anih anom tơnap hloh yua klin Covid-19 ngă lĕ ƀôn Bu Bir hăng Bu Dzách, truh ră anai klin ruă dưi wai lăng hăng tơlơi hơdip mơnuih ƀôn sang pơwot glăi kah hăng tơđar laih./.

Siu H’ Prăk: Pô pơblang