Lam lơh broă lơh tìp mat cau tĕ khà tơnơ̆ pơrjum dơ̆ dùl, Quôk hội khoă XVI, drim ngai 04 nhai 5, Củ tịc Quôk hội ồng Trần Thanh Mẫn bal mờ Mpồl cau ala mat Quôk hội ƀòn dờng Hồ Chí Minh (mpồl tĕ khà sồ 12) tìp mat cau tĕ khà. Dơ̆ tìp mat geh lam lơh tơn tàm sàh Hóc Môn mờ pờ tơlik tơn tàm internet tàm 10 anih tàm tơrbŏ tơn bơh ală sàh tàm ƀòn dờng Hồ Chí Minh.

Tàm dơ̆ tìp mat, ala mat Mpồl cau ala mat Quôk hội, Củ tịc Quôk hội ồng Trần Thanh Mẫn neh hơ 16 jơnau lùp bơh cau tĕ khà dê mờ 6 mpồl broă. Gơ rềng tus bơta ù tiah, rơndap ù tiah, hìu ơm, do là gah broă mờ cau tĕ khà sền gròi uă ngan rlau jơh, Củ tịc Quôk hội ồng Trần Thanh Mẫn pà git, Quôk hội neh ai lơh jat jơnau lơh nền tàm pơrjum sồ 254 cih bè bàr pe gùng dà broă lơh ngan ngồn nàng kờñ tă bơsong kal ke, bơta gơ kòl tàm broă lơh jat Adat Ù tiah. Củ tịc Quôk hội pà git, Ƀộ Cíñ trị neh ring bal jơnau lơh nền bơt bơtàu Adat tiah drà is ồn lời ai ƀòn dờng in. Dilah geh Quôk hội ring bal, ală gùng dà, broă lơh tàm adat boh lam rơp pơgồp bơnah tă bơsong ală bơta kal ke, bơta gơ kòl, lơh gơlik bơta niam nàng ƀòn dờng bơtàu tơnguh tàm ală gah lơh sa, mpồl bơtiàn, gàr niam lơngăp lơngai dà lơgar mờ bơt bơtàu anih lơh broă cíñ trị.