Tàm thôn Vĩnh Trường, sàh Phước Dinh, càr Khánh Hoà, uă hìu làng bol gam rơcang ntrờn nàng jào ù lơh Hìu măi đèng hạt ñân Ninh Thuận 1 in. Bơta mờ làng bol sền gròi ngan tŭ do là khà priă tơm ntrờn, dong kờl mờ broă ai ù lơh ƀòn ơm kis pa tŭ ntrờn rê tàm ƀòn ơm kis pa. Ồng Nguyễn Văn Trong, làng bol sàh Phước Dinh pà git, tŭ git nhai 3 pa do, Quốk hội neh tơlik kơrnoăt boh lam, broă lơh pa nàng bơsong ală gơkòl ai broă tơm ntrờn ù tiah in, bơsong jơnau lài mờ hơ̆, cau tĕ khà chờ hờp ngan đơs: “Dà lơgar tơm ntrờn geh kwơ ai làng bol in, làng bol chờ hờp ngan. Dà lơgar tơn ntrờn, dong kờl niam ngan ai làng bol in nàng geh priă tus tàm tiah ơm kis pa bơtàu tơnguh, ờ gam geh cau lơi rơƀah tai”.

Bal mờ broă rài kis broă lơh broă sa mờ hìu ơm tàm ƀòn pa, broă ntrờn, lơh wơl ƀồc blàng mò ồng lài do là bơta mờ geh uă làng bol tàm tiah lơh rơndăp broă in kơlôi rơcang ngan. Gơwèt mờ làng bol, do ờ mìng là broă ntrờn ƀồc blàng, mờ gam gơrềng tus mờ nùs nhơm pin dờn, bơhiàn bal mờ nùs nhơm git jơnau bal gơwèt mờ cau neh chơ̆t tai. Den tàng, làng bol kơ̆p kờñ broă lơh pal geh tơngai rơcang lài nền nòn, di pal mờ bơhiàn ƀòn lơgar dê. Ồng Nguyễn Thanh Hiệp, cau kis tàm tiah geh rơndăp broă lơh tàm sàh Phước Dinh sồr: “Hìu nhă añ geh 6 nơm ƀồc pal ntrờn, añ kung lơh jăt mờ gùng dà broă lơh bơh Đảng mờ Dà lơgar dê nàng jào ù lơh hìu măi hạt ñân Ninh Thuận 1 in. Tŭ geh đơs jơnau do kung neh mờr jơh sơl, den añ kung dan sàh mhar ai geh tơngai rồ ƀồc nàng làng bol geh rơcang lài nền nòn”.

Lồi nhai 3 pa do, Anih duh broă Lơh kơnờl broă sùm Quốk hội neh tơlik Jơnau lơh nền tàm pơrjum nàng bơtơl, lơh niam wơl ờ uă kơrnoăt boh lam, broă lơh krơi is tàm broă bơcri priă lơh rơndăp broă lơh hìu măi đèng hạt ñân Ninh Thuận. Bơh tŭ hơ̆ lơh gơs adăt boh lam bè broă tơm ntrờn, dong kờl mờ lơh ƀòn ơm kis pa, mờ gàr tơl uă ngan gơnoar kwơ ai làng bol tàm tiah lơh rơndăp broă in. Jăt jơnau geh ai pa, ală hìu tơl bơta niam geh jào ù tàm ƀòn ơm kis pa mờ geh ờ tă 100% khà priă ngui ù. Gơwèt mờ bă ù lơh sa suơn sre ờ di ù lơh kòi neh tam gơl jơnau kờñ ngai tàm mùl màl, mơya ờ hềt thàn dan cih măt tam gơl wơl, Dà lơgar kung gam sền nàng tơm bơtơl jăt mờ broă ngui tŭ do dê.

Ồng Nguyễn Văn Quế, Củ tịc Anih duh broă Làng bol sàh Vĩnh Hải pà git, kơnờm mờ kơrnoăt boh lam, broă lơh pa, broă tơm ntrờn ù tiah bơh rơndăp broă lơh Hìu măi đèng hạt ñân Ninh Thuận 2 gam geh lơh mhar. “Jơh ală broă kờp, sền cau tờm ù dê tus tŭ do neh lơh gơs, bol añ neh sồr kấp hờ đơm ngui priă di jăt Jơnau lơh nền sồ 121 pa ngan. Kờp jơh ală cau geh tơl loh làng là 487 hìu”

Jăt ồng Nguyễn Văn Nhựt, Kwang Lam bồ Sờh Lơh sa mờ măi mok kă bro phan càr Khánh Hoà pà git, kờp jơh uă ù geh toh wơl nàng lơh Hìu măi đèng hạt ñân Ninh Thuận 1 mờ Hìu măi đèng hạt ñân Ninh Thuận 2 là rơlao 760 lồ, mờ mờr 1 rơbô 400 hìu làng bol pal ntrờn. Broă Quốk hội tơlik Jơnau lơh nền sồ 121 tàm pơrjum neh bơsong uă bơta gơkòl tàm broă tơn ntrờn, dong kờl tus tàm ƀòn ơm kis pa. Kơnờm mờ hơ̆, broă tơm ntrờn ù tiah tàm ală sàh gam geh lơh mhar, ai geh tai nùs nhơm ring bal tàm làng bol. Tŭ do càr Khánh Hoà gam lơh jăt nùs nhơm jal mhar, lơh ngan lơh gơs broă tơm ntrờn ù tiah lài mờ lồi nhai 6 nam do nàng jào ù ai cau tờm bơcri priă lơh rơndăp broă in. "Jơnau lơh nền tàm pơrjum do neh bơsong uă ngan, tàm hơ̆ uă ngan là ală jơnau dan bơh càr Khánh Hoà dê, pơn jăt tai lơh mùl màl jơh mờ loh làng rơlao mờ di rơlao mờ cau tàm mùl màl dê tàm broă tơm ntrờn. Den tàng, lơh jăt broă tơm ntrờn ù tiah mhar rơlao, dờp geh jơnau ring bal bơh làng bol. Tŭ do càr gam tơrgùm bơsong mhar, mhar sền wơl mờ ngui priă di jăt broă tơm ntrờn nàng tơm priă ai làng bol in tàm tơngai mhar ngan”.