1. Lơh jăt geh cồng nha jơnau kờ` “dơ\ le\ bal”: gàr kơ\ kơl jăp lơh sa dờng mơkung lơh tam gơl rơndăp tăp sèng lơh sa mờ bơta niam gơguh lơh sa

Chính phủ đơng lam krà` cê jơh nùs broă tam gơl pa pràn kơldang broă lơh gơguh lơh sa jăt gùng dà kơ\ kơl jăp, sùm tam gơl pa bơceh pa, lơh niam wơl tiah bơcri priă, kă bro; tơnguh uă cồng nha bơta niam, cồng nha lơh geh mờ bơta pràn tàm pơrlòng dà lơgar.

Bol he neh lơh geh mờ sơrlèt jơh 12 broă bơtàu tơnguh lơh sa- mpồl bơtiàn mờ Quốc hội dê jàu, uă broă lơh geh lài mờ tơngai ai. Geh khà gơguh GDP jơnhoa rlau 7%, khà jơnhoa ngan rlau jơh tàm jơ\t nam do.

Uă bơta jak ngan ndai kung geh lơh geh sơl, bè priă geh tăc blơi phan mờ lơgar ndai geh 500 tơmàn dolar Mỹ, tăc phan mờ lơgar ndai geh uă ngan rlau jơh geh 9 tơmàn 100 tơlak dolar Mỹ mờ là nam dơ\ 4 sùim tăc mờ lơgar ndai geh priă jền uă ngan.

Pal sền ngac ngan là, bulah gơguh uă, Việt Nam kung gam gàr geh kơ\ kơl jăp sơl lơh sa dờng, tam gơl rơndăp tăp sèng lơh sa di gùng, sơ`io khà priă ngui sa CPI mìng gơguh 2,57% pơndrờm mờ nam lài, do là khà gơguh lơyah ngan rlau jơh tàm 3 nam rê hờ do.

2. Tơngkah 50 nam lơh jat Jơnau nting bơr lời wơl bơh Chủ tịch Hồ Chí Minh dê; chồl pràn bơsram, lơh jat nùs nhơm, rài kis Bác Hồ dê, gơ jat bal mờ broă lơh bơt bơtàu, lơh niam wơl Đảng

50 nam lơh jat Jơnau nting bơr lời wơl bơh Bác Hồ dê là dùl gơl gùng kah yau kuơmàng tàm broă lơh kac màng lơgar Việt Nam bơh Đảng đơng lam bồ, đơs nền bulah khat tàm dùl tu\ tơngai lơi, gùt Đảng, gùt làng bol, gùt ling klàng he dê sùm tam klac bal dùl nùs, kơ\ dơn jat gơl gùng làng bol pas sơm, dà lơgar pràn kơldang, làng bol lơh tờm, ring bal, ngac ngar, gơguh jak neh sac rơ wah, bơt bơtàu dà lơgar pas sơm, làng bol chờ hờp, gơboh gơbài, hờm ram…

Broă lơh jat Jơnau nting bơr lời wơl Bác Hồ dê gơ jat bal mờ lơh jat Nghị quyết dà lơgar 4 (khóa 11 mờ khóa 12) bè bơt bơtàu, lơh niam wơl Đảng mờ Chỉ thị sồ 05 bơh Bộ Chính trị dê bè bơsram mờ lơh jat nùs nhơm, rài kis Hồ Chí Minh pơgồp bơnah lơh Đảng he in ngan ngồn pràn kơldang, kơ\ kơljap bè chính trị, nùs nhơm, bơyai broă mờ niam chài tàm rài kis.

