VOV4.Jarai-Tlam mơmŏt lơ 26/5, ƀơi sang jơnum khua mua pơ ala mơnuih ƀôn sang dêh čar, Khul khua mua pơ ala mơnuih ƀôn sang Việt Nam nao jơnum khul khua mua pơ ala mơnuih ƀôn sang rŏng lŏn tơnah tal 142 tui hơdră lăng  nao rai amăng tivi.

Việt Nam jơnum hrom pok pơhai jơnum prong khul khua mua pơ ala mơnuih ƀôn sang rŏng lŏn tơnah tal 142

Khul khua mua pơ ala gah Việt Nam, yua kơ Ding kơna Ding jum kơđi čar, Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn ngă khua khul jơnum hrom, pơčrông sai akŏ bruă “Găn rơgao klin kheng hrơi anai hăng man pơdong bruă mă kơñ pơgi ni anăp hiam klă hloh: Tơlơi gơgrong mơ̆ng anom bruă pơ ala mơnuih ƀôn sang dêh čar”.

Nao jơnum pơhiăp đĭ mông bơblih pơčrông sai, Kơ-iăng Khua git gai pơ ala mơnuih ƀôn sang dêh čar ta ơi Trần Thanh Mẫn brơi thâo: Hăng pran jua ngă bruă “pơkơdong glăi klin kah hăng blah ayăt”, Việt Nam hơmâo pơphun ngă bruă khut khăt, hmao kru, pơtum lu mơnuih ngă bruă amăng kơđi čar, pơsir run pran jua, ngă hrom abih bang mơnuih ƀôn sang. Việt Nam ăt ngă tui dua bruă pơđĭ kyar, pơgăn rah klin tŭ yua, pơgang tơlơi suaih pral mơnuih ƀôn sang laih anun pơđĭ kyar rah tơlơi bơwih ƀong huă kơ mơnuih mơnam, pơhlôm hơđong tơlơi hơdip mơda mơnuih mơnam dêh čar.

Nay Jek: Pơblang