VOV4.Jarai - Tŏ tui bruă mă amăng hơdôm hrơi nao čuă sit nik pơ dêh čar Lao mơng Khua mir sir ơi Nguyễn Xuân Phúc, tlam lơ 9/8/2021, Đại tướng Phan Văn Giang, Khua ding jum ling tơhan hơmâo mông jơnum hăng Đại tướng Chansamone Chanyalath, Kơ-iăng Khua dêh čar, Khua ding jum ling tơhan dêh čar Lao. Amăng mông jơnum, dua bơnah pơdah anai lĕ hrơi mông kiăng kơ pơlăi nao rai, kơtưn ngă hrŏm amăng bruă ling tơhan laih dong gum pơgang klin Covid-19 glăk ngă tơnap tap ră anai; pơsit tong mah amăng rơnuk pơpă tŭ mơn, ling tơhan dua bơnah lêng gum hrŏm găn rơgao tơnap tap, tơlơi lông, wai pơgang hơdôm tơlơi dưi djă pioh glăi mơng rơnuk ơi yă. Pơ anăp anai, ding jum ling tơhan dua bơnah kiăng đing nao pel ĕp, kơsem min hơdôm hơdră pok pơhai ngă hrŏm brơi lăp djơ̆, hăng pran gir run kiăng kơ ngă hrŏm bruă pơgang rơnuk rơnua yua bơbeč mơng klin Covid-19, amăng anun kơtưn amăng bruă wai pơgang guai lŏn ia, pơgăn mơnuih mut nao rai lŏn ia ča čot.

Siu Đoan: Pơblang