3. Tam gơl pa, lơh kơ\ kơl jăp mờ mìng lời wơl dùl êt nă kuang bàng, tơrmù biên chế

Lơh jăt Nghị quyết Dà lơgar 6 khoá 12; tam gơl, bơtơl Adat kuang bàng, công chức; Adat viên chức; Adat Bơyai broă Chính phủ; Adat Bơyai broă gơnoar ătbồ [òn lơgar…, gùt lơgar neh bơh sơnrờp gơmù geh 5 anih lơh broă sră nggal dà lơgar kấp kơnhoàl, rlau 560 anih lơh broă sră nggal dà lơgar kấp xã, gơmù 4 anih lơh broă tờm gơ wèt Dà lơgar, gi\t nđờ rhiang anih lơh broă tờm gơ wèt kấp kơnhoàl, 7 tổng cục mờ anih lơh broă ndrờm bal, 81 cục, vụ mờ anih lơh broă ndrờm bal, 73 anih lơh broă tàm Dà lơgar; gơmù rlau 2.600 cơldu\ lơh broă mờ anih lơh broă ndrờm bal; gơmù rlau 2 rbô mpồl gơ wèt chi cục; gơmù rlau 4.160 anih lơh broă dà lơgar crơng gơs, 2.200 anih lơh broă tờm tàm ală anih lơh broă dà lơgar crơng gơs; gơmù mờr 15 rbô 200 kấp trưởng, kấp phó. Bàr pe kấp ủy mờ anih lơh broă bè Quân ủy Dà lơgar, Đảng ủy Kuang àng dà lơgar neh geh broă lơh krà` cê jơh nùs, jak chài mờ geh cồng nha.

Tàm 2 nam do, ngan là nam 2019, gùt lơgar neh tơrmù geh 236 rbô 39 nă cau, pah nam gơmù êt ngan rlau jơh kung là bơh 10 rbô nă cau ai kes priă dà lơgar in. Broă lơh rơndăp tăp sèng mpồl kuang bàng mờ kuang bàng gơ jăt bal mờ rcăng pơrjum dờng đảng bộ ală kấp wèt tus pơrjum dờng dơ\ 13 bơh Đảng dê geh mu\t lơh dùl ròt bal mờ kơ\ kơl jăp.

4. Broă lơh rơcang sơndră sa kuề sa kùa geh chồl pràn, lơh geh cồng nha kuơmàng

Tổng Bí thư, Chủ tịch lơgar, ồng Nguyễn Phú Trọng bal mờ kuang đơng lam bồ Đảng, dà lơgar jơh nùs rơcang sơndră sa kuề sa kùa, broă ờ niam. Git nđờ rhiang nă cau gơtìp lah yă tàm ua\ broă lơh tìs dờng bè lơh sa, ngan là cau tìs sa kuề sa kùa neh gơtìp cah rơ`a, tàm hơ\ ua\ kuang bàng dờng màng mờ 2, 3 nă kuang đơng lam bồ dờng gah kuang àng, ling klàng.

Nàng sơlơ tơnguh bơta gròi sền gơnoar broă tàm broă lơh kuang bàng mờ rơcang sơndră bơta tac bro gơnoar broă, Bộ Chính trị tơlik Kơrnuat sồ 205 bơh dà lơgar dê. Do là broă lơh lam lơh jat ngan ngồn Nghị quyết pơrjum dờng dơ\ 12 bơh Đảng dê mờ ală Nghị quyết bơh Ban Chấp hành Đảng dà lơgar, Bộ Chính trị bè bơt bơtàu Đảng mờ broă lơh kuang bàng.

5. Uă cồng nha lơh geh tàm gah lơh broă mờ lơgar ndai

Việt Nam geh pồ lơh Ủy viên ờ duh broă sùm tàm Hội đồng Bảo an Liên hợp quốc mờ sră pồ mờr gơlơh bè uă ngan rlau jơh 192 tàm 193 pang sră; dờp lơh gơnoar broă Chủ tịch ASEAN nam 2020; Bơyai lơh wil tơl mờ bềng kơnòl Pơrjum dờng kấp kuang bàng dờng màng Mỹ mờ Triều Tiên dơ\ 2.

Pơrjum dunia mờ lơh broă mờ lơgar ndai lơh sa drơng bơtàu tơnguh geh bơta tam gơl mhar ngan, lơh jăt Hiệp định CPTPP; ki\ hơ Hiệp định kă bro khăt gơboh mờ EU (EVFTA) mờ Hiệp định sền gàr bơcri priă.

