VOV4.Jarai-Ƀơi anăp kơ tơlơi kiăng pơsir bruă mă brơi hơdôm rơbâo čô mơnuih glăi mơ̆ng lu tơring čar pơ kual dơnung hơmâo klin covid 19, tơring glông Krông Ƀŭk, Dak Lak hlăk ngă hơdră ĕp lăng anŏ gêh găl pơsir bruă mă hăng ĕp hơdră bơwih ƀong huă ƀơi anăp mơta ăt kah hăng pơmin nao kơ bruă sui thun, kiăng djru pơsir bruă mă kơ mơnuih ƀôn sang glăi mơ̆ng anih mă bruă apah glăi pơ plơi pla pô yua hŭi klin kheng.

Abih hrơi dŏ pơčlah tơdơi kơ glăi mơ̆ng anih hơmâo klin, đĭ rơdêh thut truh pơ plơi pla, Y Ngok Niê, ƀôn Ktơ̆ng Drun, să Čư̆ Nĕ, tơring glông Krông Ƀŭk hlăk hơduah ĕp bruă mă djơ̆ lăp ƀơi plơi pla. Y Ngok Niê brơi thâo, hlâo adih ñu mă bruă amăng sang măi kơ kông ty či plơi prong Bến Cát, tơring čar Bình Dương. Yua kơ klin Covid 19 jing klin kheng ƀă hyu tơnap tap biă mă, tơdơi kơ lu blan dŏ đôm glăi ƀơi Bình Dương, lơ̆m tơring čar anai hruă kjăp hơdră pơhlôm pơgang klin, mah ñu tlâ̆o djop 2 arăt vaccine laih samơ̆ yua kơ bruă mă ƀu hơđong, tơlơi hŭi ƀă klin dŏ ƀel na nao ƀơi klôn, mrô prăk pơkom pioh mă yua abih laih, Y Ngok Niê khut khăt rơkâo glăi pơ plơi pla pô yơh kiăng bĕ hĭ klin laih anun hơduah ĕp bruă mă giăm sang.

Mơ̆ng blan 5 truh ră anai, tơring glông Krông Ƀŭk hơmâo tŭ jum rơbêh 6000 čô mơnuih glăi mơ̆ng hơdôm tơring čar gah dơnung

“Kâo dŏ pơmin tơguan hơđong ƀiă amra hơduah ĕp bruă mă djơ̆ găl pơ plơi pla pô. Yua kâo hor mơgăt rơdêh laih anun hơmâo laih ƀăng mơgăt rơdêh anun yơh tơdah abih klin, kâo amra ĕp bruă mă ƀơi sa boh kông ty ƀudah sang bruă sĭ mơdrô pơpă thơ rơkâo mơgăt rơdêh arăng. Ră anai dŏ pơ sang yơh jăng jai djru bruă ngă hmua, ăt truh bơyan pĕ kơphê anun kâo amra hyu pĕ kơphê arăng apah ĕp prăk kăk pơhrui glăi”.

Yua sang anŏ tơnap tap, ƀu hơmâo lŏn ngă hmua anun yơh sui mơ̆ng anai 2 thun, Lương Văn Hữu, dŏ pơ ƀôn Čư̆ Mtâo, să Êa Sin, tơring glông Krông Ƀŭk, nao pơ Bình Dương ngă kông ñơn. Mơ̆ng rơnuč blan 5, lơ̆m klin Covid 19 ƀă hyu tơnap tap ƀơi hơdôm tơring čar gah dơnung, kông ty gơñu mă bruă pơhrŏ hĭ mrô mơnuih mă bruă apah, ñu khom glăi pơ plơi pla đuăi kơ klin. Amăng hrơi blan dŏ tơguan ĕp bruă mă, Hữu čih anăn rơkâo nao ngă bruă hrom ƀing hlăk ai tơdăm dra pơyơr pran jua  djru bruă pơhlôm pơgang klin ƀơi plơi pla gơñu pô.

“Kâo glăi pơ plơi, ƀuh hơdôm mơnuih hyu djru kơ arăng gơñu ngă bruă tơnap tap đơi, kâo dŏ pơ sang adai hơjan djơh hăng anai ăt kŏn thâo mă bruă hơgĕt lơi, anun rơkâo nao djru hrom adơi ayong, hyu gum ană plơi pla. Kâo čang rơmang klin kheng tañ abih pioh kơ tơlơi hơdip mơda bruă mă pơwơ̆t glăi kah hăng tơđar”.

