Tơngai lài, Mpồl ala mat cau lơh broă Việt Nam neh lam lơh uă broă lơh ndrờm bal, lơh jat ală broă jàu, jơnau kờñ ai tơlik tàm broă lơh tìp mat tơm boh bơr, cribơyai mpồl bal mờ neh lơh geh cồng nha ngan ngồn. Tus tŭ do, khà ring bal lơh broă mpồl bal geh rlau 85% tàm kờp jơh khà cau lơh broă tàm ală mpồl lơh sa kă bro, mpồl lơh broă geh mpồl ala mat cau lơh broă.

Đơs tàm dơ̆ tìp mat, Phó Củ tịc lơgar mò Võ Thị Ánh Xuân đơs, mpồl kwang bàng ala mat cau lơh broă ƀòn lơgar đơs bal mờ 101 nă kwang bàng ala mat cau lơh broă jak chài geh pơn rơ tàm broă lơh tìp mat tơm boh bơr, cribơyai mpồl bal đơs is tàm tơngai lài neh dong rlau 382 rbô nă cau lơh broă geh dờp kuơ mờ kờp jơh khà priă kờp bal rlau 6 rbô tơmàn đong pah nam. Phó Củ tịc lơgar đơs ngan, ală cồng nha do neh dong cau lơh broă geh rài kis niam rlau, kơ̆ kơljap bơta git gơp cau lơh broă, là bơnàng jă nàng cau lơh broă ơn jơh bơta pin dờn tàm mpồl ala mat cau lơh broă, bơh hơ̆ đơs nền gơnoar broă bơh Mpồl ala mat cau lơh broă dê tàm git gơp cau lơh broă mờ anih lơh broă Cíñ trị. Phó Củ tịc lơgar mò Võ Thị Ánh Xuân sồr Mpồl ala mat cau lơh broă Việt Nam pơn jat tai tam gơl pràn mpồl lơh broă mờ broă lơh mpồl ala mat cau lơh broă dê jat gùng dà tơrmù lơyah dipal, geh cồng nha, wèt uă hờ ƀòn lơgar, ai đoàn viên mờ cau lơh broă lơh tờm. Mờ kung tơrgùm tơnguh bơta niam ala mat, gròi sền, sền gàr gơnoar mờ bơta kuơ dipal bơh cau lơh broă dê; di tŭ git bơta kơp kờñ, bơsong ală broă ờ suk bơh tàm ƀòn lơgar tơn, pơgồp bơnah gàr kơ̆ bơta pin dờn mờ sơlơ tơnguh mpồl tam klac dờng gùt jơi bơtiàn.