VOV4.K’ho- Kờp tus mho ngai 28/2, 5 càr tiah Tây Nguyên ndrờm neh geh kơrnoat tam gơl tơngai bơsram bơh ală kấp bơsram dê. Jăt tàm bơta geh ngan mờ bơta bơto pơlam bơh ală Bộ, ngành mờ Mpồl đơng lam rcăng sơndră kòp dê, ală càr Tây Nguyên neh geh kơrnoat tam gơl tơngai bơsram loh làng, bè do:

Càr Lâm Đồng tam gơl ai kơnòm bơsram mầm bon, kấp dùl mờ kấp bàr in tơn jo\ tơngai ơm rlô bơsram tus jơh ngai 8 nhai 3; kơnòm bơsram kấp pe, cau bơsram dờng, cau bơsram tàm ală hìu bơsram, mờ hìu bơsram bơto broă lơh lòt bơsram wơl bơh ngai 2/3 tus.

Càr Dăk Nông neh geh kơrnoat ai kơnòm bơsram bơh mầm non tus kấp bàr in pơn jăt tai ơm rlô bơsram tus jơh ngai 8/3 tus. Kơnòm bơsram kấp pe, bơto bơtê sùm, bơto bơtê broă lơh lòt bơsram wơl bơh ngai 2/3.

Tàm Dăk Lăk, kơnòm bơsram kấp pe, cau bơsram tàm hìu bơsram sùm geh lòt bơsram bơh ngai 2/3; kơnòm bơsram bơh kấp mầm non tus kấp 2 ơm rlô tai 1 poh, tus jơh ngai 7/3.

Càr Gia Lai kung ai kơnòm bơsram kấp pe, cau bơsram tàm anih bơto bơtê sùm, cau bơsram dờng lòt bơsram wơl bơh ngai 2/3; kơnòm bơsram mầm non, kấp dùl, kấp bàr ơm rlô bơsram tai 1 poh tai tus jơh ngai 8/3.

Càr Kon Tum ring bal ai kơnòm bơsram kấp pe, cau bơsram dờng, cau bơsram tàm ală hìu bơsram sùm, anih bơto bơtê broă lơh tơrgùm lòt bơsram wơl bơh ngai 2/3. Gơ wèt mờ kơnòm bơsram mầm non, kơnòm bơsram kấp dùl, kấp 2 pơn jăt tai ơm rlô bơsram tus jơh ngai 8/3 tus.

Cau mblàng Lơ Mu K’Yến