VOV4.Jarai - Ngă tui tơlơi pơkôl ngă hrŏm kơplah wah Ƀirô Khua pơ ala mơnuih ƀon sang dêh čar Việt Nam hăng Lao, mơguah hrơi anai, ƀơi Ƀirô Khua pơ ala mơnuih ƀon sang dêh čar, Jơnum min kơsem min boh thâo măi mok hăng wai lăng lŏn mơnai mơng Ƀirô Khua pơ ala mơnuih ƀon sang dêh čar Việt Nam gum hrŏm hăng Jơnum min pơtom hiăp mơng Ƀirô Khua pơ ala mơnuih ƀon sang dêh čar Lao pơphun jơnum lăng nao rai mơng ataih kiăng pơlăi nao rai tơlơi thâo thăo amăng čih pơkra tơlơi phiăn pơkă kăng kual hăng hră lơkak. Khua Jơnum min pơtom hiăp mơng Ƀirô Khua pơ ala mơnuih ƀon sang dêh čar Lao Sanya Praserth lăi rơđah, črăn tơlơi phiăn pơkă kăng kual hăng pơjing hră lơkak glăk mơng čih pơkra, him lăng amra mơ-it Ƀirô Khua pơ ala mơnuih ƀon sang dêh čar Lao tal 9 amăng jơnum lok dua, kiăng kơ pơsit glăi hơdôm tơlơi pơkă, hơdră wai lăng hăng krăo lăng, pel ĕp amăng bruă pơkă kăng kual, hră lơkak dưi ngă tui lăp djơ̆, tơpă sit, pơplih phrâo, mut hrŏm jar kmar. Khua jơnum min pơtom hiăp mơng Ƀirô Khua pơ ala mơnuih ƀon sang dêh čar Lao čang rơmang hơmâo tơlơi pơgôp hiăp hăng mă yua hơdôm boh thâo phâo amăng jar kmar amăng čih pơkra, ngă tui Tơlơi phiăn pơkă kăng kual hăng hră lơkak mơng Ƀirô Khua pơ ala mơnuih ƀon sang dêh čar Việt Nam.

Siu Đoan: Pơblang