Tàm hìu lơh phan bơh Kông ty Pơgồp priă bal Lòs Asean (Tiah lơh sa mờ măi mok Hoà Phú, càr Dăk Lăk), bi Lê Trung Hiếu bal mờ pe nă cau tàm mpồl lơh bơnhă lơh lòs. Lài do nàng lơh broă lơh do pal geh bơh 5 tus 7 nă cau lơh broă, mơya tơnơ̆ mờ tŭ bi Lê Trung Hiếu bơceh lơh gơs phan khồm nhơm oxy lơh is ai bơnhă lơh lòs in, broă lơh mìng kờñ geh 4 nă cau. “Broă khồm nhơm oxy den lơh mờ să, cau lơh broă pal ntào rềp tơn tềng bơnhă buh, druh nhơm tàm ding tus tàm bơnhă, bơta do ngòt rơngơ̆t ngan tài bơta duh uă, tàm hơ̆ tai nsàng lòs di gơlan gơpar di tàm să. Bơh tàm mùl màl do, añ kơlôi mờ lơh gơs dra khồm nàng ngui măi druh nhơm geh lơh broă mờ ồs đèng, pơgồp bal mờ lơh bơh ngài. Lơh gơs, ală oh mi gơtùi ntào ngài nàng lơh broă niam, geh cồng nha mờ pleh mờ bơta ngòt rơngơ̆t”.

Kông ty Pơgồp priă bal Lòs Asean tŭ do geh 340 nă đoàn viên, lơh broă tàm 2 mpồl. Jăt ồng Nguyễn Hữu Thống, Củ tịc Kông đoàn kông ty yal, tàm gah lơh lòs, bơceh lơh bơta jăk pơgồp bal kwơ màng mờ dong kờl tềp pềr priă, tơnguh uă cồng nha bal mờ bơta niam phan geh lơh. Mpồl lơh sa kă bro sùm pơlam cau lơh broă tam gơl pa bơceh lơh nàng tơnguh uă bơta pràn tàm pơrlòng. Bơh tŭ hơ̆, uă cau jăk lơh broă, cau lơh phan neh geh ală jơnau bơceh lơh mùl màl; mìng is bi Lê Trung Hiếu geh 3 jơnau bơceh lơh pơnrơ ngan là lơh niam phan ƀồm dà nàng buh lòs tềm pềr ồs đèng, lơh niam wơl nam câm (lŭ gơ jồp) ồs đèng mờ lơh dra khồm nhơm oxy, mờ gam kơlôi sơnơng nàng lơh phan sòl àng. Ồng Thống pà git: “Ală jơnau bơceh lơh bơh bi Hiếu dê neh pơgồp bal uă ngan tàm broă tềm pềr priă tàm broă lơh sa, tơnguh uă bơta niam phan geh lơh, lơh pràn niam chài tam gơl pa, pơgồp bal tàm broă dong kờl mpồl lơh sa kă bro bơtàu tơnguh kơl jăp”.

Tàm tŭ bi Lê Trung Hiếu lơh ngan tàm broă lơh, bơceh lơh tàm hìu măi, den lŏ H’ Chuyên Niê, mờ broă còr bơsơ̆t kao su, kung neh geh pơgồp bal kwơ màng tàm suơn tam phan dê sơl. Là cau lơh broă tàm Anih lơh sa suơn dờng Kao su Phú Xuân neh geh 10 nam lơh broă, lŏ H’ Chuyên sùm lơh gơs jăk ngan kơnòl broă geh jào. Lŏ sùm lơh geh cồng nha uă rơlao mờr 20% pơn drờm mờ cồng nha bal. Lŏ H’ Chuyên pà git: “Añ pal lơh ngan guh gờñ, lòt gờñ ha là rê jơla rơlao mờ ală cau lơh broă ndai. Tŭ còr den sùm lơh nền nòn ngan, bañ còr jal mhar nàng bơsơ̆t ờ gơlik bơdìh. Pềs còr den ngai lơi kung pal tồl nàng sồt, ală phan lơh broă bè bòng, sơlo, dra ha là che kơ̆t ndrờm geh rơcang lài tơl”.

Gùt càr Dăk Lăk tŭ do geh mờr 62 rơbô nă cau tàm Mpồl ala măt cau lơh broă, lơh broă tàm rơlao 1 rơbô 350 mpồl Kông đoàn hờ đơm. Ală nam do, broă pơrlòng lơh sa geh lơh nền nòn, hòi jà broă kờñ bal uă bơh đoàn viên, bơh tŭ hơ̆, lơh gơs git nđờ rơbô jơnau bơceh lơh, lơh niam bơta chài, pơgồp bal tàm broă tơnguh uă cồng nha lơh sa, kă bro. Nàng pơlam nùs nhơm tam gơl pa, Mpồl dong kờl mờ sền gàr cau Lơh broă càr Dăk Lăk sùm jờng rơ, pơn jờng di tŭ mờ lơh geh uă ală cau geh pơnrơ jăk.

Ồng Nguyễn Phú Lập, Phó Củ tịc Ală mpồl Lơh broă càr Dăk Lăk pà git: “Tàm do, gơwèt mờ broă lơh bơceh pa, Mpồl dong kờl mờ sền gàr cau Lơh broă càr neh lơh ală broă rơndăp lơh bal mờ sră nggal sồr, pơyoa tus kông đoàn hờ đơm nàng rơcang pơlam, sồr cau lơh broă pơn jăt tai lơh ngan pơrlòng lơh broă, rơhời bơ̆t bơtàu càr ngai sơlơ bơtàu tơnguh. Tàm Nhai Cau lơh phan, bol añ pơgồp bal mờ Sờh Lơh kơnòl broă tàm dơlam is càr nàng bơyai lơh “Ngai chờ Cau lơh phan, tàm Tiah lơh sa mờ măi mok Hoà Hiệp (sơnah ƀòn Hoà Hiệp) tàm ngai 5 nhai 5 mờ khà cau tus rơlao 3 rơbô nă. Kơ̆p kờñ nam do rơ̆p geh uă priă dong kờl uă rơlao nàng ai cau lơh broă in”.

Tàm ñhòng gơlòt bal tam gơl pa mờ tam gơl sồ, ală cau lơh broă bè bi Lê Trung Hiếu mờ lŏ H’ Chuyên Niê gam ai tơngŏ bơta kwơ mờ nùs nhơm bơceh lơh bal mờ kơnòl tàm broă lơh. Bơh hìu lơh lòs tus mờ suơn tam phan dờng kao su dê, ală jơnau bơceh lơh bal mờ broă lơh ngan bơh ală cau do dê neh pơgồp bal tàm broă tơnguh uă cồng nha lơh sa mờ gơdờp bal mờ jơnau kờñ tàm broă lơh pa.