VOV4.Jarai -  Ăt măng jơlan hơdră bruă mă ƀơi dêh čar Mi, Khua mir sir dêh čar ta ơi Nguyễn Xuân Phúc hmâo tơlơi pơhing mơ-ĭt kơ Jơnum prong mơng Sang gum hơbit djop dêh čar  kơ Glông bruă braih piăng yua kơ Khua čih pioh gah Sang gum hơbit djop dêh čar ơi Antonio Guterres git gai. Khua mir sir dêh čar ta ơi Nguyễn Xuân Phúc hmâo ba tơbiă sa dua jơlan gah pơhlôm rơnuk rơnua braih piăng ƀơi anăp tơlơi pơplih ayuh hyiăng hăng klin ruă Covid-19 hăng brơi thâo, Việt Nam kiăng jing anom phun pơčeh phrâo braih piăng, gơnam ƀong huă ƀơi kual. Amăng tơlơi pơhiăp, Khua mir sir dêh čar ta ơi Nguyễn Xuân Phúc lăi rơđah, gum hrom kơplah wah hơdôm bôh dêh čar, hơdôm bơnah gum hrom, bôh than amăng glông bruă braih piăng, gơnam ƀong huă khom yua kơ bôh tŭ yua mơng mơnuih ƀôn sang. Ƀơi dêh čar Việt Nam, pơhlôm braih piăng jing phun than hrŏ trun rin rơpa, pơđĭ tui tơlơi hơdip mơnuih ƀôn sang hăng jing tơhnal gal pơđĭ kyar bruă đang hmua Việt Nam rơđah rơđông, gơgrong, kơjăp phik. Kiăng pơđĭ kyar kơjăp glông bruă braih piăng, Khua mir sir dêh čar ta ơi Nguyễn Xuân Phúc lăi lĕ, kiăng pơhư prong gum hrom jar kơmar amăng kơsem min, pơkă lăng hlâo, pơdŏng glông bruă pơhing lăi pơtă hlâo tơlơi amra truh mơng ayuh hyiăng, klin ruă; wai lăng kơjăp kông ngăn dlai klô lŏn ia, lu mơta ra mơnong hăng dlai klô; Wai lăng ia yua hluh gah guai dêh čar, kông ngăn ia rơsĭ./.

Siu H’ Prăk: Pô pơblang