Mờ tơngu me “Dăk Lăk – bơta pràn, kơp kơnờm bơtàu tơnguh”, Pơrjum Hòi jà bơcri priă nam 2026 bơh càr dê kờp dŭ wă 1 rbô nă cau ala mat tàm lơgar mờ ală lơgar. Pơrjum geh lơh mờ ròt ală broă lơh geh pơrjum tờm, sơn đờm lơh, ai ngui broă lơh kuơmàng, gơ hòi gơ jà bơcri priă, lòt sền anih bơcri priă, pơrjum cribơyai mìng dùl tơngume mờ ală dơ̆ tìp mat 2 gah đah đơng lam càr mờ mpồl lơh sa kă bro.

Bơta tờm bơh Pơrjum dê là mat 133 rơndap broă lơh hòi jà bơcri priă tơngai bơh nam 2026 tus nam 2030, mờ kờp jơh priă bơcri mờr 552 rbô tơmàn đong, tàm uă gah bơh năng lượng lơh geh wơl, phan bơna lơh sa mờ măi mok, tiah drà, lòt nhơl tus lơh sa suơn sre ngui măi mok pa mờ lơh sơnơm.

Tàm hơ̆, càr Dăk Lăk rơ wah mờr 20 rơndap broă lơh kuơmàng nàng tơrgùm hòi jà bơcri priă, mờ kung kờp dŭ jàu jơnau lơh nền bơcri priă ai 26 rơndap broă lơh in, kờp jơh priă bơcri cih tàm sră rlau 48 rbô 300 tơmàn đong tàm pơrjum.

Tă pơgồp jơnau đơs lơh sir tơngume rơcang, ồng Nguyễn Thiên Văn – Phó Củ tịc Anih duh broă Làng bol càr Dăk Lăk sồr sền nền wơl, bơ tơl ală broă gam ờ tơl, ngan là lơh sơnơm mờ bơto bơsram, ală broă gam geh uă cau bơcri priă sền gròi: “Tàm rơndap ù tiah càr dơ̆ do bol he geh bàr pe bă tiah nàng lơh anih ròng siam cau kra, ală hìu sơnơm mìng dùl gah den pal tơmut tàm rơndap broă nàng gơ hòi gơ jà bơcri priă. Tàm gah bơto bơsram, kờñ pal rơcang ù nàng hòi jà tă pơgồp bơh mpồl bơtiàn, gơ hòi gơ jà lam lơh ală hìu bơsram dờng ală kâp”.

Ồng Đỗ Hữu Huy, Củ tịc Anih duh broă Làng bol càr Dăk Lăk đơs sùm jơnau sồr tơnguh bơta niam pơrjum, sền do ờ mìng là broă lơh hòi jà bơcri priă ờs mờng mờ pal gơs là bơta tờm nàng gơ hòi gơ jà bơcri priă nam 2026.

Jat ồng Đỗ Hữu Huy, càr neh mờ gam rơcang ală bơta pal geh, crăp rơcang tơl ală bơta nàng kơp gơn bơta bơcri priă pa. Nùs nhơm bal mờ tam gơl pràn bơh rơcang gơ gơs broă lơh, bơh hơ pơrgon gơ gơs lam lơh mùl màl tàm pơrjum rơn, wàs rơ sòn wă rò sềm klàng dờng, lơh gơlik bơta tam gơl pràn mờ ală rơndap broă lơh dờng: “Jơnau sồr bơh pơrjum do dê là bol he pal lam lơh niam rlau tai, ngan ngồn rlau tai, lòt song tàm broă tơlik mat, sơn đờm lơh rơndap broă lơh; lơh ngan tàm poh geh lơh pơrjum pal sơn đờm lam lơh uă rơndap broă lơh ngan rlau jơh, tơngume pal sền nền wơl nàng gơ in dipal”.