6. Gah lơh sa suơn sre tam gơl pràn ngan gơs broă lơh gơlik phan bơna kă bro mờ khà ua\ ngan, tơnguh cồng nha mờ bơta niam phan bơna

Dơ\ sơn rờp tàm kah yau, lơh sa suơn sre Việt Nam pal kong mờ kòp jê ndul gơ jroh sur châu Phi bơ tờp tàm làm bă tiah tàm gùt lơgar, lơh gơbàn hoàc huơr dờng ngan gơ wèt tus mờ cau ròng sur, lơh gơbàn ờ tơl poac sur tàm drà kă bro tàm ală nhai lồi nam. Gùt gah do geh pria\ tac phan hờ lơgar ndai rlau 41 tơmàn 300 tơlak dolar Mỹ, pria\ cồng gah kă bro geh 10 tơmàn 400 tơlak dolar Mỹ, khà jơm glòm brê geh 41,8%, geh 54% khà xã tơl khà [òn lơgar pa, 111 kơnhòal tơl khà [òn lơgar pa.

Sơntìl kòi ST25 bơh lơgar Việt Nam dê sơr lèt phe ală lơgar Thái Lan, Campuchia mờ Mỹ dê nàng gơ gơs là phe bơkah ngan rlau jơh dunia, pơgồp bơnah tơnguh bơngă pin dờn bơh phe Việt Nam dê tàm drà kă bro dunia, lơh gơlik bơta pơn jờng nàng ală tiah, mpồl lơh sa kă bro mờ cau lơh broă sa bơcri pria\ tàm broă lơh gơlik phe geh bơta niam ua\.

7. Lơgar he lơh jăt gùng dà broă lơh ờ tu\ lơi tam gơl, kơ\ dơn jơh nùs, dipal nàng sền gàr gơnoar tờm ù tiah, gơnoar tờm ù tiah bơh Việt Nam dê tàm dà lềng đah măt tơngai lik

Nhai 7/2019, lơgar Lo neh jun mpồl ơhò HD 8 tus lơh bơta sơnđan là “lòt sền” Bãi Tư Chính, sơgràm phà tiah geh gơnoar lơh sa dờng màng mờ kềng gah dà lềng lơgar Việt Nam dê. Chính phủ, Bộ Ngoại giao, ală bộ, gah sơnah lơh broă, ală anih lơh broă geh gơnoar bơh he dê neh kơ\ dơn nùs nhơm gàr kơ\ tiah ơm kis ring lơngai, bơta ndai, kơ\ dơn jơh nùs tam dră, lơh jăt niam Công ước bơh Liên hợp quốc dê bè Adat dà lềng nam 1982, lơh ală broă dipal sền gàr kơ\ kơl jăp dà lềng gơnoar tờm ù tiah bơh Việt Nam dê.

Mpồl bơtiàn dunia mờ Việt Nam kung rcăng ngac, đal gi\t, dră wơl mờ kơryan broă lơh ngac chài “sơgràm phà niam chài” bơh lơgar Lo dê bal mờ ală broă lơh sùm lơh gơs sră, crăp kơ`au sră sền rùp ù tiah gùng “lơm piăt kơnrồ” 9 gơl tàm ală pang sră niam chài, rùp hin tăc tàm làm gùt dunia.

8. Mpồl tàp pràn să jan Việt Nam lơh geh jai pha dờng ngan tàm SEA Games 30

98 gai lòng biàng mờ ơm dơ\ 2 tàm [àng sap sèng gai lòng neh ai go\ bơngă bơh mpồl tàp pràn să jan Việt Nam dê tàm dơ\ pơr lòng tàm tiah do. Tàm hơ\, niam ngan rlau jơh là jơh bal mpồl coh plai cau ùr mờ mpồl U22 ai geh 2 gai lòng bìang kuơmàng ngan, cau pơr lòng re dà Nguyễn Huy Hoàng sơr lèt rlau mờ cồng nha jơnhua ngan rlau jơh tàm SEA Games tàm pơr lòng khà 400 thơk khat gơboh cau klau mờ 1 rbô 500 thơk khat gơboh cau klau; Trần Hưng Nguyên sơr lèt rlau mờ cồng nha jơnhua ngan rlau jơh tàm pơr lòng 400 thơk bơrlu\ bal cau klau.

