VOV4.Jarai - Pơjing bruă wai pơgang kjăp guai lŏn ia, pơgăn ƀing mơnuih ngă soh, pơtrut pơsur mơnuih ƀon sang jao glăi hơdôm rơtuh phao kơtuang, boh pơtuh, anai lĕ hơdôm boh than dưi ngă dong mơng hrơi kông ang chính quy glăi mă bruă ƀơi hơdôm să ƀơi tơring glông giăm guai Tuy Đức, tơring čar Dak Nông.

Pơsir hĭ bruă tañ hloh, tŭ yua, anai lĕ hơdôm tơlơi lăi pơthâo mơng neh met wa ƀơi hơdôm plơi pla ƀơi să Quảng Trực lơ̆m lăi nao ƀing kông ang chính quy glăi mă bruă ƀơi hơdôm să giăm guai anai. Amai Thị Bơi, dŏ ƀơi ƀon Bu Prăng 1, să Quảng Trực, tơring glông Tuy Đức, pơdah pran đăo gơnang hăng ƀing kông ang să tơdơi kơ sang anŏ ñu hơmâo bruă:

“Sang anŏ gơmơi hlâo anun ƀuh sa čô mơnuih măt tơpai djă thong kiăng kơ mut rai amăng sang klŏ pơdjai adơi amai gơmơi. Laih anun kâo iâu telephôn kơ kông ang hăng tơhan wai pơgang guai lŏn ia. Mah sang gơmơi ataih mơng să, samơ̆ đuăi nao rai giăm 10 mơnit đôč, tơdơi anun kông ang đuăi rai hmao tlôn mơn. Ƀing kông ang chính quy wai pơgang ƀơi anai hơđong biă mă, tơdah hơmâo bruă hơget thơ ƀing kông ang amra nao pơgăn hĭ mơtăm yơh”.

Amai Vũ Thị Mỹ Duyên, dŏ ƀơi ƀon Dak Huýt, să Quảng Trực, brơi thâo, neh met wa hơđong amăng pran jua biă mă lơ̆m hơmâo kông ang chính quy rai mă bruă:

“Sit biă ñu bruă pơhlôm rơnuk rơnua jai kjăp tui yơh. Ƀing kông ang lêng abih pran hăng neh met wa, mah tơhrơi kah mlăm hơmâo bruă hơget thơ lơ̆m neh met wa iâu kông ang amra nao mơtăm hăng pơsir hĭ tañ djop bruă”.

Ơi Điểu Drây, khua ƀon Bu Prăng 1, brơi thâo, neh met wa djuai ania ƀiă ƀơi kual giăm guai lŏn ia anai juăt ƀu hơmâo hră khai sinh ôh hăng dŏ kơƀah lu hră pơ-ar pơkŏn dong. Kông ang să hơmâo nao tơl sang, črâo brơi neh met wa ngă hră, čih djop tơlơi kiăng hlâo kơ ngă hră căn cước công dân.

“Lơ̆m neh met wa ngă hră pơ-ar bưp tơnap tap hơget thơ amra tơña kông ang să, kông ang juăt hyu pơtô pơblang, pơtă pơtăn, črâo ba neh met wa lơ̆m dŏ kơƀah hră pơ-ar hơget thơ, kiăng ngă hră hơget thơ. Kông ang să glăi pơ tơl plơi pla, kâo ƀuh anai lĕ bruă klă biă mă”.

Tui hăng Đại uý Trần Văn Dũng, Khua kông ang să Quảng Trực, 6 čô kông ang chính quy, rĭm čô hơmâo arăng pơtô brơi bruă phara, samơ̆ lơ̆m glăi pơ să, ƀing gơñu ăt hrăm nao rai dong, kiăng kơ rĭm čô lêng kơ thâo djop mơta bruă ƀơi ƀon lan. Hrŏm hăng bruă pơphô bruă brơi gưl Ping gah gong gai pơhlôm rơnuk rơnua na nao ƀơi kual giăm guai, kông ang să Quảng Trực hơmâo pơjing lu hơbô̆ bruă wai pơgang ƀơi djop plơi pla ala ƀon.