Tui hăng ơi Hoàng Kiên Cường, Khua Jơnum min mơnuih ƀôn sang tơring glông Krông Ƀŭk, tơring čar Dak Lak, mơ̆ng blan 5 truh ră anai, tơring glông hơmâo tŭ jum năng ai 6000 čô mơnuih glăi mơ̆ng tơring čar Bình Dương, Đồng Nai hăng ƀôn prong Hồ Chí Minh, abih bang ƀing anun lêng kơ mơnuih hlăk mơdrah, hlăk ai hơmâo pran jua mă bruă, hyu ĕp ƀong huă. Lơ̆m hơmâo tŭ jum mơnuih ƀôn sang glăi pơ plơi, tơring glông hơmâo ngă tui hơdră pơčlah mơtam, pel ĕp bruă ia jrao, pơpha mơnuih laih anun brơi nao dŏ pơčlah tui tơlơi phiăn pơtrun kiăng pơgang rơnuk rơnua hăng klin.

Ră anai, đơ đam tơring glông hơmâo giăm 19.800 hektar hmua đang kơphê truh bơyan pĕ boh, him lăng boh kơphê pơhrui glăi 44.200 tơn asar. Tui hăng anun, kiăng hơmâo giăm 800 rơbâo hrơi bruă pĕ kơphê, dưm dưm hăng 27 rơbâo čô mơnuih mă bruă amăng 30 hrơi. Hơdôm thun hlâo adih, rĭm thun tơring glông khom jak iâu 6.600 čô mơnuih mă bruă rai mơ̆ng hơdôm tơring čar pơkŏn apah mă bruă pĕ kơphê.

Him lăng bơyan pĕ kơphê thun anai, Krông Ƀŭk kiăng 27 rơbâo čô mơnuih mă bruă

pĕ kơphê amăng 30 hrơi

Thun anai, yua klin kheng tơnap tap anun yơh mrô mơnuih mă bruă ƀu hơmâo ôh, pơhrua kơ anun, tơring glông amra pơtum ƀing glăi mơ̆ng anih pơkŏn, hlơi huăi djơ̆ klin nao mă bruă apah, pĕ kơphê hmao bơyan, pơsir bruă mă ƀơi anăp mơta kơ mơnuih ƀôn sang blung hlâo. Ơi Hoàng Kiên Cường lăi:

“Ƀơi anăp mơta lĕ amăng bơyan pĕ kơphê sit mơ̆n mơnuih mă bruă amra kơƀah laih anun pơhrua hăng mơnuih mă bruă hơdôm ƀing glăi mơ̆ng tơring čar gah kual dơnung glăi pơ plơi pla pioh pơsir bruă mă ĕp ƀong huă jăng jai.

Pơmin nao pơ anăp sui thun lĕ kiăng hơđong tơl abih klin kah ăt pơtrut bruă pơtô hrăm, pơtô bruă mă laih anun pơsir bruă mă; iâu pơthưr lu sang bruă bơwih ƀong sĭ mơdrô tuh pơ alin ngă hiư̆m pă hơmâo bruă mă, pơsir bruă kơ mơnuih ngă kông ñơn anun hơmâo bruă mă amăng tơring glông, boh nik ñu mơnuih ngă kông ñơn glăi mơ̆ng hơdôm tơring čar pơ dơnung”.

Tui hăng mrô jŭ yap mơ̆ng Gơnong bruă wai lăng Bruă mă Tơhan rơka hăng Mơnuih mơnam tơring čar Dak Lak, mơ̆ng blan 7.2021 truh ră anai, đơ đam tơring čar hơmâo rơbêh 75 rơbâo čô mơnuih glăi mơ̆ng hơdôm tơring čar gah dơnung adih, kơnong akŏ blan 10 phrâo rơgao, hơmâo giăm 26 rơbâo čô. Amăng anun lu kơ mơnuih ngă kông ñơn mă bruă pơ anih tuh tia pơkra pơjing sa ƀut ƀơi Bình Dương, Đồng Nai, ƀôn prong Hồ Chí Minh.

Kiăng djru ba khul mơnuih anai, Gơnong bruă wai lăng Bruă mă Tơhan rơka hăng Mơnuih mơnam tơring čar ĕp lăng djop tơring glông, hơmâo anih kiăng hơduah mơnuih mă bruă tơdơi kơ abih klin pơphun brơi mă bruă. Kơnong hơdôm čô mơnuih mă bruă ƀơi tơring čar, Gơnong bruă wai lăng Bruă mă Tơhan rơka hăng Mơnuih mơnam ăt pơtrun hiăp kơ anom bruă wai lăng bruă mă ƀơi tơring glông, plơi prong čih anăn pioh ĕp bruă mă djru ba djơ̆ lăp.

Nay Jek: Pơblang