VOV4.Jarai - Mơguah lơ 24/11, (tui mông dêh čar anai), ƀơi Tokyo, amăng tal nao čuă sit nik dêh čar Japan, Khua dêh čar ơi Phạm Minh Chính nao pơhmư̆ mông jơnum pơbưp, ngă bruă tom khua mua grup bơwih ƀong prong mơng Japan amăng bruă pơplih mă yua boh thâo mrô. Ƀơi mông bưp, Khua dêh čar ơi Phạm Minh Chính brơi thâo: Hrơi blan rơgao, klin Covid-19 pơtrut pơđĭ kyar pơplih phrâo mă yua mrô kơtang biă ƀơi Việt Nam. Amăng 20 thun, mrô mơnuih mă yua boh thâo internet či ngă bruă kơnong hơmâo 2%, samơ̆ amăng 3 blan tal 1 lơ̆m hơmâo klin Covid-19, mrô mơnuih mă yua truh kơ 24%. Việt Nam  hơmâo 80% čô čơđai sang hră gưl anet prong hrăm mơng ataih amăng internet, lu hloh hăng mrô jŭ yap ƀơi rŏng lŏn tơnah lĕ 60%. Kơnuk kơna Việt Nam hơmâo lu tơlơi pơkôl pơkă, hơdră djru pơđĭ kyar hră pơ-ar, mrô jŭ yap amăng plang internet, dưi mut amăng mrô 50 boh dêh čar hơmâo hră pơ-ar, tơlơi pơhing amăng plang internet pok brơi abih bang lăng amăng thun 2025, dong mrô 30 amăng thun 2030. Pơhiăp ƀơi mông ngă bruă, Khua dêh čar ta lăi, pơplih phrâo mrô ƀu kơnong hơmâo tơlơi črâo ba mơng Kơnuk kơna đôč ôh mơ̆ ăt hơmâo tơlơi gum ngă mơng mơnuih ƀon sang hăng anom bơwih ƀong, mă ană mơnuih ta ngă phun, djŏp tơlơi ngă bruă khŏm kiăng klă kơ mơnuih ƀon sang hăng anom bơwih ƀong, mơnuih ƀon sang hăng anom bơwih ƀong gum hrŏm bruă pơplih phrâo mă yua mrô. Kơ hơdôm bruă rơđah rơđông mơ̆ ƀing khua lăp đing nao, Khua dêh čar lăi nao jơlan ngă bruă mơng Việt Nam lĕ pơplih tui rơnuk phrâo bruă prăk kăk, sang bruă prăk kiăng bruă anai nao hlâo pơplih ngă bruă tui boh thâo mrô.

Siu H’Mai: Pơblang