“Ƀing gơmơi hơmâo pơlir hăng hlăk ai mơng kông ang tơring čar djru brơi neh met wa 1.000 boh khoă, ƀơi anun lêng kơ čih mrô telephôn khua kông ang să, kơ-iăng khua kông ang să hăng mrô grup wai lăng mơng kông ang tơring glông Tuy Đức kiăng kơ neh met wa iâu tañ tơdah ƀuh hlơi thơ ngă soh sat. Hrŏm hăng anun ƀing gơmơi ăt pơlir hăng tơhan wai pơgang guai lŏn ia akŏ pơjing grup wai lăng ƀơi hơdôm gong guai kiăng kơ djru amăng bruă wai pơgang ƀơi guai lŏn ia rah hăng jao bruă kơ hơdôm anih dŏ gak hŭi kơ hơmâo mơnuih ngă sat amăng ƀon lan. Mơng hơdôm hơbô̆ bruă anai ƀing gơmơi hơmâo ĕp ƀuh tañ 2 wŏt bruă klĕ dŏp rơdêh thut”.

Bruă mă tŭ yua mơng kông ang chính quy glăi pơ să hơmâo pơgôp pơjing bruă wai pơgang amăng mơnuih ƀon sang hơđong kjăp ƀơi kual giăm guai să Quảng Trực, anih hơmâo truh pơ 17 djuai ani dŏ hơdip hrŏm amăng kual lŏn prong rơbêh 60 rơbâo ektar. Ơi Điểu Phơu, Kơ-iăng khua Jơnum min mơnuih ƀon sangíă Quảng Trực brơi thâo:

“Quảng Trực lĕ să giăm guai tơnap tap biă mă, sit biă ñu jơlan nao rai amăng bơyan hơjan hlim glêh tơnap, mơnuih ƀon sang hơdip raih daih, kual hơdip prong, bruă wai lăng bưp tơnap. Lăi nao kơ kông ang chính quy glăi pơ să lĕ ƀing mơnuih kjăp bruă ngă tui hơdôm bruă jao kah hăng pơphô bruă brơi gưl Ping gah gong gai ƀon lan. Hơdôm hrơi giăm anai kâo ƀuh bruă wai pơgang amăng să Quảng Trực jai hơđong tui, plơi pla ƀon lan jai hrơi pơđĭ kyar”.

Thượng tá Nguyễn Sử, Khua kông ang tơring glông Tuy Đức brơi thâo, ngă tui akŏ bruă mơng Ding jum kông ang, abih bang 6 să amăng tơring glông hơmâo pơkiăo nao bruă kơ 41 čô kông ang chính quy glăi mă bruă. Boh than dưi ngă lĕ tơlơi ngă soh hơmâo hrŏ trun. Laih dong kông ang hơmâo pơtrut pơsur mơnuih ƀon sang jao glăi 130 ƀĕ phao kơtuang hrŏm hăng giăm 700 boh phao djop mơta. Thượng tá Nguyễn Sử, lăi nao tơlơi găn rơgao amăng bruă pơhlôm rơnuk rơnua ƀơi kual giăm guai lŏn ia:

“Tơlơi găn rơgao phun lĕ ngă hiưm pă pơsur abih bang mơnuih ƀon sang kiăng kơ djru amăng bruă wai pơgang ƀơi kual giăm guai lŏn ia. Ƀơi anai ƀing gơmơi hơmâo pơtô pơblang brơi mơnuih ƀon sang thâo rơđah kơ hơdôm tơlơi pơčut pơčao ngă soh kah hăng pơsur mơnuih ƀon sang akŏ pơjing hơdôm grup wai pơgang hrŏm hăng kông ang pơhlôm rơnuk rơnua amăng ƀon lan. Sit biă ñu lĕ kơtuai tui jơlan guai lŏn ia amăng hrơi blan kông ang chính quy glăk hơmâo arăng jao bruă ƀơi hơdôm să anai hơmâo ngă klă lơ̆m pơphô bruă brơi gưl Ping gah gong gai ƀon lan, pơtrut djop anom bruă pơhlôm rơnuk rơnua ƀơi ƀon lan; amăng anun ƀing kông ani hơmâo pok pơhai bruă mă tui arăng jao, hơmâo ngă klă gum hrŏm hăng tơhan wai pơgang guai lŏn ia pơphun hyu tir pơhlôm hơđong ƀơi guai lŏn ia”.

Bruă ba kông ang chính quy glăi mă bruă ƀơi hơdôm să tơring glông giăm guai Tuy Đức, tơring čar Dak Nông, hơmâo pơsit tong boh tŭ yua lơ̆m ngă tui bruă jao ƀơi ƀon lan mơng anun ba glăi tơlơi đăo gơnang mơng mơnuih ƀon sang, pơgôp pơjing bruă wai pơgang hơđong tơlơi hơdip kơ mơnuih ƀon sang ƀơi kual giăm guai lŏn ia.

Siu Đoan: Pơblang