Jat hơ̆, tŭ jơ lơh broă pa geh ngui gơ wèt mờ ală anih lơh broă Đảng, Dà lơgar, Mặt trận dà lơgar mờ ală mpồl bal bơh kâp càr tus kâp sàh, geh: ƀùi drim bơh 7 jơ 30 phuk tus 11 jơ 30 phuk; ƀùi mho bơh 1 jơ 30 phuk tus 5 jơ 30 phuk. Pơndrờm mờ jơnau cih gam lơh jat tŭ do, tŭ jơ sơn đờm lơh broă ƀùi drim rơp gơ ruc wơl 30 phuk, mờ jơ tơn jơh lơh broă ƀùi mho kung jơla rlau 30 phuk sơl.

Anih duh broă Làng bol càr Dăk Lăk pà git, broă tam gơl nàng kờñ tơrmù bơta gơ lin tŭ lơh jơh broă mờ Cíñ phủ mờ ală Ƀộ, gah broă lơh dà lơgar (sùm sơn đờm bơh 8 jơ drim). Bơdìh hơ̆ tai, broă tơn ruc wơl tŭ jơ lơh broă ƀùi drim geh đơs là dipal mờ bơta nhơm trồ tiah mờ bơta ndrờm bal tŭ tŭ do geh rlau nggùl khà càr, ƀòn dờng tàm gùt lơgar ngui tŭ jơ lơh broă bè do. Gơ wèt mờ ală gah broă is ồn bè bơto bơsram, lơh sơnơm, ală mpồl rơp rơcang tam gơl tŭ jơ lơh broă nàng dipal mờ broă lơh bơto bơtê mờ kham sơm kòp.