Bàr càr Kon Tum mờ Gia Lai geh gùng nhàr rềp bal geh 9 kơnhoàl, ƀòn dờng mờ kờp jơh bơta jòng rơlao 183 kơi sồ. Tiah rềp nhàr bal 2 càr tơrgùm uă uă brê hòn is, geh khà dơm chi uă, uă bơta siñ họk, uă bơta phan jơi kis, chi che geh kwơ, ờ hoan geh tai, krơi is, den tàng ƀuơn ngan gơrềng tài bơh ală cau sơgràm tus mờ brê.

5 nam do lơh jăt kơrnoăt pơgồp bal, mpồl lơh broă geh gơnoar 2 càr bơyai lơh rơlao 1 rơbô 300 dơ̆ lòt sền, jòi kŭp nàng sền gàr brê; Gŏ mờ lơh sră tìs 275 dơ̆, tàm hơ̆ lơh glài mờ priă 242 dơ̆, lơh glài kŭp màng 27 dơ̆ mờ mờr 16 lồ brê gơtìp aniai; Kŭp rơlao 815 khối chi wil ală bơta, 20 kĭ phan bơh phan jơi kis tàm brê. Kờp jơh priă lơh glài tă tàm kes priă dà lơgar rơlao 2 tơmàn 500 tơlăk đong.