Lơh jăt broă lơh tìp mờ cau tĕ khà tơnơ̆ pơrjum dơ̆ sơnrờp, Quốk hội khoă XVI, drim òr (04/05), Tổng Ƀí thư, Củ tịc lơgar ồng Tô Lâm bal mờ ală Cau ala măt Quốk hội mpồl tĕ khà sồ 01 Ƀòn dờng Hà Nội geh dơ̆ tìp mờ gal cau tĕ khà tàm 10 sơnah ƀòn, tàm hơ̆ geh: Ba Đình, Ngọc Hà, Giảng Võ, Đống Đa, Kim Liên, Văn Miếu – Quốc Tử Giám, Láng, Ô Chợ Dừa, Hoàn Kiếm mờ Cửa Nam nàng yal cồng nha pơrjum mờ hơ mblàng ală jơnau lùp, jơnau dan tơn bơh cau tĕ khà dê.

Tàm dơ̆ tìp, hơ jơnau lùp bơh cau tĕ khà gơrềng tus mờ cồng nha bơh dơ̆ lơh broă gơnoar atbồ ƀòn lơgar 2 kấp dê, Tổng Ƀí thư, Củ tịc lơgar ồng Tô Lâm đơs nền cau tĕ khà dờp mờ gŏ mpồl cau lơh broă lài ngan neh gơmù niam rơlao, kấp hờ đơm rơcang rơlao, sră nggal kung geh lơh ƀuơn rơlao. Mơya, bơta mờ làng bol kơ̆p kờñ là broă lơh pa pal ai geh tam gơl mùl màl tàm broă drơng lơh làng bol mờ mpồl lơh sa kă bro in; kấp hờ đơm pal mùl màl rềp làng bol, git wă làng bol, git jơnau kờñ lơh broă, bơto bơtê broă lơh, tam gơl broă lơh, tơrbŏ bal gơnoar atbồ mờ mpồl lơh sa kă bro, tàm tơngu me bơto broă lơh geh pơgồp bal mờ broă lơh bal mờ rài kis pah ngai làng bol dê. Tổng Ƀí thư, Củ tịc lơgar ồng Tô Lâm đơs nền tus mờ ờ uă gùng dà broă lơh dờng nàng Ƀòn dờng Hà Nội tơrgùm sồr lơh mờ bơyai lơh tàm tơngai tus, tàm hơ̆ ƀòn dờng Hà Nội pal ai Adăt Càr lơgar mờ broă rơndăp lơh Càr lơgar tàm dùl sră nggal ndrờm bal nàng bơyai lơh broă.