VOV4.Jarai - Mơguah lơ 26/8, ƀơi Hà Nội, pơphun jơnum blung a Khul git gai pơjing akŏ bruă “Lăng glăi 15 thun ngă tui tơlơi pơsit Kơnuk kơna lok 5 (tal 10) kiăng tŏ tui pơplih phrâo bruă git gai mơng Ping gah amăng bruă mă mơng hơdôm anom bruă kơđi čar” mơ-it Jơnum Kơnuk kơna lok 6 (tal 13). Khua Khul pơphun bruă dêh čar yă Trương Thị Mai git gai mông jơnum. Yă Trương Thị Mai, Khua khul git gai Akŏ bruă rơkâo djop ding kơna amăng Khul git gai gum hrŏm hăng anom bruă lăng glăi tong ten, ruah hơdôm akŏ bruă lăp djơ̆. Tui anun, djop akŏ bruă kiăng kơ pơƀut glăi hơdôm bruă prong, akŏ phun, anăm lok nao lok rai, laih dong amra rơkâo sa, dua gưl, khul grup Ping gah lăi pơthâo bruă mă. Akŏ bruă kiăng kơ pơgiong amăng blan 9/2022. Laih dong pơtă pơtăn, dŏ kơnong ha thun kiăng kơ pok pơhai ngă tui, samơ̆ bruă mă ăt dŏ tơnap tap, yua anun, ƀing ding kơna amăng Khul git gai kiăng kơ tŏ tui kơsem min kiăng kơ pơgôp pơjing hră lăi pơthâo hăng hơdôm bruă mă djơ̆ hăng tơlơi glăm ba, bruă jao mơng Ping gah, Khul grup Ping gah mơ̆ ƀing ding kơna glăk ngă ră anai.

Siu Đoan: Pơblang