VOV4.Jarai - Mơguah lơ 24/8, Anom bruă git gai Jơnum boh thâo ia rơgơi gưl dêh čar ngă lơphet hơdor 110 thun hrơi tơkeng Đại tướng Võ Nguyên Giáp hơmâo nao čuă pơsat, tŭi ñang Khua tơhan Đại tướng Võ Nguyên Giáp ƀơi Vũng Chùa - Đảo Yến, să Quảng Đông, tơring glông Quảng Trạch, tơring čar Quảng Bình. Amăng hrơi mông abih bang dŏ kret, ƀing khua hơmâo djom nao dưm bơnga, tŭi ñang laih anun kup akŏ hơ-ŭ, pơpŭ kơ Đại tướng Võ Nguyên Giáp - sa čô mơnuih git gai prong, hơmâo tơlơi đăo gơnang prong mơng Ping gah, Kơnuk kơna hăng Mơnuih ƀon sang ta.

Nao čuă, tŭi ñang ƀơi pơsat Đaị tướng Võ Nguyên Giáp ƀơi Vũng Chùa - Đảo Yến.

Ƀrô tal anai, Anom git gai Jơnum boh thâo ia rơgơi gưl dêh čar ngă lơphet 110 thun hrơi tơkeng Đại tướng Võ Nguyên Giáp nao tŭi ñang kơ Đại tướng ƀơi Sang djă pioh gơnam đưm Đại tướng Võ Nguyên Giáp, să Lộc Thủy, tơring glông Lệ Thủy, tơring čar Quảng Bình; nao čuă brơi gơnam kơ hơdôm boh sang anŏ gum kơkrŭ lŏn ia ta ƀơi tơring čar Quảng Bình. Ding jum ling tơhan ăt brơi măi mok phần mềm čuă lăng arăng iâu 3D ƀuh tơlơi hơdip, bruă mă mơng Đại tướng Võ Nguyên Giáp kơ tơring čar Quảng Bình.

Siu H’Mai: Pơblang