Cau pơr lòng ntoat Nguyễn Thị Oanh sơr lèt rlau mờ cồng nha jơnhua ngan rlau jơh tàm pơr lòng 3 rbô thơk sơr lèt phan kang; 4 cồng nha sơr lèt rlau mờ cồng nha jơnhua ngan rlau jơh môn yờ tạ bơh Lại Gia Thành (55ki\); Vuơng Thị Huyền (45ki\), Hoàng Thị Duyên (59ki\) mờ Phạm Hồng Thanh (64ki\); cau pơr lòng re dà Nguyễn Thị Ánh Viên ai geh 6 gai lòng bìang; cau pơr lòng Lý Hoàng Nam dơ\ sơn rờp ai geh gai lòng bìang môn Quần vợt.

Ală cồng nha lơh geh tàm SEA Games 30 bal mờ broă mpồl coh plai dà lơgar tơn jơh nam 2019 mờ khà 1 [àng sap sèng dar coh plai sac rơ wah World Cup, lơh gơlik bơta [uơn nàng nam 2020 gơtùi kơp kờ` geh dùl cồng nha niam rlau, ai geh dùl ve\ mut tàm dar sac rơ wah dơ\ 2 World Cup dê.

9. Quốc hội ring bal Adat Lơh broă tam gơl tơnguh sơnam rê rlô lơh broă gơ wèt mờ cau lơh broă mờ sang te\ bơta lơh broă viên chức jơh dùl rài kis

Pơrjum dơ\ 8, Quốc hội khoái 14 ring bal Adat Lơh broă (tam gơl), tàm hơ\ Bơta 169 cih, sơnam rê rlô lơhbroă bơh cau lơh broă dê tàm tu\ dilah lơh broă bè ờs geh tơnguh jăt tu\ tơngai tus dì tu\ tơl 62 sơnam gơ wèt mờ cau klau tàm nam 2028 mờ tơl 60 sơnam gơ wèt mờ cau ùr tàm nam 2035.

Quốc hội kung ring bal Adat tam gơl, bơtơl bàr pe bơta bơh Adat kuang bàng, công chức mờ Adat viên chức. Dùl tàm ală bơta pa bơh adat do dê là geh lơh jăt broă sơrbì bơta lơh broă “viên chức tus jơh rài kis” nàng lơh jăt bơta lơh broă geh tơngai pơrgon gơ wèt mờ viên chức. Mìng geh mpồl cau geh dờp bơta lơh broă “viên chức tus jơh rài kis”, là kuang bàng, công chức geh tam gơl tus lơh viên chức tàm anih lơh broă dà lơgar crơng gơs tu\ lơh jăt tơl ală jơnau sồr bơh adat do dê; cau geh rwah lơh viên chức lơh broă tàm tiah geh rài kis lơh sa- mpồl bơtiàn kal ke ir; mờ ală cau neh geh sră pơrgon ờ gi\t tơngai pơrgon bơh lài mờ tu\ adat do geh ai ngui.

10. Dùl ròt ală bơta ờ niam bè tiah ơm kis gơlik geh, ai go\ bơta ờ niam bơh ală anih lơh broă, mpồl lơh broă geh kơ nòl dê

Ờ hềt tu\ lơi bơta [ơ\ tiah ơm kis, ngơr bam dà tà, tiah drà tàm Hà Nội, [òn dờng Hồ Chí Minh, Cần Thơ, Vinh, Phú Quốc, ngan là [ơ\ nhơm kis tàm Hà Nội, [òn dờng Hồ Chí Minh mờ 2, 3 tiah drà dờng tus khà đơs lài jơnhua ngan tàm tơngai lài. Bơdìh mờ ală jơnau geh is, gam geh ua\ bơta ờ niam gơ rềng tus kơnòl bơh anih atbồ mờ broă lơh jat bơh ală anih lơh broă, mpồl lơh sa kă bro, cau dùl nă să dê tàm broă sền gàr tiah ơm kis, tơnguh bơta niam rài kis.

Cau mblàng Lơ Mu K’Yến mờ K’Duẩn