Iat tơn ală jơnau yal, bơta kơp kờñ bơh gal ngan oh mi cau lơh phan dê, Tổng Ƀí thư, Củ tịc lơgar ồng Tô Lâm ai lơh ngoh rơngac ngan tài sền gŏ geh uă ngan krơh niam pơn dềt să, mơya pal ki ngàm ngan, lơh pơnđàng bơta niam bơh cau lơh phan Việt Nam tŭ do dê: tryăng tryồng, ờ ngòt bòl glar, bềng lìu nùs nhơm brồ guh, pơn đơl pràn, kis geh kơnòl, git kờñ gơboh hìu bơnhă, đềt mềr mờ cau lơh broă bal, mờ mpồl lơh sa kă bro, mờ mpồl ala mat cau lơh broă bal mờ dà lơgar.

Tổng Ƀí thư, Củ tịc lơgar ồng Tô Lâm đơs nền, Đảng mờ Dà lơgar sùm git nền rơnàng cau lơh phan là mpồl kuơmàng ngan tàm broă lơh bơt bơtàu mờ sền gàr dà lơgar. Tàm tơl tŭ tơngai kac màng, cau lơh phan Việt Nam sùm geh mat tàm ală tiah kal ke, bòl glar, tàm anih lơh broă, tàm hìu măi, tàm tiah lơh sa mờ măi mok, tàm ală gah lơh gơlik phan, broă drơng ala, jun pơndiang, măi mok, lơh gơlik phan, mòn phan. Mpàng tê, bồ tơngoh, dà kơl hề mờ bơta bơceh lơh bơh oh mi dê neh pơgồp bơnah lơh gơs ală cồng nha bơtàu tơnguh dà lơgar dê tŭ do. Tổng Ƀí thư, Củ tịc lơgar ồng Tô Lâm sồr, pơn jat tai sền broă gròi sền rài kis cau lơh phan, cau lơh broă in là dùl kơnòl broă cíñ trị kuơmàng, geh lơh sùm mờ jŏ jòng. Ƀòn dờng kờñ pal sền nền rlau tai jơnau kờñ bè hìu ơm mpồl bơtiàn, hìu ơm wơl ai cau lơh phan in, hìu bơsram, hìu ròng kòn se, hìu sơnơm mờ broă lơh niam chài, anih pơrjum mpồl bơtiàn tàm ală tiah lơh sa mờ măi mok, tiah lơh gơlik phan mờ ală tiah geh gal cau lơh phan ơm kis. Pal lơh bè lơi nàng cau lơh phan ờ mìng geh broă lơh, mờ gam geh anih ơm kis kơnhăp kơ̆, ờ mìng lơh geh priă jền mờ gam geh bơta ƀuơn nàng ròng siam oh kòn, kơlôi rơcang mè bèp tàm ƀòn tờm in; ờ mìng lơh broă mờ gam geh ơm rlô să, bơsram, nhơl ñŏ, tơnguh niam rài kis nùs nhơm.